1 Oo Tsaatsɛ Mawu, moo bu ye pɛɛ kpami ɔ tue; mo ko wo o hɛ mi kɛ laa ngɛ ye ni bimi ɔmɛ a he. 2 Moo bu mi tue, Tsaatsɛ Mawu, ejakaa ye haomi ɔmɛ ha nɛ i ngɛ kɔmɔ yee nɛ i ngɛ ya foe.

3 Ye he nyɛli ɔmɛ bɔle mi kɛ ngɛ ye he gbeye woe kaa a maa gbe mi. A teɔ si kɛ woɔ mi ngɛ mi mi fumi mi. 4 Ye tsui ngɛ mi yee nɛ gbenɔ fiɛ nu mi. 5 Gbeye kɛ sawale nu mi nɛ i pee sislii. 6 Oo, i na nɛ i ngɛ pɛli kaa bleku lahuɛ, jinɛ i ko te kɛ ho lokoo ma je ya nɛ i ya jɔɔ ye he. 7 Jinɛ i ma ho nga nɔ tsitsaa he ko ya nɛ ma ya hi lejɛ ɔ. 8 I ko ma haomi agbo nɛ ɔ nya fo nɛ i ya hla wesa he.

9 Oo, Neneene Tsɛ, moo gbe a juɛmi nɛ o wo a kpɛti pɛ, nɛ o ha mɛ nitsɛmɛ a basabasa ni peemi ni ɔmɛ nɛ kpata a hɛ mi. 10 A ngɛ a ma a he bue nyɔ kɛ pia mohu, se a haomi ɔ ngɛ mɛ nitsɛmɛ a kpɛti ngɛ ma a mi, nɛ lɔ ɔ ji yi kpɛti wami kɛ lakpa yemi. 11 A ngɛ nihi gbee, a ngɛ jue nɛ a ngɛ nihi sisie ngɛ jua amɛ a nɔ kɛ he tsuaa he nɛ a maa gu.

12 Kaa he nyɛlɔ ko nɛ ngɛ mi jɛe ɔ, jinɛ e ko hɛwi mi; jinɛ i ko tu fo kɛ laa lɛ. 13 Se mo mohu i, mo ye jua, ye fiɛlɔ kɛ ye huɛ. 14 Mo nɛ i kɛ mo susuu níhi a he nɛ wa sɛɛ ni nɛ wa muɔɔ, nɛ wa nyɛɛ kɛ yaa Mawu We ɔ kaa nɔ kɛ e nyɛmi ɔ.

15 Mo ha nɛ a gbo kpatakpata, ejakaa yayami ngɛ a wehi a mi nɛ a puɛ kɛ yayami.

16 Se ami lɛɛ i ma tsɛ Tsaatsɛ Mawu nɛ e he ye yi wami, nɛ e maa pee hulɔ. 17 Ma sɔle nɛ ma kpa pɛɛ nyɔ kɛ pia nɛ e ma he nɔ. 18 Ta a nya wa ha mi, ejakaa nihi fuu te si kɛ wo mi, se e ma kpɔ mi. 19 Mawu nitsɛ, nɛ lɛ ji Mawu kɛ je blema a, ma ha mɛ heto. Ejakaa a tue gbo nɛ a yi lɛ gbeye, nɛ a bui kita amɛ hulɔ.

20 Ye huɛ nɛ i kɛ lɛ ngɛ saminya a tsɔɔ ye se blɔ. E yi e si womi ɔmɛ a nɔ. 21 E nya mi ngɔɔ kaa hwo, se e tsui mi duɔ nɛ awi yemi ngɛ e mi.

22 Mo wo o kɔmɔ ɔmɛ tsuo kɛ ha Mawu nɛ lɛ e maa ye ha mo. E ha we he blɔ nɛ nɔmlɔ kpakpa hɛ mi pueɔ si. 23 Mawu maa ngɔ ye he nyɛli ɔmɛ kɛ ya hɛ mi kpatami muɔ ɔ mi, nɛ e maa po nimli gbeli kɛ lakpatsɛ ɔmɛ a ligbi ɔmɛ a nɔ. Se ami lɛɛ i wo ye hɛ kɛ fɔ o nɔ nɛ o ma he ye yi wami.