1 Oo ye Mawu, mo kpɔ mi! Nyu ngɛ mi jee! 2 Nyu bɔle mi kɛ kpe nɛ ye yi ngɛ mue. 3 I fo ya hluu nɛ pɔ tɔ ye he, Ye kuɛ si gbli nɛ ye gbi fia. Ye hɛ ngmɛhi fuu ngɛ ya nɛ i fo ɔ he je. I ngɛ ye Mawu ɔ mlɛe nɛ e je mi. 4 Ye he nyɛli ɔmɛ hiɛ fuu. I pee we mɛ nɔ ko se a ngɛ ye se blɔ hlae nɛ a gbe mi. A ngɛ hlae nɛ a gbla ye tue be mi nɛ i pee we nɔ ko.

5 Oo Tsaatsɛ Mawu, o le bɔ nɛ i jee kuasia ha, nɛ o le ye yayami ɔmɛ kulaa. 6 Oo Neneene Tsɛ, mo ko ha nɛ zo nɛ gbe ni nɛmɛ nɛ heɔ o nɔ yeɔ ɔ ngɛ ye he. Oo Israel Mawu, mo ko ha nɛ nihi nɛ ngɛ o se blɔ hlae ɔ a hɛ mi nɛ pue si. 7 Ejakaa o he je ɔ, ye he guɛ gbo nɛ zo gbe mi. 8 Ye nyɛmimɛ tete pee kaa nihi nɛ li mi. 9 Mawu kɛ e We ɔ he hɛ dɔ yi ye nɔ. Akɛnɛ i hɛɛ o ni tsumi ɔ mi he je ɔ, o he nyɛli ɔmɛ jɛɔ mi kaa bɔ nɛ a jɛɔ mo ɔ. 10 A yeɔ ye he fɛu nɛ a muɔɔ mi ke i ngɛ mɔbɔ yee, nɛ i ngɛ ngma hie ngɛ Tsaatsɛ Mawu hɛ mi ɔ. 11 A tuɔ ye he munyu ke i bu mɔbɔ yemi bo ɔ. 12 Ma a tsuo tuɔ ye he munyu, nɛ da deli tete woɔ mi la. 13 Se Neneene Tsɛ, i kamaa we, i yaa nɔ kɛ sɔlemi ɔ. Ejakaa be ɔ su, nɛ o ba o tue si nɛ o maa bu mi tue. O na suɔmi kɛ mi mi jɔmi babauu kɛ ha mi. Jehanɛ ɔ, mo ha ye sɔlemi kɛ pɛɛ kpami ɔ heto nɛ o kpɔ mi kaa bɔ nɛ o wo mi si ɔ. 14 Mo je mi kɛ je haomi nɛ ɔ mi. Ko ha nɛ ye yi nɛ laa. Mo kpɔ mi kɛ je nihi nɛ sume mi ɔ a dɛ mi, nɛ o je mi kɛ je haomi agbo nɛ i ngɛ mi nɛ ɔ mi.

15 Mo ko ha nɛ nyu ɔ nɛ laa ye yi, aloo ma tlɔ wo ɔ mi; mo je mi kɛ je gbenɔ muɔ nɛ ngɛ ye he gbeye woe ɔ mi. 16 Oo Yehowa, mo ha ye sɔlemi kɛ pee kpami ɔ heto, ejakaa o suɔmi kɛ mi mi jɔmi ɔ ngɛ nyakpɛ; nɛ o mɔbɔ nami hiɛ babauu, suɔmi kɛ mi mi jɔmi sɔuu. 17 Mo ko ngɔ o he kɛ laa mi, ejakaa i ngɛ haomi agbo mi. O he nɛ pee oya! Moo ba nɛ o ba je mi. 18 Tsaatsɛ Mawu, moo ba nɛ o ba je mi. Mo kpɔ mi kɛ je ye he nyɛli ɔmɛ kulaa a dɛ mi. 19 O le bɔ nɛ a tuɔ ye he munyu, kɛ bɔ nɛ a gbeɔ ye he guɛ ha. O naa mɛ tsuo nɛ o le nɔ́ nɛ a ti nɔ tsuaa nɔ deɔ.

20 Sumemi nɛ a sume mi ɔ ngɛ ye tsui yee; ye susuma pee vii ngɛ ye mi. Kaa a ti nɔ kake po maa na mi mɔbɔ aloo e maa jɔɔ ye bua a jinɛ e ko hi. 21 Benɛ hwɔ ngɛ mi yee ɔ, a ha mi duɔ ke ma ye, nɛ benɛ kuma ngɛ mi yee wawɛɛ ɔ, a ha mi nyu nɛ a kɛ tsopa wo mi ke ma nu. 22 Mo ha nɛ a niye ni nɛ plɛ la zu, nɛ a bua jɔmi se nɛ po. 23 Mo ha nɛ diblii nɛ wo mɛ, a hɛ nɛ yu, nɛ a ku pue si. 24 O muklii mi nɛ fu mɛ; nɛ o ha o mi mi fumi nɛ nya wa a nɛ kpata a hɛ mi. 25 Mo ha nɛ a we ɔmɛ a mi nɛ je gu nɛ a pee we dokuhi. 26 Ejakaa a ngɛ nɔ nɛ o fia lɛ nɔ́ kɛ fɔ si ɔ yi mi wae. Nɛ a ngɛ nɔ nɛ o gbɔ lɛ nɔ́ ɔ pa a he fɛu yee. 27 Mo bua a yayami ɔmɛ a nya nɛ o hɛ nɛ ko je a nɔ. 28 Moo gbe nimli nɛ ɔmɛ kɛ je nimli nɛ ngɛ je mi ɔ a kpɛti. Ko ha nɛ a na bua jɔmi nɛ dali ɔmɛ naa ngɛ a si himi mi ɔ eko.

29 Se, oo Tsaatsɛ Mawu, mo kpɔ mi kɛ je ohia kɛ hiɔ dɛ mi. 30 Kɛkɛ ɔ, i ma la kɛ je Mawu yi. Ye sina maa pee e yi jemi. 31 Lɔ ɔ maa jɔ e bua pe na ku nɛ i ma kɛ sã bɔ ha lɛ. 32 He si bali ɔmɛ maa na kaa a Mawu ɔ ngɛ a se. Nɛ e be nyakpɛ kaa a bua maa jɔ a he babauu. Nɔ fɛɛ nɔ nɛ hla Mawu se blɔ ɔ maa hi si ngɛ bua jɔmi mi. 33 Ejakaa Yehowa buu e ni ɔmɛ nɛ ngɛ fimi mi ɔ a ngmlaa kpami tue, nɛ e kplɛɛ we a he nɔ́ kulaa.

34 A je e yi, hiɔwe kɛ zugba kulaa! A je e yi, wo ɔmɛ kɛ nɔ́ fɛɛ nɔ nɛ ngɛ a mi ɔ. 35 Ejakaa Mawu ma he Yerusalem yi wami; nɛ e maa ma Yuda ma amɛ ekohu. E nimli ɔmɛ maa hi a mi nɛ a be kpɔe ngɛ a dɛ. 36 A bimɛ maa ye zugba a nɔ; nɛ nɔ fɛɛ nɔ nɛ suɔ e biɛ ɔ, e maa hi lejɛ ɔ, nɛ e yi ma na wami.