1 Hɔgba makɛ mla a, a wo tsopa kɛ he via amɛ nɛ a dla kɛ to ɔ kɛ ba yɔkɔ ɔ he. 2 A na kaa a je tɛ agbo ɔ nɛ a kɛ tsi muɔ ɔ nya a. 3 Lɔ ɔ he je ɔ, a sɛ muɔ ɔ mi se a na kaa Mawetsɛ Yesu gbogboe ɔ be mi.

4 A pee yaa ke ngɛ nɔ́ nɛ ba a he susue; nɛ si kake too nɛ a maa hyɛ ɔ, nyumuhi enyɔ komɛ nɛ wo nɔ hiɔ, nɛ ngɛ kpɛe wawɛɛ daa si ngɛ a hɛ mi. 5 Yi ɔmɛ ye gbeye nɛ a ngɔ a hɛ mi kɛ bu si. Kɛkɛ nɛ ni enyɔ ɔmɛ bi mɛ ke, "Mɛni he je nɛ nyɛ ba ngɛ nɔ nɛ ngɛ hɛ ngmengmle ɔ hlae ngɛ ni gbogboehi a kpɛti? 6 E be hiɛmɛ nɛ ɔ. E te si. Anɛ nyɛ hɛ je nɔ́ nɛ e de nyɛ ngɛ Galilea a nɔ lo? 7 Anɛ e de we nyɛ ke, a maa tsɔɔ Nɔmlɔ Bi ɔ se blɔ nɛ nimli yayamihi maa nu lɛ maa gbe, se e maa te si ekohu ngɛ ligbi nɛ ji etɛ ɔ nɔ?"

8 Kɛkɛ nɛ a kai munyu ɔ, 9 nɛ a kpale nɔuu kɛ ho ma a mi ya nɛ a ya bɔ e kaseli nyɔngma kɛ kake nɛ piɛ ɔmɛ kɛ a bi kpa amɛ nɔ́ nɛ ba a. 10 Yi ɔmɛ nɛ ya muɔ ɔ nya amɛ ji, Maria Magdalena kɛ Yohana kɛ Maria nɛ ji Yakobo nyɛ ɔ kɛ yi kpahi fuu. 11 Se munyu ɔ pe kaa nyazia ko kɛkɛ kɛ ha nyumu ɔmɛ, nɛ a he we yi.

12 Se Petro sa fo kɛ ho muɔ ɔ nya ya nɛ e ya hyɛ ha. E ya ba si nɛ e hyɛ muɔ ɔ mi, nɛ nɔ́ nɛ pɛ nɛ e na ji klala amɛ nɛ a kɛ ha gbogboe ɔ he ɔ; kɛkɛ nɛ e kpale kɛ ho ma a mi ya, nɛ e juɛmi sui nɔ́ nɛ ba a he.

13 Jamɛ a ligbi ɔ Hɔgba a nɔuu ɔ, Yesu kaseli enyɔ ngɛ si slaae kɛ yaa kɔpe ko nɛ a tsɛɛ ke Emao nɛ e kɛ Yerusalem kɛmi maa pee si tomi kpaago ɔ. 14 Benɛ a ngɛ blɔ ɔ nɔ kɛ yaa a, a ngɛ níhi nɛ ba ngɛ jamɛ a be ɔmɛ a mi nɛ kɔɔ Yesu gbenɔ ɔ he ɔ he ni sɛɛe. 15 A ngɛ munyu ɔ tue nɔuu nɛ Yesu nitsɛ ba na mɛ. 16 Se a li e mi tso, ejakaa Mawu wo lɔ ɔ ngɔ laa mɛ.

17 Kɛkɛ nɛ e bi mɛ ke, "Mɛni ni nɛ nyɛ ngɛ sɛɛe wawɛɛ kikɛ ɔ? Mɛni ngɛ nyɛ nya gbae?" A ho da si nɛ a hɛ mi pee mɔbɔmɔbɔ. 18 Kɛkɛ nɛ a ti nɔ kake nɛ a tsɛɛ lɛ ke Kleopa a ha lɛ heto nɛ e de ke, "E peeɔ mi kaa nubwɔ ji mo ngɛ Yerusalem, nɛ lɔ ɔ he je ɔ, o nui sane gbeyegbeyehi nɛ ba ngɛ ma a mi ligbi etɛ nɛ ɔ mi he ma ji."

