1 Benɛ Yesu gbe munyu nɛ ɔ tumi nya a, e si Galilea nɛ e lɔgɔ Yordan Pa a kɛ ba je Yudea. 2 Asafo babauu nyɛɛ e se, nɛ e tsa hiɔtsɛ ɔmɛ ngɛ lejɛ ɔ.

3 Nɛ Farisi bi komɛ ba e ngɔ ba ka lɛ hyɛ ha kaa e ma de nɔ ko nɛ a ma nyɛ da nɔ kɛ kpata e hɛ mi lo. A bi lɛ ke, "Anɛ e da blɔ kaa nyumu fieɔ e yo lo?"

4 Yesu he nɔ nɛ e bi mɛ ke, "Anɛ nyɛ kane we Ngmami Klɔuklɔu ɔ lo? A ngma ngɛ mi ke, ngɛ sisije ɔ mi ɔ, Mawu bɔ nyumu kɛ yo. 5 Nɛ e de ke, nyumu ma si e tsɛ kɛ e nyɛ nɛ e maa pɛtɛ e yo he, nɛ mɛ ni enyɔ ɔmɛ a ma plɛ he lo kake. 6 A pi nimli enyɔ hu, se mohu kake. Nɛ nɔ́ nɛ Mawu tsa a, nɔ ko nɛ ko gba mi."

7 A bi lɛ ekohu ke, "Mɛni he je mɔ nɛ Mose wo mlaa ke ke nɔ ko ma kua e yo ɔ, e ha lɛ fiemi womi kɛkɛ e ma nyɛ ngmɛɛ e he ɔ?"

8 Yesu ha mɛ heto ke, "Nyɛ tsui wami he je nɛ Mose ha nyɛ jamɛ a he blɔ kaa nyɛɛ fie nyɛ yi ɔmɛ ngɛ, se tsa pi ja a nɛ Mawu to kɛ je sisije ɔ. 9 Enɛ ɔ he je ɔ, i ngɛ nyɛ dee ke, nyumu tsuaa nyumu, nɛ pi ajuama bɔmi he je nɛ e ma kua e yo ngɛ nɛ e ma ya ngɔ yo kpa a, e bɔ ajuama; nɛ nyumu tsuaa nyumu nɛ ngɔɔ yo nɛ a kua lɛ ɔ, lɛ hu e bɔ ajuama."

10 Yesu kaseli ɔmɛ de lɛ ke, "Ke kikɛ ɔ ji munyu ɔ, lɛɛ e sɛ kaa a ngɔɔ yo mɔ."

11 Yesu he nɔ nɛ e de ke, "Tsa pi nɔ tsuaa nɔ nɛ ma nyɛ tsɔɔmi nɛ ɔ he maa pɛtɛ, ja nihi nɛ Mawu ye kɛ bua mɛ ɔ kɛkɛ. 12 Ejakaa ni komɛ ngɛ nɛ, ngɛ a bɔmi su nya a, a be yo nyɛe maa ngɔ; nɛ ni komɛ hu ngɛ nɛ nimli nɛ pee mɛ ja. Nɛ nihi hu ngɛ nɛ Hiɔwe Matsɛyemi ɔ he je nɛ a ngɔɛ yo ngɛ. Nɔ fɛɛ nɔ nɛ ma nyɛ ɔ, e ngɔ ye munyu ɔ."

13 Nɛ a kɛ jokuɛwi ba Yesu ngɔ konɛ e ngɔ nine ngɔ pue a nɔ nɛ e sɔle ha mɛ. Se e kaseli ɔmɛ gbɛ wo nihi nɛ wo mɛ kɛ ba a ke, "Nyɛ ko de nɔ́ ha lɛ!"

14 Se Yesu de mɛ ke, "Nyɛ ha nɛ jokuɛwi ɔmɛ nɛ a ba ye ngɔ, nɛ nyɛ ko tsi mɛ blɔ, ejakaa nihi nɛ ngɛ kaa ni nɛ ɔmɛ ɔ, a nɔ́ ji Hiɔwe Matsɛyemi ɔ nɛ." 15 Kɛkɛ nɛ e ngɔ e nine ngɔ pue a nɔ nɛ e jɔɔ mɛ loko ji e je lejɛ ɔ.

