1 Tsaatsɛ Mawu Ope ɔ, Neneene Tsɛ ɔ, tsɛ adesahi kulaa kɛ je pu site he kɛ pu sinɔ he. 2 Mawu anunyami la a kpɛɛ kɛ jee Sɔlemi We nɛ hi kɛ pi si ɔ, nɛ ngɛ Zion Yoku ɔ nɔ ɔ. 3 E baa kɛ hiɔwe simi, la glegleegle bɔle e he; nɛ kɔɔhiɔ nɛ nya wa ngɛ fiae kɛ ngɛ lɛ bɔlee. 4 E ba nɛ e ba kojo e ni ɔmɛ. E de hiɔwe kɛ zugba kɛ ngmlaa ke, 5 "Nyɛ bua ye nimli ɔmɛ a nya, nihi nɛ sã bɔ ngɛ ye afɔle sami la tɛ ɔ nɔ nɛ a kɛ mi so kaa a maa bu mi tue ɔ." 6 Mawu maa kojo mɛ kɛ anɔkuale kojomi, ejakaa hiɔwe kulaa yeɔ he odase kaa dalɔ ji lɛ.

7 "Oo ye bimɛ, nyɛɛ bu mi tue! Ejakaa ami ji nyɛ Mawu. Nyɛɛ bu mi tue! Nyɛ nya nɛ i ngɛ poe ji nɛ ɔ nɛ. 8 I be sane ko ngɛ bɔ sami níhi nɛ nyɛ kɛ ba ye bɔ sami la tɛ ɔ nɔ ɔ he, ejakaa nyɛɛ kɛ baa be fɛɛ be. 9 Se tsa pi na kuhi kɛ apletsihi nɛ a ma kɛ sã bɔ ɔ ji nɔ́ titli nɛ i ngɛ hlae ngɛ nyɛ dɛ. 10 Ejakaa nga nɔ kɛ hue mi lohwe ɔmɛ, nahi nɛ ngɛ yokuhi a kpɛ a nɔ kulaa a, ye níhi ji mɛ. 11 Nɛ i le lohwe pɛlitsɛhi nɛ ngɛ yoku ngua amɛ kulaa a nɔ ɔ. 12 Ke hwɔ ngɛ mi yee ɔ, i be nyɛ dee, ejakaa je ɔ tsuo kɛ nɔ́ fɛɛ nɔ nɛ ngɛ mi ɔ ye níhi i. 13 Dabi, nyɛ lo kɛ muɔ nɛ nyɛ kɛ saa bɔ ɔ he hia we mi. 14 Nyɛɛ sa si nami afɔle kɛ ha Mawu, nɛ nyɛɛ ye nyɛ si womi ɔmɛ a nɔ kɛ ha hiɔwe No ɔ. 15 Nɛ nyɛ tsɛ mi ngɛ nyɛ fimi ligbi ɔmɛ a nɔ; ma je nyɛ konɛ nyɛɛ wo ye hɛ mi nyami."

16 Se Mawu de nimli yaya amɛ ke: Nyɛ ko tsi ye mlaa amɛ a nɔ ta hu, nɛ nyɛɛ jɔɔ somi ɔmɛ a he susumi. 17 Ejakaa nyɛ kua ye tsɔsemi ɔ, nɛ nyɛ bui ye mlaa amɛ. 18 Nyɛ naa julɔ nɛ nyɛ yeɔ kɛ buaa lɛ, nɛ nyɛɛ kɛ nimli yayahi kɛ ajuama bɔli bɔɔ. 19 Nyɛ gbiɛɛ nɔ, nyɛ yeɔ lakpa, nɛ nyɛ tuɔ munyu basabasahi. 20 Nyɛ tuɔ nyɛ nyɛmimɛ a he munyu. 21 Nyɛ pee enɛ ɔmɛ kulaa, se nɛ i pui nyɛ nya mi ɔ, e peeɔ nyɛ kaa e hɛwi mi. Se amlɔ nɛ ɔ nyɛ tue gblami be ɔ su, nɛ i ngɛ nyɛ nya poe. 22 Nyɛ nihi kulaa nɛ nyɛ hɛ je imi nyɛ Mawu ɔ nɔ ɔ, enɛ ɔ ji nyɛ nyagbe he blɔ nɛ i ngɛ nyɛ hae, loko i ma kpata nyɛ hɛ mi, nɛ nɔ ko be nɛ maa ye kɛ bua nyɛ.

23 Se anɔkuale yi jemi ji bɔ sami nɛ sa. Nɛ enɛ ɔ ji nɔ nɛ woɔ ye hɛ mi nyami. Nihi nɛ yeɔ ye mlaa amɛ a nɔ ɔ, i ma he a yi wami.