1 Ligbi ko ɔ Yesu de e kaseli ɔmɛ ke, "Ka nɛ haa nɛ nɔ peeɔ yayami ɔ, e ngɛ daa. Se mohu due ha nɔ nɛ nɔ nɛ ka maa gu kɛ ba a. 2 Afani nɛ a wo tɛ agbo ngɔ muɔ jamɛatsɛ ɔ kuɛ nɛ a ya sake lɛ ngɔ fɔ wo mi pe nɔ́ nɛ a ma de ke a ngɛ e tue sae, ke e ha nɛ bi tsɔwi nɛ ɔmɛ eko nane maa tɔtɔ. 3 Nyɛ ko de ke i de we nyɛ. I ngɛ nyɛ si woe!

Ke o nyɛmi pee yayami ɔ, mo kã e hɛ mi. Nɛ ke e na e tɔmi ɔ nɛ e pia e he ɔ, mo ngɔ ke lɛ. 4 Ke ji kaa ngɛ ligbi kake mi tete ɔ, e ma tɔ o nɔ si kpaago se e ma kpa mo pɛɛ ngɛ eko fɛɛ eko he ɔ, mo wo ngɔ ke lɛ."

5 Ligbi ko ɔ, e kaseli ɔmɛ de lɛ ke, "Wa suɔ kaa wa na hemi kɛ yemi nɛ hiɛ pe bɔ nɛ wa ngɛ piɔ nɛ ɔ. Moo tsɔɔ wɔ bɔ nɛ wa maa pee kɛ na."

6 Yesu de mɛ ke, "Ke nyɛ ngɛ hemi kɛ yemi bɔbɔyoo kaa wu nyafii ko nɛ ngɛ kaa kabɔte wu kɛkɛ po ɔ, nyɛ ma nyɛ de tso nɛ maa si nɛ ɔ ke, moo hia kɛ ya nɔ wo mi nɛ e maa hia. Nɔ́ tsuaa nɔ nɛ nyɛ ma de ɔ, e maa ba mi nɔuu. 7 Ke sɔmɔlɔ je ngmɔ mi loo lohwehi a ni hami kɛ ba a, e ba hi we si nɛ e yeɔ ni. 8 Se mohu e ya hooɔ e nutsɔ ɔ niye ni kekle nɛ e kɛ ya haa lɛ nɛ e yeɔ. Nɛ lɔ ɔ se loko ji lɛ nitsɛ hu e yeɔ ni. 9 Nɛ jamɛ a sɔmɔlɔ ɔ na we sina ko tete, ejakaa e blɔ nya ni kɛkɛ nɛ e ngɛ tsue. 10 Ja a kɛ̃ nɛ ke nyɛ hu nyɛ bu mi tue nɛ nyɛ pee níhi nɛ i de nyɛ ɔ, nyɛ ko hyɛ blɔ kaa a ma je nyɛ yi. Ejakaa nyɛ blɔ nya ni kɛkɛ nɛ nyɛ ngɛ tsue."

11 Benɛ a tsa a blɔ nyɛɛmi ɔ nɔ kɛ yaa Yerusalem ɔ, a ya su Galilea kɛ Samaria huzu ɔ nya. 12 Nɛ a maa ho kɔpe ko mi sɛmi ya pɛ nɛ a na nyumuhi hiɔ tsutsɛmɛ nyɔngma nɛ daa si ngɛ se lokoo. 13 A ngɛ ngmlaa kpae ngɛ dee ke, "Mawetsɛ Yesu, moo na wɔ mɔbɔ!"

14 E hyɛ mɛ too nɛ e de mɛ ke, "Nyɛɛ ya nɛ nyɛ wo nyɛ he kɛ ya tsɔɔ Yuda bi ɔmɛ a osɔfo ɔ kaa a tsa nyɛ." Nɛ benɛ a ngɛ blɔ ɔ nɔ kɛ yaa a, a na kaa hiɔ ɔ jɔ ha mɛ.

15 A ti nɔ kake lɛɛ e kpale kɛ ba Yesu ngɔ kɛ ngmlaa ke, "Sina ha Mawu, a tsa mi!" 16 Kɛkɛ nɛ e ba wo e hɛ mi ngɔ bu si ngɛ Yesu hlami nɛ e na lɛ si. Nyumu nɛ ɔ, Samaria bi nɛ Yuda bi ɔmɛ bui mɛ ɔ eko ji lɛ.

17 Se Yesu bi lɛ ke, "Tsa pi nihi nyɔngma nɛ i tsa a lo? Jije nihi nɛɛ ɔmɛ nɛ piɛ ɔ ngɛ? 18 Nubwɔ nɛ ɔ pɛ nɛ kpale kɛ ba Mawu si nami lo?"

