1 Jehanɛ ɔ Hebemi yemi be ɔ maa ho sumi ya, be mi nɛ Yuda bi ɔmɛ yeɔ akpiti ɔ. 2 Nɛ osɔfo nikɔtɔma amɛ kɛ asafo nikɔtɔma amɛ kɛ mlaa tsɔɔli ɔmɛ bɔni ga tomi bɔ nɛ a maa pee nɛ a tane e yi ngɛ laami mi nɛ gidigidi ko nɛ ko ba.

3 Be nɛ ɔ mi nɛ Abosiami sɛ e kaseli ɔmɛ a ti nɔ kake nɛ a tsɛɛ lɛ ke Yuda Iskariot ɔ mi. 4 Nɛ e ho ya na osɔfo nikɔtɔma amɛ kɛ asafoatsɛ ɔmɛ konɛ e kɛ mɛ nɛ susu bɔ nɛ e maa pee nɛ e ha nɛ a nine nɛ su Yesu nɔ nɛ a gbe lɛ he. 5 A bua jɔ he saminya kaa e maa ye kɛ bua mɛ, nɛ a wo lɛ si kaa a ma ha lɛ sika. 6 Enɛ ɔ he je ɔ, Yuda bɔni blɔ nɔ nɛ e maa gu nɛ e nine maa su e nɔ kɛ ha mɛ ngɛ kɔkɔɔ mi ɔ he susumi.

7 Kɛkɛ nɛ akpiti yemi ligbi nɛ a tsɛɛ ke Hebemi Gbijlɔ ɔ ba su. Jamɛ a ligbi ɔ nɔ nɛ a gbee Hebemi to bi ɔ nɛ a kɛ yeɔ akpiti ɔ nɛ. 8 Yesu tsɔ Petro kɛ Yohane kɛ sɛ hlami nɛ e de mɛ ke, "Nyɛɛ ya nɛ nyɛ ya pee Hebemi niye ni ɔ kɛ dla wa se."

9 A bi lɛ ke, "Jije o maa suɔ nɛ wa ya to niye ni ɔ he blɔ nya ngɛ?"

10 E de mɛ ke, "Ke nyɛ sɛ ma a mi pɛ nyɛɛ kɛ nɔ ko maa kpe nɛ e tloo nyu kɛ buɛ. Nyɛɛ nyɛɛ e se kɛ ya we mi he nɛ e yaa a, 11 nɛ nyɛ ya de wetsɛ ɔ ke, ‘Wa Tsɔɔlɔ ɔ ke o tsɔɔ wɔ tsu nɔ́ nɛ mi nɛ e kɛ e kaseli ɔmɛ maa ye Hebemi ni ɔ ngɛ ɔ.’ 12 Nɛ e maa tsɔɔ nyɛ asa ngua ko nɛ a dla mi ngɔ fa si ha wɔ. Lejɛ ɔ i. Nyɛɛ ya mi nɛ nyɛ ya to wa niye ni ɔ he blɔ nya ngɛ lejɛ ɔ."

13 Kaseli ɔmɛ pue nɔ kɛ ho ma a mi ya nɛ a ya na nɔ́ tsua nɔ kaa bɔ nɛ e de mɛ ɔ; nɛ a to Hebemi niye ni ɔ he blɔ nya ngɛ lejɛ ɔ.

14 Yesu kɛ kaseli ɔmɛ nɛ piɛ ɔ hu bu a nɔ kɛ ho we ɔ mi ya. Nɛ benɛ ni yemi be ɔ su nɛ a ho hi si ngɛ okplɔɔ ɔ he ɔ, 15 e de mɛ ke, "I hyɛ be nɛ ɔ blɔ kɛ he hiami, nɛ i ngɛ hlae nɛ i kɛ nyɛ wa pue si kaa kikɛ nɛ ɔ kɛ ye ni nɛ ɔ loko ye nɔ́ nami be ɔ nɛ ba su. 16 Ejakaa i kɛ nyɛ be si hiɛ kikɛ ɔ kɛ ye ni nɛ ɔ eko hu kɛ ya si be nɛ nɔ́ nɛ niye ni nɛ ɔ daa si kɛ ha a maa ba mi ngɛ Mawu Matsɛyemi ɔ mi."