19 Yesu bi lɛ ke, "Mɛni ba?" A ha lɛ heto nɛ a de ke, "Nɔ́ nɛ a pee Yesu nɛ je Nazaret ɔ. Gbalɔ kɛ Tsɔɔlɔ ji lɛ, nɛ e tsu nyakpɛ níhi slɔɔtohi nɛ o maa na paa kaa Mawu nɔmlɔ ji lɛ, nɛ Mawu kɛ nimli tsuo buu lɛ saminya. 20 Se osɔfo nikɔtɔma amɛ kɛ wa asafo nikɔtɔma amɛ nu lɛ kɛ ya ha Roma amlaalo ɔ nɛ a bu lɛ gbenɔ fɔ, nɛ a sɛu lɛ. 21 Wa susu kaa lɛ ji Yiwamihelɔ anunyamitsɛ nɛ ba Israel kpɔmi.

Se mohu ngɛ níhi kulaa nɛ ba mwɔnɛ ɔ ji ligbi etɛ ɔ se ɔ, 22 wa kpɛti yi ɔmɛ ekomɛ nɛ ji e se nyɛɛli ɔ ya yɔkɔ ɔ he makɛ nɛ ɔ. 23 Nɛ nyakpɛ amaniɛ nɛ a ba bɔ ji kaa gbogboe ɔ be muɔ o mi; se a na hiɔwe bɔfo komɛ nɛ a de mɛ ke Yesu ɔ te si. 24 Enɛ ɔ he je ɔ, wa kpɛti nyumu ɔmɛ ekomɛ sa fo kɛ ya muɔ ɔ nya nɛ a ya na kaa gbogboe ɔ be muɔ ɔ mi niinɛ kaa bɔ nɛ yi ɔmɛ ba de ɔ."

25 Kɛkɛ nɛ Yesu de mɛ ke, "Nyɛ nɔ́ lemi se maa kɛ! Mɛni he je nɛ nyɛ he we gbali ɔmɛ a munyu ɔmɛ nɛ ngɛ Ngmami ɔmɛ a mi yi ɔ? 26 Anɛ gbali ɔmɛ gbɛ kɛ fɔe si paa kaa Yiwamihelɔ ɔ maa na ni nɛ ɔmɛ loko e maa sɛ e neneene anunyami ɔ mi lo?"

27 Nɛ Yesu gba mɛ Ngmami ɔmɛ a mi sane kaa bɔ nɛ gbali ɔmɛ ngma kɛ je Mose Kekle Womi ɔ mi ngɛ e he ɔ, nɛ e tsɔɔ mɛ a sisi fitsofitso.

28 Jamɛ a be ɔ mi ɔ, a maa ho he nɛ a yaa nɛ a tsɛɛ ke Emao ɔ sumi ya. Yesu pee kaa nɔ nɛ lɛɛ e ngɛ mi poe kɛ yaa. 29 Se kaseli ɔmɛ tsi e nya nɛ a de lɛ ke du ngɛ bue, lɔ ɔ he je ɔ, e ya hwɔ a ngɔ. Kɛkɛ nɛ e kɛ mɛ ho we ɔ mi ya. 30 Benɛ a hi si nɛ a maa ye ni ɔ, e ba Mawu gbaami ngɔ pue ni ɔ nɔ nɛ e wo abolo ɔ nɛ e po kɛ ngɛ mɛ hae. 31 Kɛkɛ nɛ si kake too ɔ, a hɛ ngmɛ bli nɛ a le e mi tso. Nɛ nɔuu nɛ e laa mɛ.

32 Jehanɛ ɔ, a bɔni a si bi demi bɔ nɛ a tsui he dɔ la ha ngɛ blɔ ɔ nɔ benɛ e ngɛ mɛ Ngmami ɔmɛ a sisi tsɔɔe ɔ. 33 Kɛkɛ nɛ a kpale a se kɛ ho Yerusalem ya nɛ a ya na kaseli nyɔngma kɛ kake ɔ nɛ piɛ ɔ kɛ ni kpa amɛ nɛ a bua a he nya. 34 Nɛ ni nɛmɛ nɛ a ya na ngɛ Yerusalem ɔ de mɛ ke, "Nutsɔ ɔ te si niinɛ. E je e he kpo kɛ tsɔɔ Petro."