19 Nɛ Yesu de lɛ ke, "Moo te si nɛ o ho. O hemi kɛ yemi ɔ tsa mo."

20 Ligbi ko ɔ, Farisi bi ɔmɛ bi Yesu ke, "Mɛni be nɛ Mawu Matsɛyemi ɔ maa je sisi?" E ha mɛ heto ke, "A be Mawu Matsɛyemi ɔ bami ɔ nae kɛ hɛ ngmɛ. 21 Nɔ ko be nyɛe ma de ke, ‘E je sisi ngɛ hiɛ aloo ngɛ zugba a nɔ lejɛ ma je,’ ejakaa Mawu Matsɛyemi ɔ nyɛ mi nɛ e ngɛ."

22 Pee se ɔ, e kɛ e kaseli ɔmɛ tu enɛ ɔ he munyu ekohu nɛ e de mɛ ke, "Be ma nɛ nyɛ ma hla Nɔmlɔ Bi ɔ nɛ e hi nyɛ ngɔ ligbi kake pɛ kɛkɛ se nyɛ be lɛ nae. 23 Nɛ nyɛ maa nu nɛ a ma de ke i kpale kɛ ba, nɛ i ngɛ hiɛ, aloo i ngɛ lejɛ. Nyɛ ko he ye, nɛ nyɛ ko hia blɔ ke nyɛ ngɛ mi hlae. 24 Ejakaa ke i kpale kɛ ba a, nyɛ maa le paa kaa i ba. E maa je si paa kaa bɔ nɛ oslabai gbaa a. 25 Se loko ji jamɛ a be ɔ maa su ɔ, i ma na nɔ́ wawɛɛ nɛ ma a tsuo ma kua mi.

26 Be mi nɛ Nɔmlɔ Bi ɔ maa kpale kɛ ba a, je ɔ maa hi kaa bɔ nɛ e ngɛ ngɛ Noa yi nɔ ɔ. 27 A ngɛ ni yee nɛ a ngɛ da nue; a ngɛ yo ngɔe nɛ a ngɛ gba hae; nɛ a ngɛ nɔ́ tsuaa nɔ pee bɔ nɛ a peeɔ daa a kɛ ya si be nɛ Noa sɛ lɛ ɔ mi nɛ nyu ɔ ba kpata nɔ tsuaa nɔ hɛ mi ɔ.

28 Nɛ je ɔ maa hi kaa bɔ nɛ e ngɛ ngɛ Lot yi nɔ ɔ; a ngɛ nɔ́ tsuaa nɔ pee kaa bɔ nɛ a peeɔ daa a. Nihi ya ni tsumi, a ngɛ ni yee nɛ a ngɛ ni nue; nihi ngɛ jua yee; a ngɛ ngmɔ hue nɛ a ngɛ tsu mae, 29 hluu kɛ ya si mɔtu ɔ nɛ Lot hia blɔ kɛ je Sodom nɛ la kɛ hiɔmi tɛ ba nɛ pue ma a nɔ nɛ e kpata nɔ tsuaa nɔ hɛ mi ɔ. 30 Ja a kɛ̃ nɛ e maa ba mi kɛ ya si ngmlɛfia nɔ nɛ Nɔmlɔ Bi ɔ maa kpale kɛ ba a.

31 Jamɛ a ligbi ɔ nɔ ɔ, mo nɔ nɛ o be we mi ɔ, o ko de ke o maa ya we mi ya to o níhi ngɛ we ɔ mi. Nɛ nihi nɛ ngɛ ngmɔ mi ɔ a ko de ke a ma ma a mi. 32 Nyɛ kai nɔ́ nɛ ba Lot yo ɔ nɔ ɔ. 33 Nɔ tsuaa nɔ nɛ ma hla kaa e maa baa e wami yi ɔ, e maa je e dɛ; nɛ nɔ nɛ e wami maa je e dɛ ɔ, e nine maa su nɔ ekohu. 34 Jamɛ a nyɔ ɔ mi ɔ nyumuhi enyɔ maa hwɔ si ngɛ sa kake nɔ nɛ a ma wo nɔ kake nɛ a ma si nɔ kake. 35 Yihi enyɔ maa hi wɛ kake se. 36 A ma wo nɔ kake nɛ a ma si nɔ kake. Ja a kɛ̃ nɛ nyumuhi enyɔ maa hi hue ngɛ a bi a kasa mi ngɛ ngmɔ mi nɛ a ma wo nɔ kake nɛ a ma si nɔ kake."

37 Kaseli ɔmɛ bi lɛ ke, "Mawetsɛ, jije a ma wo mɛ kɛ ho?" E ha mɛ heto ke, "He nɛ nɔ gbogboe ngɛ ɔ, lejɛ ɔ nɛ okpokuhi buaa a he nya ngɛ."