17 Kɛkɛ nɛ e wo glaasi kɛ wai ɔ nɛ e na si ngɛ he nɛ e de mɛ ke, "Nyɛ he nɛ nyɛ tsuo nyɛɛ nu eko. 18 Kɛ je enɛ ɔ se kɛ yaa a, i be wai nue hu kɛ ya si be nɛ Mawu Matsɛyemi ɔ maa ba."

19 Kɛkɛ nɛ e wo abolo kake, nɛ benɛ e na Mawu si ngɛ he se ɔ, e poo mi nɛ e dla ngɔ ha mɛ, nɛ benɛ e kɛ ngɛ mɛ hae kakaaka a, e de mɛ ke, "Ye nɔmlɔ tso ɔ nɛ a ngɔ kɛ ha ngɛ nyɛ he ɔ ji enɛ ɔ nɛ; nyɛɛ ye nɛ nyɛ ngɔ kai mi."

20 Ngɛ niye ni ɔ se ɔ, e pa ha mɛ glaasi kɛ wai ɔ eko. Nɛ benɛ e kɛ ngɛ mɛ haeɔ, e de mɛ ke, "Enɛ ɔ ji ye muɔ nɛ a ngɔ pue si ha nyɛ kɛ ha Mawu somi he ɔ nɛ a ma kɛ he nyɛ yi wami ɔ e nɔ mi mami. 21 Se mohu nɔ nɛ maa tsɔɔ ye se blɔ ɔ hii si ngɛ wa kpɛti amlɔ nɛ ɔ kaa huɛ nɛ e kɛ mi ngɛ nine kae ngɛ okplɔɔ ɔ he. 22 Ngɛ Mawu yi mi tomi ɔ nya a, e sa kaa Nɔmlɔ Bi ɔ nɛ gbo; se due ha nɔ nɛ maa tsɔɔ ye se blɔ ɔ."

23 Kɛkɛ nɛ kaseli ɔmɛ bɔni a he bimi ke, a ti mɛnɔ nɛ maa pee nɔ́ kaa kikɛ nɛ ɔ lo. 24 Jehanɛ ɔ, a bɔni nya sami ngɛ a kpɛti kaa a ti mɛnɔ nɛ maa pee ngua pe kulaa ngɛ Matsɛyemi nɛ ma a mi lo.

25 Se Yesu de mɛ ke, "Je nɛ ɔ mi bimɛ a nɔ yeli ɔmɛ nɛ ji matsɛmɛ kɛ nimli ngua amɛ yeɔ a nyɔguɛ ɔmɛ a nɔ nɛ nyɔguɛ ɔmɛ buu mɛ kaa a dloomi, nɛ a be nya jemi ko. 26 Se nyɛɛ lɛɛ nyɛ nɔ́ be ja. Nyɛ ti nɔ nɛ sɔmɔɔ nyɛ pe kulaa a, lɛ ji nɔ nɛ maa pee nyɛ nɔkɔtɔma. 27 Ngɛ je nɛ ɔ mi ɔ nutsɔ ɔ hii si ngɛ okplɔɔ he nɛ e we bi ɔmɛ sɔmɔɔ lɛ. Se ngɛ ye blɔ fa mi ɔ, tsa pi ja i, ejakaa ami lɛɛ i ngɛ nyɛ kpɛti kaa sɔmɔlɔ. 28 Se kɛ hu ɔ, kaa nyɛ ji ye he ngɛ ye kami be nɛ ɔmɛ a mi, 29 nɛ akɛnɛ Tsaatsɛ ha mi Matsɛyemi ko he je ɔ, ami hu i ngɛ nyɛ he blɔ hae, 30 nɛ nyɛɛ kɛ mi nɛ hi si nɛ nyɛɛ ye ni nɛ nyɛɛ nu ni ngɛ ye okplɔɔ ɔ he ngɛ jamɛ a Matsɛyemi ɔ mi; nɛ nyɛɛ kojo Israel wɛtso nyɔngma kɛ enyɔ ɔmɛ.

