1 Benɛ je na a, osɔfo nikɔtɔma amɛ kɛ ma mi nikɔtɔma amɛ kpe yi ekohu nɛ a susu bɔ nɛ a maa pee kɛ gbe Yesu he. 2 Nɛ a wo lɛ kɔsɔkɔsɔ nɛ a kpaka lɛ kɛ ho Pilato nɛ ji Roma amlaalo ɔ ngɔ ya.

3 Jamɛ a be ɔ mi, benɛ Yuda, nɔ nɛ tsɔɔ Yesu se blɔ ɔ na kaa a bu lɛ gbenɔ fɔ ɔ, e juɛmi plɛ nɛ e pia e he, nɛ e kpale sika a ya ha osɔfo nikɔtɔma amɛ kɛ ma mi nikɔtɔma amɛ ekohu.

4 Nɛ e de mɛ ke, "I pee yayami, ejakaa i tsɔɔ Nɔmlɔ nɛ yayami ko be e he ɔ se blɔ." Se mɛ hu a de lɛ ke, "Enɛ ɔ pi wa kɔmɔ, mo nitsɛ o sane i."

5 Kɛkɛ nɛ e sake sika a ngɔ pue si ngɛ Sɔlemi We ɔ nɛ e je kɛ ho nɛ e ya wo e kuɛ kpa. 6 Osɔfo nikɔtɔma amɛ kukuɔ sika a nɛ a de ke, "E sɛ ngɛ wa mlaa a nya kaa waa kɛ sika nɛ ɔ nɛ piɛ onia sika a he, ejakaa muɔ sika i."

7 A susu he hluu nɛ nyagbe mi ɔ, a ma nya si kaa a ma wo kɛ he buɛ puɛlɔ ɔ abɔɔ ɔ nɛ a pu nibwɔhi nɛ ma gbo ngɛ Yerusalem ɔ ngɛ lejɛ ɔ. 8 Enɛ ɔ he je nɛ a tsɛɛ jamɛ a abɔɔ ɔ ke, "Muɔ Abɔɔ" kɛ ba si mwɔnɛ ɔ nɛ.

9 Enɛ ɔ ha Gbalɔ Yeremia munyu ɔ ba mi ke, "Nɛ a ngɔ sika hiɔ yi nyingmi etɛ ɔ nɛ ji e yi jua nɛ Israel bi ɔmɛ wo ɔ, 10 nɛ a kɛ ya he buɛ puɛlɔ ɔ abɔɔ ɔ kaa bɔ nɛ Nutsɔ ɔ fa mi ɔ."

11 Jamɛ a be ɔ mi ɔ, Yesu daa si ngɛ Pilato nɛ ji Roma amlaalo ɔ hɛ mi, nɛ amlaalo ɔ bi lɛ ke, "Anɛ mo ji Yuda bi ɔmɛ a matsɛ ɔ lo?" Nɛ Yesu de lɛ ke, "Ee, bɔ nɛ ɔ de ɔ, ja i."

12 Se benɛ osɔfo nikɔtɔma amɛ kɛ ma mi nikɔtɔma amɛ ngɛ e nya poe ɔ, e pɛ e nya mi.

13 Enɛ ɔ he je ɔ, Pilato bi lɛ ke, "Anɛ o nui munyu ɔ nɛ a ngɛ tue kɛ ngɛ mo sie ɔ lo?"

14 Se Yesu de we nɔ ko kulaa, nɛ amlaalo ɔ nya kpɛ e he.

15 Jamɛ a be ɔ mi ɔ, ke e su Hebemi Nyami Ligbi ɔ, amlaalo ɔ ngmɛɛɔ Yuda bi nɛ a wo mɛ tsu mi ɔ a ti nɔ kake nɛ ma a ngɛ hlae ɔ he ngɔ haa mɛ. 16 Se jamɛ a jeha a, a ngɛ awi yelɔ kpanaku ko nɛ a tsɛɛ lɛ ke Baraba. 17 Benɛ asafo ɔ bua e he nya ngɛ Pilato hɛ mi ɔ, e bi mɛ ke, "Mɛnɔ he nyɛ suɔ kaa ma ngmɛɛ ha nyɛ, Baraba loo Yesu nɛ a tsɛɛ lɛ Kristo ɔ?" 18 Ejakaa e le klɛdɛɛ kaa ninyɛ he nɛ a nu Yesu ngɛ, akɛnɛ e biɛ he si nɛ nihi babauu le lɛ ɔ.

