1 Benɛ e piɛ bɔɔ nɛ Yesu kɛ e kaseli ɔmɛ maa su Yerusalem ngɛ Betfage kɔpe ko nɛ ngɛ Nuyoku ɔ he ɔ, e tsɔ e kaseli ɔmɛ a ti ni enyɔ kɛ se hlami.

2 Nɛ e de mɛ ke, "Ke nyɛ sɛ kɔpe ɔ mi nɔuu ɔ, nyɛ maa na teji ko nɛ a muɔ lɛ si kɛ e bi. Nyɛɛ pine mɛ kɛ ba ha mi ngɛ hiɛ ɔ. 3 Nɛ ke nɔ ko bi nyɛ sane ko ɔ, nyɛ de lɛ ke, ‘A he ngɛ Nutsɔ ɔ hiae,’ nɛ sane ko be bae."

4 Enɛ ɔ ba mi kaa bɔ nɛ gbalɔ ɔ de ɔ ke, 5 "Nyɛ de Zion biyo ɔ ke, o nɛ, o Matsɛ ɔ ma o ngɔ. E he jɔ nɛ e hi teji bi nɔ."

6 Nɛ kaseli enyɔ ɔmɛ ho nɛ a ya pee bɔ nɛ Yesu de mɛ ɔ; 7 nɛ a kɛ teji ɔ kɛ e bi ɔ ba nɛ a ngɔ a tade ɔmɛ kɛ pue e nɔ nɛ Yesu kuɔ hi nɔ. 8 Nɛ nihi fuu ngmɛ a tadehi ngɛ blɔ ɔ nɔ, nɛ a ti ni komɛ hu kplɔ bahi ngɔ pue blɔ ɔ nɔ kɛ nyɛɛ e hɛ mi.

9 Nɛ nihi nɛ sɛ e hlami kɛ nihi nɛ nyɛɛ e se ɔ tsuo ngɛ ngmlaa kpae ke, "Mawu nɛ gbaa Matsɛ David Bi ɔ! A gbaa nɔ nɛ ma ngɛ Nutsɔ ɔ biɛ mi ɔ! Yi jemi ha Mawu ngɛ Hiɔwe lokoo!"

10 Benɛ e sɛ Yerusalem ɔ, ma a tsuo bu hoo nɛ a ngɛ bie ke, "Mɛnɔ ji nɛ ɔ?"

11 Kɛkɛ nɛ asafo ɔ ha heto ke, "Nɔ nɛ ɔ ji Yesu, Gbalɔ nɛ je Nazaret ngɛ Galilea a!" 12 Yesu ya sɛ Sɔlemi We ɔ, nɛ e ya fie jua yeli kɛ nihi nɛ ngɛ ni hee ngɛ Sɔlemi We ɔ, nɛ e kpa sika tsakeli ɔmɛ a gba amɛ kɛ bu si.

13 Nɛ e de mɛ ke, "A ngma ke, ‘A ma tsɛ ye we ɔ Sɔlemi We’, se nyɛɛ lɛɛ nyɛ kɛ pee ojo fiali a hi he."

14 Nɛ nihi nɛ a hɛ ngmɛ yu kɛ nihi nɛ a kplɔ ɔ ba e ngɔ ngɛ Sɔlemi We ɔ, nɛ e tsa mɛ. 15 Se benɛ osɔfo nikɔtɔma amɛ kɛ mlaa tsɔɔli ɔmɛ na nyakpɛ ni ɔmɛ nɛ e tsu, kɛ bɔ nɛ jokuɛwi ɔmɛ ngɛ ngmlaa kpae ngɛ Sɔlemi We ɔ ke, "Mawu nɛ gbaa David Bi ɔ," a mi mi fu nɛ a bi lɛ ke, "Anɛ o ngɛ nɔ́ nɛ bimwɔwi nɛ ɔmɛ ngɛ dee ɔ nue lo?"

16 Yesu he nɔ ke, "Ee! Anɛ nyɛ kane we Ngmami ɔ hyɛ lo? Ejakaa Ngmami ɔ de ke, ‘Bimwɔwi tete ma je e yi!’ "

17 Kɛkɛ nɛ e si mɛ nɛ e je ma a mi kɛ ho Betania ya nɛ e ya hwɔ lejɛ ɔ.

18 E nɔ jena mɔtu benɛ e kpale e se kɛ yaa Yerusalem ɔ , hwɔ bɔni lɛ yemi, 19 nɛ e na tso ko nɛ ngɛ kaa mangoo tso ɔ ngɛ blɔ ɔ he nɛ e gba lejɛ ɔ. Se e ya nɛ yiblii ko ngɛ nɔ pe bahi sɔuu. Kɛkɛ nɛ e de tso ɔ ke, "Kɛ je be nɛ ɔ kɛ yaa a, o be yiblii ko woe gbleegbleegblee hu!" Nɛ tso ɔ ngla amlɔ ɔ nɔuu.