31 Simon, Simon, o nɛ, Abosiami bi nɛ a ha lɛ he blɔ nɛ e sa nyɛ mi kaa bɔ nɛ a saa ngma mi ɔ, 32 se i sɔle nɛ i kpa pɛɛ kɛ ha mo bɔ nɛ pee nɛ o hemi kɛ yemi nɛ ko ta kulaa. Lɔ ɔ he je ɔ, ke o pia o he nɛ o kpale kɛ ba ye ngɔ ɔ, o wo o nyɛmi ɔmɛ a hemi kɛ yemi he wami."

33 Petro de lɛ ke, "Nutsɔ, i dla ye he nɛ i kɛ mo maa ya he tsuaa he nɛ o maa ya, tsu mi jio, gbenɔ mi jio, i kɛ mo maa ya."

34 Se Yesu de le ke, "Petro, i ngɛ mo dee anɔkuale mi ke, kɛ je amlɔ nɛ ɔ mi kɛ ya si hwɔɔ mɔtu ɔ, kungwɔ be kekle nɔ́ kpae makɛ nɛ o ma ka kita si etɛ ke o li mi tete po."

35 Kɛkɛ nɛ e bi mɛ ke, "Benɛ i tsɔ nyɛ ke nyɛ ya fiɛ Manye Munyu ɔ nɛ nyɛ hɛɛ we sika kɛ kotoku kɛ tade kɛ tokota a nɛɛ, nɔ́ ko he hia nyɛ lo?" A ha lɛ heto ke, "Nɔ ko he hia we wɔ."

36 E de mɛ ke, "Jehanɛ ɔ lɛɛ i ngɛ nyɛ dee ke, ke mo nɔ ko o ngɛ kotoku ɔ, o hɛɛ kɛ sika kɛ to dɛ. Nɛ ke o be klaate ɔ, o jua o tade nɛ o kɛ he eko. 37 Ejakaa be su nɛ nɔ́ nɛ a gba ngɔ fɔ si ngɛ ye he ke, ‘A maa bu lɛ ngɔ si mlaa tɔli a nɔ, nɛ a bu lɛ gbenɔ fɔ ɔ’, maa ba mi. Niinɛ, nɔ́ tsuaa nɔ nɛ a ngma ngɛ ye he ɔ maa ba mi."

38 Nɛ e kaseli ɔmɛ ha lɛ heto nɛ a de ke, "Nutsɔ, wa ngɛ klaatehi enyɔ ngɛ hiɛ ɔ piɔ." Se Yesu de mɛ ke, "E hiɛ."

39 Enɛ ɔ se ɔ, e kɛ e kaseli ɔmɛ kple si kɛ je hiɔwe tsu ɔ nɔ nɛ a ho Nuyoku ɔ nɔ ya kaa bɔ nɛ e pɔɔ peemi ɔ. 40 Benɛ a ya su lejɛ ɔ, e de mɛ ke, "Nyɛɛ sɔle wawɛɛ nɛ nyɛ ko sɛ kami mi."