19 Se benɛ Pilato hii si ngɛ kojomi he ɔ, e yo tsɔ kɛ ba e ngɔ ba de lɛ ke, "Moo ngmɛɛ jamɛ a dalɔ ɔ he kpoo, ejakaa i nla nlami gbeyegbeye ko ngɛ e he nyɔ nɛ ɔ mi."

20 Se osɔfo nikɔtɔma amɛ kɛ ma mi nikɔtɔma amɛ wo ni ɔmɛ ga kaa a bi nɛ a ngmɛɛ Baraba mohu he, nɛ a gbe Yesu. 21 Lɔ ɔ he je ɔ, benɛ amlaalo ɔ bi ni ɔmɛ ekohu ke, "Ni enyɔ ɔmɛ a ti mɛnɔ he nyɛ suɔ kaa ma ngmɛɛ ha nyɛ ɔ?" A he nɔ kɛ ngmlaa ke, "Baraba!"

22 Pilato bi mɛ ke, "Lɛɛ mɛni ma pee Yesu nɛ a tsɛɛ lɛ Kristo ɔ?" Nɛ a he nɔ ke, "Moo sɛu lɛ!"

23 Pilato bi mɛ ke, "Mɛni yayami nɛ e pee?" Se enɛ ɔ mohu ha nɛ a kpa ngmlaa bloblooblo pe kekle ɔ ke, "Moo sɛu lɛ! Moo sɛu lɛ!"

24 Benɛ Pilato na kaa e nyɛ we he nɔ́ ko nɛ e pee, nɛ gidigidi mohu ngɛ hlae nɛ e te si ɔ, e bi nɛ a ha lɛ nyu nɛ e fɔ e dɛ ngɛ ni ɔmɛ a hɛ mi, nɛ e de ke, "Ami lɛɛ i li dalɔ nɛ ɔ muɔ he nɔ́ ko; nyɛ nitsɛmɛ nyɛ sane i!"

25 Nɛ ni ɔmɛ tsuo he nɔ kɛ ngmlaa ke, "E muɔ nɛ ba wɔ kɛ wa bimɛ a nɔ!"

26 Kɛkɛ nɛ Pilato ngmɛɛ Baraba he ngɔ ha mɛ. Nɛ benɛ e ha a fiaa Yesu kpa se ɔ, e ngɔ lɛ kɛ ha Roma soja amɛ ke a ya sɛu lɛ. 27 Kekle ɔ, a kpaka Yesu kɛ ho kojomi he ɔ ya, nɛ a ya bua soja amɛ a kuu ɔ tsuo nya kɛ ba e he. 28 A je e he tade ɔmɛ, nɛ a ngɔ tade tsutsu klɔii kɛ wo lɛ. 29 A pee mio pɛɛ ngɔ bu lɛ, nɛ a ngɔ matsɛ tso kɛ ha lɛ nɛ e hɛɛ ngɛ e hiɔ nine mi. A kpla si ngɛ e hɛ mi, nɛ a ye e he fɛu ke, "Wa nga mo oo, Yuda bi ɔmɛ a matsɛ!" 30 A la lada ngɔ pue e nɔ, nɛ a he tso ɔ ngɛ e dɛ nɛ a kɛ fia e yi kpɛti.

