La Amɛ 83

Israel he nyɛli ɔmɛ

1 Oo Tsaatsɛ Mawu, koo pee dii, ko ma o nya, nɛ koo pee kpoo! Moo bu wɔ tue!

2 Ejakaa o he nyɛli ɔmɛ ngɛ ngmlaa kpae, nɛ nihi nɛ ngɛ mo nyɛe ɔ ngɛ fiae. 3 A ngɛ kpee ngɛ diblii mi kɛ wo o nimli ɔmɛ a he, nɛ a ngɛ nihi nɛ o buu a he ɔ he ga toe. 4 A ngɛ dee ke, "Nyɛɛ ba nɛ wa kpata a ma a hɛ mi, nɛ a ko kai Israel biɛ kulaa hu." 5 A ma yi mi tomi nɛ ɔ nya si, nɛ a pee kake kɛ wo o he. 6 Mɛ ji Edom kɛ Ismael bi, Moab kɛ Hagar bi; 7 Gebal kɛ Amon kɛ Amalek, Filistia kɛ Tiro bi ɔmɛ hulɔ. 8 Asiria hu piɛ a he kaa Lot weku ɔ he pataalɔ.

9 Moo pee mɛ kaa bɔ nɛ o pee Midia kɛ Sisera kɛ Yabin hu ngɛ Kison Pa a nya a. 10 O ye a nɔ kunimi ngɛ Endor, nɛ a gbogboehi sa ngɛ zugba. 11 Moo pee a nimeli ɔmɛ kaa bɔ nɛ o pee Oreb kɛ Zeeb; nɛ o ye a matsɛ ɔmɛ a nɔ kunimi kaa bɔ nɛ o ye Zeba kɛ Zalmuna a nɔ ɔ. 12 Mɛ nɛ a de ke, "Nyɛ ha waa ngɔ Mawu zugba a kɛ pee wa nɔ́."

13 Oo ye Mawu, mo fli mɛ kɛ mane kaa bunyuku; nɛ o ha a te kaa dudusa nɛ kɔɔhiɔ wo. 14 Nɛ kaa bɔ nɛ la nglaa hue, nɛ la lilɛ ɔmɛ nuu yoku ɔmɛ nɛ a tsoo ɔ, 15 moo fie mɛ kɛ o hiɔwe kɔɔhiɔ ɔ, nɛ o wo a he gbeye kɛ o kɔɔhiɔhi nɛ nya wa amɛ. 16 Oo Neneene Mawu, mo ha nɛ zo nɛ gbe mɛ, nɛ o ha a na o he wami ɔ. 17 Ha a juɛmi nɛ futu, nɛ a hao daa. Mo ha nɛ a hɛ mi nɛ pue si nɛ a ye gbeye, 18 kɛ ya si a maa le kaa mo pɛ ji Yehowa, nɛ o kle pe mawuhi tsuo, nɛ mo ji nɔ nɛ ye zugba a kulaa nɔ.