41 Kɛkɛ nɛ e sa kɛ je a he bɔɔ maa pee tɛ fɔmi kɛmi nɛ e ya ho kpla si nɛ e sɔle nɛ e de ke, 42 "Tsaatsɛ, ke o suɔ ɔ, mo ha nɛ amanehlu kplu nɛ ɔ nɛ e be ye yi. Se kɛ hu o pee bɔ nɛ moo suɔ, se pi bɔ nɛ ami i suɔ." 43 Kɛkɛ nɛ Mawu bɔfo ko je hiɔwe ba je e he kpo ngɔ tsɔɔ lɛ nɛ e wo lɛ he wami. 44 Ejakaa e hao ngɛ e mumi mi tɔɔ nɛ lɔ ɔ he je ɔ, e sɔle kɛ he hiami kɛ ya si benɛ e he latsa plɛ kaa muɔ nɛ e ngɛ tslee kɛ ngɛ si puee. 45 Benɛ e sɔle ta nɛ e kpale kɛ ba e kaseli ɔmɛ a ngɔ ɔ, e ba na kaa kɔmɔ yemi kɛ pɔ tɔtɔɛ gbe mɛ nɛ a hwɔ mahe.

46 Nɛ e de mɛ ke, "Mahe nɛ nyɛ ngɛ hwɔe lo? Nyɛɛ te si nɛ nyɛɛ sɔle nɛ ke ji a ka nyɛ ɔ, nyɛ nyɛ nya nɛ nyɛɛ da."

47 E ngɛ munyu ɔ tue nɔuu kɛkɛ nɛ a maa hyɛ ɔ, ni komɛ ji nɛ nɛ Yuda, nɛ ji kaseli ɔmɛ a ti nɔ kake ɔ, nyɛɛ a hɛ mi kɛ ba. Yuda nyɛɛ kɛ ya na Yesu nɛ e fua lɛ atuu nɛ e fiɔ e nya he.

48 Se Yesu bi lɛ ke, "Yuda, mɛni peemi ji enɛ ɔ, nya he fiɔmi nɛ o ma kɛ tsɔɔ Nɔmlɔ Bi ɔ se blɔ lo?"

49 Benɛ kaseli ɔmɛ nɛ piɛ ɔ na nɔ́ nɛ ma a, a bi lɛ ke, "Mawetsɛ, waa te kɛ kpee mɛ lo? Wa hɛɛ klaate ɔmɛ kɛ ba!" 50 Nɛ a ti nɔ kake ja Osɔfo Nɔkɔtɔma a e tsɔlɔ ɔ, nɛ e po e hiɔ tue ngɔ fɔ si.

51 Se Yesu de mɛ ke, "Nyɛɛ kɛ mɛ ko nɔ hu." Nɛ e ta tue ɔ ngwɔhe ɔ he nɛ e tsa tue ɔ. 52 Kɛkɛ nɛ Yesu bi osɔfo nikɔtɔma amɛ kɛ Sɔlemi We ɔ he buli ɔmɛ a nya asafoatsɛ ɔmɛ kɛ nikɔtɔma kpa amɛ nɛ nyɛɛ ni ɔmɛ a hɛ mi kɛ ba a ke, "Anɛ julɔ ji mi nɛ nyɛɛ kɛ klaatehi kɛ tso kpotihi ma mi numi nɛ ɔ lo? 53 Mɛni he je nɛ nyɛ nui mi ngɛ Sɔlemi We ɔ? Tsɛ i yaa lejɛ ɔ daa ligbi? Se nyɛ be ji nɛ ɔ nɛ, be nɛ Abosiami he wami ngɛ nɔ yee."

54 Kɛkɛ nɛ a nu lɛ nɛ a kpaka lɛ kɛ ho Osɔfo Nɔkɔtɔma a we ɔ mi ya; nɛ Petro hu nyɛɛ a se ngɛ se lokoo. 55 Soja amɛ slɛ la ngɛ kpo ɔ nɔ nɛ a hi si ngɛ hluie nɛ Petro hu ho ya piɛ a he.

56 Se yoyo tsɔlɔ ko na Petro nɛ e bɔni lɛ hyɛmi totooto. Nyagbe mi ɔ, nɔ́ nɛ yoyo ɔ de ji, "Nɔmlɔ nɛ ɔ hu kɛ Yesu nɛ nyɛɛ."