31 Benɛ a ye e he fɛu ta a, a je tade wuyaa a ngɛ e he, nɛ a wo lɛ nitsɛ e tade ɔ ngɔ wo lɛ ekohu nɛ a kpaka lɛ kɛ ho konɛ a ya sɛu lɛ. 32 Benɛ a yaa a, a kɛ nyumu ko nɛ je Kirene nɛ a tsɛɛ lɛ ke Simon ɔ ya kpe nɛ a nyɛ e nɔ ke e tloo Yesu sɛumi tso ɔ. 33 A ya su he ko nɛ a tsɛɛ ke Golgata nɛ ji "Yikokonohe" ɔ, 34 nɛ soja amɛ ngɔ wai nɛ a kɛ tsopa futu mi ngɔ ha lɛ ke e nu, se benɛ e sa e nya hyɛ ha a, e kua numi.

35 Nɛ benɛ a sɛu lɛ ɔ, soja amɛ fɔ sɔ ngɛ e tade ɔmɛ a nɔ nɛ a dla mɛ ngɔ ha a he. 36 Nɛ a hi si kɛ bɔle lɛ konɛ a bu e he. 37 A ngma sane nɛ a kɛ po e nya a kɛ pɛtɛ e yi mi ke, "Yesu, Yuda bi ɔmɛ a matsɛ ɔ ji nɛ ɔ nɛ."

38 Jamɛ a ligbi ɔ mɔtu ɔ, a sɛu ojo fiali enyɔ ngɔ piɛ e he, nɔ kake ngɛ e hiɔ nine nɔ, nɛ nɔ kake hu ngɛ e muɔ nine nɔ. 39 Nɛ nihi nɛ ngɛ bee ɔ jɛ lɛ, nɛ a huanya a yi, 40 nɛ a de ke, "Mo nɛ o huleɔ Sɔlemi Tsu nɛ o kpaleɔ maa lɛ ligbi etɛ ɔ ji nɛ ɔ? Ke Mawu Bi ji mo tutuutu ɔ, mo kple si ngɛ sɛumi tso ɔ nɔ nɛ o he mo nitsɛ o yi wami."

41 Ja a nɔuu nɛ osɔfo nikɔtɔma amɛ kɛ mlaa tsɔɔli ɔmɛ kɛ ma mi nikɔtɔma amɛ ye e he fɛu nɛ a de ke, 42 "Ni kpahi a yi wami e heɔ se e nyɛ we lɛ nitsɛ e nɔ ɔ nɛ e he. Ke Israel matsɛ ji mo ɔ, lɛɛ mo kple si kɛ je sɛumi tso ɔ nɔ koo, nɛ wa ma he mo maa ye. 43 E ke e hɛ ngɛ Mawu nɔ, ha nɛ Mawu nɛ je lɛ ke e ngɛ e he suɔmi ɔ. Anɛ pi lɛ nɛ e de ke, ‘Mawu Bi ji mi’ ɔ?"

44 Ja a nɔuu kɛ nɛ ojo fiali ɔmɛ nɛ a sɛu kɛ piɛ e he ɔ hu ye e he fɛu.

45 Ngɛ piani mi ɔ, kɛ je ngmlɛ nyɔngma kɛ enyɔ kɛ ba si ngmlɛ etɛ ɔ, diblii wo ngɛ zugba a nɔ kulaa. 46 Se maa pee gbɔkuɛ ngmlɛ etɛ mi ɔ, Yesu kpa ngmlaa wawɛɛ ke, "Eli, Eli, lama Sabaktani?" E sisi ji; "Ye Mawu, ye Mawu, mɛni he je nɛ o kua mi?"

47 Benɛ nihi nɛ daa si ngɛ lejɛ ɔ a ti nihi nu ɔ, a de ke, "Elia nɛ e ngɛ tsɛɛ ɔ nɛ." 48 Kɛkɛ nɛ a ti nɔ kake sa fo nɛ e ya ngɔ kutsa nɛ e kɛ tsɔ wai nɛ duɔ mi, nɛ e ngɔ ma tso nya nɛ e kɛ mane lɛ ke e nu. 49 Se nihi nɛ piɛ ɔ de lɛ ke, "Ngmɛɛ e he. Ha waa hyɛ ha kaa Elia maa ba ba je lɛ lo?"

