La Amɛ 44

Kpɔmi kɛ nɔ nami mi jemi

1 Oo Neneene Tsɛ, wɔ nitsɛmɛ wa nu, nɛ wa nɛmɛ hu de wɔ nyakpɛ anunyami ni nguahi nɛ o pee blema lokoo ngɛ a be ɔ mi ɔ. 2 Bɔ nɛ o fie wɔ jali ɔmɛ kɛ je zugba nɛ ɔ nɔ nɛ o ngɔ kulaa kɛ ha wɔ, nɛ o ha Israel he si ngɛ e he fɛɛ he ɔ. 3 Tsa pi mɛ nitsɛmɛ a he wami kɛ a nile nya nɛ a ye kunimi ngɛ, se mo o he wami, o suɔmi kɛ mɔbɔ nɛ o na mɛ ɔ he je.

4 Ye Matsɛ kɛ ye Mawu ji mo. Moo wo kunimi yemi si kɛ ha o bi ɔmɛ. 5 Ejakaa o he wami nya, kɛ o biɛ ɔ he je nɛ wa ye wa he nyɛli ɔmɛ a nɔ ngɛ. 6 I wo we ye hɛ kɛ fɔɛ ye ta hwumi ni ɔmɛ a nɔ. A be ye yi wami nyɛe ma he gblee. 7 Mo pɛ o ma nyɛ ha wɔ kunimi yemi ngɛ ni nɛmɛ nɛ nyɛɛ wɔ ɔmɛ a nɔ.

8 Mawu ji ye fiami nɔ́ daa. I be mo si nyɛe ma na bɔ nɛ sa! 9 Se Tsaatsɛ Mawu, be ko mi ɔ, o kua wɔ nɛ wa hɛ mi pue si. O yi kɛ bua we wɔ ngɛ wa ta amɛ a mi. 10 O ha wa he nyɛli ɔmɛ kɛ wɔ hwu ta saminya nɛ a ye wa nɔ. 11 O ha he blɔ nɛ a gbe wɔ kaa a gbee tohi, nɛ a gbɛ wɔ ngɔ fia mahi a nɔ. 12 O jua wɔ adufude, ejakaa wa he be jua ko ngɛ o hɛ mi. 13 Mahi nɛ bɔle wɔ ɔmɛ na nɔ́ nɛ o pee wɔ ɔ nɛ a ye wa he fɛu nɛ a muɔ wɔ. 14 O ha nɛ ma amɛ ye wa he fɛu. Wa he guɛ gbo nɛ a muɔ wɔ. 15 Be fɛɛ be ɔ, ye he nyɛli ɔmɛ ngɛ ye hɛ mi si puee, nɛ zo ngɛ mi pee, 16 ngɛ ye he fɛu yeli kɛ muɔli kɛ nihi nɛ kɛ nɔ́ pɛ ɔ a hɛ mi.

17 Neneene Tsɛ, wa na ni nɛ ɔmɛ tsuo be mi nɛ wa hɛ ji o nɔ, nɛ wa tɔ we waa kɛ mo wa kpɛti somi ɔ nɔ. 18 Wa kpale we ngɛ o se, nɛ tsa pi nɛ wa bui mo nɛ wa yi o mlaa amɛ a nɔ hulɔ. 19 Kaa wa pee ja a, jinɛ wa maa nu wa tue nɛ o gbla ngɛ nga a nɔ ɔ sisi, nɛ o si wɔ kɛ wo diblii mi kɛ ha gbenɔ ɔ. 20 Kaa wa jɔɔ wa Mawu ɔ jami, nɛ wa bɔni wɔhi jami, 21 Anɛ Mawu be lee lo? Ejakaa e le tsui fɛɛ tsui mi laami níhi kulaa. 22 Se tsa pi ja a ji wa sane ɔ. Mo o he nɛ a ngɛ wa hɛ mi kpatae ngɛ, nɛ wa fɔɔ si kaa tohi nɛ a maa gbe.

23 Oo Tsaatsɛ, o he nɛ tsiɛ. Moo te si nɛ o huanya o he. Mɛni he je nɛ o ngɛ mahe hwɔe? Anɛ o ngmɛɛ wa he kulaa lo? 24 Mɛni he je nɛ o ngɛ wɔ laae? Mɛni ba nɛ o je hɛ ngɛ wa haomi kɛ yi kpɛti nɛ a ngɛ wɔ wae ɔ he? 25 Wa hwɔɔ si ngɛ zugba nɛ wa ngɔ wa hɛ mi kɛ bu si. 26 Oo Tsaatsɛ Mawu, moo te si nɛ o ba ye kɛ bua wɔ. Mo kpɔ wɔ ngɛ o suɔmi nɛ se pui ɔ he je.