20 Benɛ e kaseli ɔmɛ na enɛ ɔ, a nya kpɛ a he nɛ a bi ke, "Kɛ pee kɛɛ nɛ tso ɔ ngla amlɔ kikɛ ɔ?"

21 Yesu he nɔ nɛ e de mɛ ke, "Anɔkuale, ke nyɛ ngɛ hemi kɛ yemi nɛ nyɛ ji nguane ɔ, nyɛ ma nyɛ pee níhi kaa kikɛ ɔ kɛ níhi nɛ pe enɛ ɔ. Nyɛ ma nyɛ de Nuyoku nɛ ɔ tete ke, ‘Hiaa nɛ o ya nɔ wo mi’, nɛ e maa hia. 22 Nɛ nɔ́ tsuaa nɔ nɛ nyɛ maa sɔle nɛ nyɛ ma kpa he pɛɛ ɔ, nyɛ nine maa su nɔ ke nyɛ he ye."

23 Benɛ Yesu kpale kɛ ho Sɔlemi We ɔ ya nɛ e ya ngɛ ni tsɔɔe ɔ, osɔfo nikɔtɔma amɛ kɛ ma a mi nikɔtɔma amɛ ba e ngɔ nɛ a ba bi lɛ ke, "Mɛni he blɔ nɛ o ngɛ nɛ o peeɔ kikɛmɛ a ni nɛ ɔmɛ, nɛ mɛnɔ ha mo he blɔ nɛ ɔ?"

24 Yesu he nɔ nɛ e de mɛ ke, "Ami hu ma bi nyɛ munyu ko, nɛ ke nyɛ ha mi heto ɔ, loko ji ami hu ma tsɔɔ nyɛ he blɔ nɛ i ngɛ he je nɛ i peeɔ kikɛmɛ a ni nɛ ɔmɛ. 25 Yohane Baptisilɔ ɔ, jije e je? Mawu ngɔ e je aloo nimli a kpɛti e je?" A susu he ngɛ a kpɛti nɛ a bi a he ke, "Ke wa de ke e je Mawu ngɔ ɔ, e ma bi wɔ ke, lɛɛ mɛni he je wa he we Yohane yi mɔ? 26 Nɛ ke wa ke e je nimli a kpɛti ɔ, lɔ ɔ hu asafo ɔ maa pee wɔ basabasa, ejakaa nihi fuu buu Yohane gbalɔ." 27 Kɛkɛ nɛ a ha Yesu heto ke, "Wa li!" Nɛ Yesu hu de mɛ ke, "Lɛɛ ami hu i be nyɛ nyɛ sane ɔ heto hae.

28 Se jehanɛ ɔ, kɛ nyɛ susu enɛ ɔ he kɛɛ? Nyumu ko ngɛ bimɛ nyumuwi enyɔ, nɛ e ya nɔkɔtɔma a ngɔ nɛ e ya de lɛ ke, ‘Ye bi, yaa tsu ni mwɔnɛ ɔ ha mi ngɛ ye ngmɔ ɔ mi.’ 29 Nɛ e he nɔ ke, ‘I be yae.’ Se pee se ɔ, e tsake e juɛmi nɛ e ya. 30 Nɛ tsɛ ɔ ya jokuɛ ɔ hu ngɔ, nɛ e de lɛ ja a nɔuu. Se lɛɛ e he nɔ ke, ‘Yoo, ye tsɛ, i ma ya.’ Se e yɛ. 31 Bimɛ enyɔ nɛ ɔmɛ a kpɛti mɛnɔ nɛ pee a tsɛ ɔ suɔmi nya ni?" A ha heto ke, "Nɔkɔtɔma a i." Nɛ Yesu de mɛ ke, "Anɔkuale, i ngɛ nyɛ dee ke, nimli yayamihi kɛ ajuama bɔli maa sɛ nyɛ hlami kɛ ya Hiɔwe Matsɛyemi ɔ mi. 32 Ejakaa Yohane Baptisilɔ ɔ ba nyɛ ngɔ ngɛ dami blɔ nɔ konɛ nyɛ tsake nyɛ tsui nɛ nyɛɛ ngɔ nyɛ he kɛ ha Mawu se nyɛ he we lɛ yi, se jua tsuli ɔmɛ kɛ ajuama bɔli ɔmɛ he lɛ ye. Nɛ benɛ nyɛ na le hu ɔ, nyɛ tsakee we nyɛ tsui, lɔ ɔ he je ɔ nyɛ he we lɛ nɛ nyɛɛ ye." 33 Jehanɛ ɔ Yesu de mɛ ke, "Nyɛɛ bu abɛ kpa ko hu tue. Be ko ɔ, zugbatsɛ ko pee wai ngmɔ nɛ e po abɔɔ godoo kɛ wo he. E tsua muɔ ngɛ mi, nɛ e ma tsu ngɛ mi, nɛ e kɛ ha ni tsuli kaa a tsu he ni nɛ e kɛ mɛ nɛ gba, kɛkɛ nɛ e hia blɔ kɛ ho ma kpa nɔ ya.