35 Nɛ ni enyɔ ɔmɛ nɛ je Emao kɛ ba a hu bɔ mɛ bɔ nɛ e ba na mɛ ngɛ Emao blɔ ɔ nɔ, kɛ bɔ nɛ e ke mɛ nyɛɛ kɛ ya su we mi se a li e mi tso kɛ ya si benɛ e po abolo ɔ ngɔ ha mɛ loko a le e mi tso ɔ. 36 Se benɛ a ngɛ a nyɛmi ɔmɛ amaniɛ ɔ bɔe ɔ, kɛkɛ nɛ Yesu nitsɛ ba je kpo ngɛ a kpɛti, nɛ e de mɛ ke, "Nyɛ he manye!" 37 A tsui po saminya, ejakaa a susu kaa a na kpade.

38 Se Yesu bi mɛ ke, "Mɛni he je nɛ nyɛ ngɛ gbeye yee? Mɛni he je nɛ e ngɛ nyɛ pee kaa tsa pi ami i ɔ? 39 Nyɛɛ hyɛ ye ninehi kɛ ye nanehi ha. Nɛ nyɛ maa na paa kaa ami tutuutu i. Nyɛ ba ta ye he nɛ nyɛ maa na kaa tsa pi kpade ji mi, ejakaa kpade be Nɔmlɔ tso kaa bɔ nɛ i ngɛ nɛ ɔ." 40 Nɛ e wo e nine ɔmɛ kɛ e nane ɔmɛ ngɔ tsɔɔ mɛ ke a hyɛ plɛɛko pa amɛ a nya ha.

41 Se loloolo ɔ, a yi mi tɛ mɛ ngɛ e he. A bua jɔ a he lɛɛ, se a he we yi. Kɛkɛ nɛ e bi mɛ ke, "Mɛni niye ni ngɛ nyɛ dɛ ngɛ hiɛ ɔ?"

42 Nɛ a ha lɛ lo sasɛɛ ko, 43 nɛ e ye ngɛ a hɛ mi.

44 Kɛkɛ nɛ e de mɛ ke, "Nyɛ kai we kaa benɛ i kɛ nyɛ ngɛ ɔ, i de nyɛ ke, nɔ́ tsuaa nɔ nɛ a ngma ngɛ ye he ngɛ Mose Womi ɔmɛ kɛ gbali ɔmɛ a womi ɔmɛ kɛ La amɛ a mi ɔ maa ba mi lo?" 45 Nɛ e bli a juɛmi nya jehanɛ konɛ a nu Ngmami slɔɔto ɔmɛ a sisi. 46 Nɛ e de mɛ ke, "A ngma blema lokoo kaa Yiwamihelɔ ɔ maa na nɔ́ nɛ e ma gbo se e maa te si ekohu kɛ je gbeje ngɛ ligbi etɛ se. 47 Nɛ ngɛ e biɛ mi ɔ, a maa fiɛ yi wami hemi munyu nɛ ɔ kɛ je Yerusalem kɛ tsɔɔ je ɔ tsuo ke, ‘Nɔ fɛɛ nɔ nɛ maa kpale kɛ ba ye ngɔ ɔ, a maa ngɔ e he yayami ɔmɛ kɛ ke lɛ.’ 48 Nɛ nyɛ na kaa gbami nɛ ɔmɛ ba mi.

49 Kaa bɔ nɛ Tsɛ ɔ wo si ɔ, i ma wo Mumi Klɔuklɔu ɔ blɔ kɛ mane nyɛ. Lɔ ɔ he je ɔ, nyɛɛ mlɛ ngɛ Yerusalem ma a mi kɛ ya si be nɛ Mumi Klɔuklɔu ɔ ma ba wo nyɛ he wami."

50 Kɛkɛ nɛ Yesu sɛ a hlami nɛ a fie e se kɛ ya si a ya su Betania. Lejɛ ɔ nɛ e wo e nine nɔ ngɛ nɛ e gbaa mɛ. 51 Se benɛ e ngɛ mɛ gbaae nɔuu nɛ a wo lɛ kɛ je a ngɔ kɛ ho hiɔwe ya. 52 Nɛ a ja lɛ nɛ a kpale kɛ ho Yerusalem ya kɛ bua jɔmi babauu nitsɛ. 53 Enɛ ɔ se ɔ, a pɔɔ a he nya buami ngɛ Sɔlemi We ɔ nɛ a hii Mawu yi jee.