50 Kɛkɛ nɛ Yesu kpa ngmlaa wawɛɛ ekohu nɛ e ma e nya. 51 Nɛ hyɛ, Sɔlemi Tsu ɔ mi pomi bo ɔ mi gba enyɔ kɛ je hiɔwe kɛ ba ma si, nɛ zugba hoso, nɛ tɛ sahi a mi gba, 52 nɛ yɔkɔhi a nya bli nɛ klɔuklɔu bihi nɛ gbo ɔmɛ fuu te si kɛ je gbeje. 53 Nɛ benɛ Yesu te si se ɔ, a je kpo kɛ je a muɔ ɔmɛ a mi kɛ ho Yerusalem ya nɛ a ya je a he kpo kɛ tsɔɔ nihi fuu ngɛ lejɛ ɔ.

54 Se benɛ soja amɛ kɛ a nyatsɛ ɔ nɛ ngɛ e he bue ɔ na zugba hosomi ɔ kɛ níhi tsuo nɛ ba a, a ye gbeye wawɛɛ nɛ a de ke, "Niinɛ, Mawu Bi ji nɛ ɔ nɛ."

55 Yihi fuu nɛ nyɛɛ Yesu se kɛ je Galilea nɛ a ba hyɛ lɛ ɔ da si ngɛ se lokoo. 56 A ti ni komɛ ji Maria Magdalena kɛ Maria nɛ ji Yakobo kɛ Yosef nyɛ ɔ kɛ Zebedeo bimɛ ɔmɛ, Yakobo kɛ Yohane a nyɛ ɔ.

57 Benɛ e su gbɔkuɛ he ɔ, niatsɛ ko nɛ je Arimatia nɛ a tsɛɛ lɛ ke Yosef, nɛ ji Yesu kaseli ɔmɛ a ti nɔ kake ɔ, 58 ya Pilato ngɔ nɛ e ya bi lɛ kaa e ngmɛɛ Yesu gbogboe ɔ he ha lɛ. Nɛ Pilato fa ke a ngɔ gbogboe ɔ kɛ ha lɛ. 59 Yosef ngɔ gbogboe ɔ, nɛ e wo bo nɛ he tsɔ falefale kɛ blaa lɛ. 60 E kɛ lɛ ya fɔ lɛ nitsɛ e yɔkɔ nɛ a kpɛ ngɛ tɛ sa mi ɔ mi, nɛ e kpɛne tɛ agbo ko kɛ tsi nya nɛ e je. 61 Nɛ Maria Magdalena kɛ Maria kaketsɛ ɔ hii si ngɛ lejɛ ɔ ngɛ hyɛe.

62 He dlami kɛ tomi e nɔ jena a, osɔfo nikɔtɔma amɛ kɛ Farisi bi ɔmɛ ho ya na Pilato, 63 nɛ a de lɛ ke, "Nutsɔ, wa kai kaa benɛ jamɛ a lakpatsɛ ɔ ngɛ je mi ɔ, e de ke, ‘Ligbi nɛ ji etɛ ɔ, ma te si ekohu.’ 64 Enɛ ɔ he je ɔ, wa ngɛ bie nɛ o fa nɛ a ya sɔu yɔkɔ ɔ nya saminya kɛ ya si ligbi etɛ ɔ, ke pi ja a, e kaseli ɔmɛ ma ya ju lɛ kɛ je nɛ a ma ya de nɔ fɛɛ nɔ ke e te si kɛ je gbeje. Ke e ba mi ja a, sekpɛ sisimi ɔ nya maa wa pe kekle nɔ́ ɔ."

65 Nɛ Pilato de mɛ ke, "Nyɛ ha nyɛ nitsɛmɛ nyɛ Sɔlemi We ɔ soja amɛ nɛ a ya bu bɔ nɛ a ma nyɛ."

66 A ya sɔu yɔkɔ ɔ nya nɛ a ha soja amɛ ya ngɛ he bue.