57 Petro kplɛɛ we nɔ. E de lɛ ke, "Kpaoo, mamiyo, nɔmlɔ nɛ o ngɛ tsɔɔe nɛ ɔ, i li lɛ."

58 Se be bɔɔ se ɔ, nyumu ko hu to Petro he hɛ nɛ e ngɔ ma e hɛ mi ke, "Tsɛ mo hu a ti nɔ eko ji mo!" Petro de lɛ ke, "Kpaoo! Tsa pi a ti nɔ eko ji mi."

59 Maa pee ngmlɛfia kake se ɔ, nɔ kpa hu na Petro nɛ e ka nɛ e de ke, "I le nɔmlɔ nɛ ɔ kaa lɛ hu a ti nɔ eko ji lɛ, nɛ nguane jemi ko be he. Ejakaa e kɛ lɛ tsuo nɛ je Galilea a nɛ."

60 Se Petro de kɛ hɛ dɔ ke, "Hyɛ ha! Maminyumu, nɔ́ nɛ o ngɛ dee nɛ ɔ, i li he nɔ́ ko." Petro nya nɛ ke maa si pɛ nɛ kungwɔ kpa nɔ.

61 Jamɛ a hɛ ngmɛfia a mi nɔuu nɛ Yesu plɛ nɛ e hyɛ Petro. Nɛ Petro kai munyu nɛ e tu lɛ ɔ ke, "Loko ji kungwɔ ma kpa kekle nɔ́ makɛ ɔ, o ma de si etɛ ke o li mi" ɔ. 62 Kɛkɛ nɛ Petro te si kɛ je kpo nɛ e ya fo ya wawɛɛ.

63 Nɛ e ba mi kaa nihi nɛ ngɛ Yesu he bue ɔ bɔni e he fɛu yemi. 64 A fi e hɛ mi nɛ a si lɛ kɔ nɛ a de lɛ ke, "Ke gbalɔ ji mo ɔ, moo tsɔɔ wɔ nɔ nɛ si mo nɔ́ ɔ." 65 Nɛ a tu jɛmi munyuhi fuu ngɔ si lɛ kɛ pue e hɛ mi si.

66 Benɛ je hɛ mi ke e tsɔɔ pɛ nɛ asafo nikɔtɔma amɛ kɛ osɔfo nikɔtɔma amɛ kulaa nɛ ji kojoli ngɛ Yuda bi ɔmɛ a kojomi he ngua pe kulaa a ba bua. A kpaka Yesu kɛ ba da si ngɛ kpe ɔ hɛ mi. 67 Nɛ kpe ɔ bi lɛ ke, "Anɛ mo nɛ o ke mo ji Yiwamihelɔ ɔ? Mo de nɛ waa nu mwɔnɛ ɔ." 68 Yesu ha mɛ heto nɛ e de ke, "Ke i de nyɛ hu nyɛ be mi hee maa ye; nɛ nyɛ be mi blɔ hae hulɔ nɛ ma jaje ye nya mi munyu. 69 Se be ma, nɛ e be kɛe, nɛ a maa wo Nɔmlɔ Bi ɔ matsɛ nɛ e maa hi Hewamitsɛ Mawu ɔ hiɔ nine nɔ."

70 Munyu nɛ ɔ nɛ e tu ɔ pɛ nɛ kpe ɔ tsuo hia ngmlaa ke, "Lɛɛ o ngɛ tsɔɔe kaa Mawu Bi ji mo lo?" Yesu ha heto nɛ e de mɛ ke, "Ee, Mawu Bi ji mi!"

71 Kɛkɛ nɛ mɛ tsuo a hia ngmlaa nɛ a de ke, "Odase kpa ko he hia we wɔ hu. Wɔ nitsɛmɛ wa nu nɔ́ nɛ e de ɔ."