34 Benɛ ni kpami be ɔ su ɔ, e tsɔ e tsɔli kɛ ya ngmɔ huli ɔmɛ a ngɔ konɛ a ya ngɔ e blɔ fa mi yiblii nɛ ji ni nɛ a kpa a kɛ ba ha lɛ. 35 Se huli ɔmɛ nu e tsɔli ɔmɛ, nɛ a fiaa nɔ kake kpa, nɛ a gbe nɔ kake, nɛ a fiaa nɔ kake hu tɛ.

36 Jehanɛ ɔ, e tsɔ tsɔli kpahi nɛ hiɛ pe kekle bi ɔmɛ, se a pee mɛ hu ja a nɔuu. 37 Enɛ ɔ tsuo se ɔ, e tsɔ e bi kɛ ya a ngɔ kaa lɛɛ a ma gbo lɛ zo lo.

38 Se benɛ huli ɔmɛ na e bi ɔ mohu ɔ, nɔ́ nɛ a de ji, ‘Ni yelɔ ɔ nɛ ma a nɛ, nyɛɛ ba nɛ waa gbe lɛ konɛ e ni ɔ nɛ pee wa nɔ́.’ 39 Nɛ a nu lɛ nɛ a tsitsiɛ e kuɛ se mi kɛ je kpo ngɛ ngmɔ ɔ mi nɛ a ya gbe lɛ.

40 Jehanɛ ɔ ke ngmɔtsɛ ɔ ba a, mɛni nyɛ susu kaa e maa pee huli nɛ ɔmɛ?"

41 Yuda nikɔtɔma amɛ de lɛ ke, "E ma kpata kikɛmɛ a nimli yayami nɛ ɔmɛ a hɛ mi butuu, nɛ e maa ngɔ e wai ngmɔ ɔ kɛ ha huli kpahi nɛ ma ha lɛ ni nɛ a kpa a e blɔ fa mi nɔ́ ngɛ be nɛ sa mi."

42 Kɛkɛ nɛ Yesu bi mɛ ke, "Anɛ nyɛ kane we gblee ngɛ Ngmami ɔmɛ a mi kaa, ‘Tɛ ɔ nɛ tsu fiali ɔmɛ sake kɛ fɔ he ɔ, lɛ nɔuu nɛ e ba plɛ kɔ nya tɛ. Nutsɔ ɔ ni tsumi ji nɛ ɔ nɛ, nɛ e ngɛ nyakpɛ ngɛ wa hɛ mi.’

43 Nɔ́ nɛ i ngɛ tsɔɔe ji kaa a ma kpɔ Mawu Matsɛyemi ɔ ngɛ nyɛ dɛ nɛ a maa ngɔ kɛ ha nihi nɛ maa wo yiblii nɛ a ngɛ hlae ɔ. 44 Nɛ nɔ tsuaa nɔ nɛ maa ma kikɛmɛ a tɛ nɛ ɔ nɔ ɔ, e maa ku dugudugu, nɛ nɔ nɛ nɔ nɛ tɛ ɔ maa nɔ ɔ, lɛɛ e maa wɛɛ lɛ kaa mamu."

45 Benɛ osɔfo nikɔtɔma amɛ kɛ Farisi bi ɔmɛ kɔ se kaa a he munyu e ngɛ tue ngɛ abɛ ɔ mi ɔ, 46 a hla kaa a maa nu lɛ nɛ a gbe lɛ, se a ya ye asafo ɔ gbeye, ejakaa a buu Yesu gbalɔ.