16 Nɛ nyumu ko ba Yesu ngɔ ba bi lɛ ke, "Tsɔɔlɔ kpakpa, mɛni nɔ́ ma pee nɛ ma na neneene wami?"

17 Yesu de lɛ ke, "Nɛ o tsɛ mi Nɔmlɔ kpakpa a, o ngɛ tsɔɔe kaa Mawu ji mi, ejakaa Mawu pɛ ji nɔ kpakpa. Ke o ngɛ hlae nɛ o sɛ wami mi ɔ, moo ye kita amɛ a nɔ."

18 Nyumu ɔ bi lɛ ke, "Kita amɛ te nɔ́ nɛmɛ nɛɛ?" Yesu he nɔ de lɛ ke, "Koo gbe nɔmlɔ, ko puɛ gba, koo ju, koo ye lakpa odase, 19 moo bu o tsɛ kɛ o nyɛ nɛ o suɔ o nyɛmi nɔmlɔ kaa bɔ nɛ o suɔ mo nitsɛ o he ɔ!"

20 Nɛ niheyo ɔ de lɛ ke, "I ye enɛ ɔmɛ tsuo a nɔ. Mɛni pa piɛ mi?"

21 Yesu de lɛ ke, "Ke o ngɛ hlae nɛ o hi kɛ pi si ɔ, yaa nɛ o ya jua nɔ́ tsuaa nɔ nɛ o ngɛ ɔ, nɛ o ngɔ sika a kɛ ha ohiafohi nɛ o ma na weto ni ngɛ hiɔwe konɛ o ba nɛ o ba nyɛɛ ye se." 22 Se benɛ niheyo ɔ nu munyu nɛ ɔ, e ni pee mɔbɔ nɛ e si lejɛ ɔ, ejakaa e ngɛ níhi babauu.

23 Nɛ Yesu de e kaseli ɔmɛ ke, "Anɔkuale, i ngɛ nyɛ dee ke, e he wa ha niatsɛ kaa e maa sɛ Hiɔwe Matsɛyemi ɔ mi. 24 I ngɛ nyɛ dee ekohu ke, e wɛ ha afukpɔngɔ kaa e maa gu abui puɔ mi kaa bɔ nɛ e wa ha niatsɛ kaa e maa sɛ hiɔwe Matsɛyemi ɔ mi ɔ."

25 Benɛ e kaseli ɔmɛ nu munyu nɛ ɔ, e pee mɛ yaa nɛ a bi lɛ ke, "Lɛɛ mɛnɔ kulaa yi wami a ma he mɔ?"

26 Yesu hyɛ mɛ dii nɛ e de mɛ ke, "Ngɛ nɔmlɔ blɔ fa mi ɔ, a be enɛ ɔ nyɛe maa pee, se ngɛ Mawu blɔ fa mi ɔ, a ma nyɛ nɔ́ tsuaa nɔ maa pee."

27 Kɛkɛ nɛ Petro bi lɛ ke, "Wɔɔ lɛɛ wa si nɔ́ fɛɛ nɔ nɛ wa ba ngɛ o se nyɛɛe, mɛni se wa ma na mɔ?"

28 Yesu he nɔ nɛ e de lɛ ke, "Anɔkuale nɛ i ngɛ nyɛ dee ke, benɛ Nɔmlɔ Bi ɔ ma ya hi e anunyami sɛ ɔ nɔ ngɛ Hiɔwe Matsɛyemi ɔ mi ɔ, nyɛ e se nyɛɛli ɔmɛ hu nyɛ maa hi sɛ nyɔngma kɛ enyɔ nɔ, nɛ nyɛ maa kojo Israel wɛtso nyɔngma kɛ enyɔ ɔmɛ. 29 Nɛ nɔ tsuaa nɔ nɛ si e we loo nyɛmimɛ nyumuhi loo nyɛmimɛ yihi loo tsɛ loo nyɛ loo e yo loo bimɛ loo weto ni ngɛ ye he ɔ, a maa ma nane mi ha lɛ ngwɔhe lafa, nɛ e ma na neneene wami. 30 Nɛ nihi nɛ mɛ ji kekle bimɛ po ɔ, a maa pee se kpɛli, nɛ sekpɛ bi ɔmɛ ma plɛ kekle bimɛ."