1 Ko ha nɛ dikalɔ ɔ e sane nɛ hao mo, nɛ mo ko je yayami peeli hunga. 2 A yi be ko nɛ a poo mɛ kɛ pueɔ si kaa nga; a nglaa nɛ a nɛ mɛ hu. 3 Moo lɛɛ mo wo o hɛ kɛ fɔ Mawu nɔ. O mi mi nɛ jɔ nɛ o pee nihi kpakpa, konɛ o yi nɛ na wami ngɛ zugba a nɔ. O maa ya nɔ, nɛ o ma na he jɔmi.

4 O bua nɛ jɔ Mawu he, nɛ e ma ha mo nɔ nɛ o tsui ngɛ hlae. 5 Mo wo o he kɛ ha lɛ, nɛ o wo o hɛ kɛ fɔ e nɔ ngɛ nɔ́ fɛɛ nɔ mi, nɛ e maa ye kɛ bua mo. 6 E ma ha o anɔkuale ɔ maa je kpo, nɛ o dami ɔ ma kpɛ kaa piani pu.

7 Mo na tsui nɛ o hyɛ Mawu blɔ; nɛ o hɛ nɛ kó kɔ yayami peeli nɛ ngɛ nɔ yae ɔ a nɔ.

8 Ko na abofu; nɛ o ko wo o tsui la. Koo ye o tsui nɛ o hao, ejakaa haomi kɛkɛ e ma tsɛ kɛ ha mo. 9 A ma kpata dikali ɔmɛ a hɛ mi, se ni nɛmɛ nɛ wo a hɛ kɛ fɔ Mawu nɔ ɔ, a maa jɔɔ mɛ. 10 Be bɔɔ pɛ nɛ piɛ nɛ a be dikali ɔmɛ nae hu. O ma hla mɛ se o be mɛ nae. 11 Se nihi kulaa nɛ baa a he si ngɛ Mawu hɛ mi ɔ, a maa jɔɔ mɛ nɛ a ma na tue mi jɔmi babauu.

12 Dikali toɔ nimli kpakpahi a he ga nɛ a susuu a hɛ mi kpatami he. 13 Se Mawu muɔɔ mɛ, ejakaa e le kaa a kojomi be ma. 14 Dikali to a yi mi nɛ a ma kpata ohiafo hɛ mi, nɛ a dla a he nɛ a maa gbe nihi nɛ peeɔ kpakpa amɛ. 15 Se mɛ nitsɛmɛ a klaate ɔmɛ a nya nɛ a maa nɔ ngɛ, nɛ a awi yemi ní ɔmɛ maa ku dukuduku.

16 Níhi bɔɔ nɛ dalɔ ngɛ ɔ, e hi pe dikali a níhi babauu nɛ a na. 17 Ejakaa Mawu maa gbe yayami peeli ɔmɛ a he wami nya la, nɛ dali ɔmɛ ɔ, e maa bu a he.

18 Tsaatsɛ Mawu naa ni tsumi kpakpa nɛ dali tsuɔ daa nɛ ɔ, nɛ e haa mɛ neneene hiɔwo. 19 E hyɛɔ a nɔ ngɛ fimi behi a mi; nɛ hwɔ be mi tete po nɔ́ ko he hia we mɛ. 20 Se dikali ɔmɛ a hɛ mi ma kpata; Mawu he nyɛli ɔmɛ ma gbo kaa nga gboɔ, nɛ a maa ta kaa la su ku taa a. 21 Nimli yayami ɔmɛ paa nɔ́, nɛ a nyɛ we ngwɔ he nɛ a toɔ; se nimli kpakpa amɛ toɔ ngwɔ he nɛ e bee nɔ. 22 Ni nɛmɛ nɛ Mawu jɔɔ mɛ ɔ, a maa ye zugba a nɔ; se ni nɛmɛ nɛ e gbiɛ mɛ ɔ, a hɛ mi ma kpata.

23 Mawu tsɔɔ nimli kpakpa amɛ he nɛ sa nɛ a gu. E naa a nane hiami ɔmɛ a he bua jɔmi. 24 Ke a nɔ si ɔ, a plaa we, ejakaa Tsɛ Mawu hɛɛ a mi.

25 I hi nihe mi, se amlɔ nɛ ɔ, i wa. Ngɛ jehahi abɔ nɛ i ye ɔ kulaa mi ɔ, i nɛ kaa Mawu kua e sɔmɔlɔ ko aloo e ha hwɔ ye e bimɛ. 26 Se mohu ɔ, dali ɔmɛ a mi jɔ nɛ a kee nɔ ní, a paa ní kɛ haa ni kpahi; nɛ a bimɛ peeɔ jɔɔmi kɛ haa mɛ.

27 Lɔ ɔ he je ɔ, moo jɔɔ yayami peemi nɛ o pee kpakpa, konɛ o na neneene sihi he. 28 Ejakaa Mawu suɔ dami sane yemi, nɛ e be nihi nɛ yeɔ lɛ anɔkuale ɔ kuae. E maa bu a he daa; se ni nɛmɛ nɛ suɔ yi mi wami ni tsumi ɔ, a hɛ mi ma kpata.

29 Zugba a maa pee dali ɔmɛ a nɔ́ nɛ a maa hi nɔ daa. 30 Nɔmlɔ kpakpa tuɔ ni lemi munyu, nɛ e yeɔ dami sane daa. 31 E toɔ Mawu mlaa amɛ ngɛ e tsui mi nɛ e nane be tɔtɔe gblee.

32 Yayami peeli woɔ ka kɛ haa nimli kpakpa amɛ, a hlaa a he blɔ nɛ a gbe mɛ. 33 Se Mawu be he nyɛli ɔmɛ he blɔ hae nɛ a ye kunimi, nɛ e be hae nɛ dali ɔmɛ a ye fɔ ke a kɛ mɛ ya ha kojomi.

34 Moo hyɛ Mawu blɔ. Moo ya nɔ nɛ o pee e suɔmi nya ni, nɛ e maa wo o hɛ mi nyami. O maa ye zugba a nɔ, nɛ o maa na kaa e kpata yi mi wali ɔmɛ a hɛ mi. 35 I le nyumu yayami peelɔ he wolɔ ko. E je oblai nɛ e ka gbauu. 36 Pee se ɔ, i nɛ lɛ hu; i hla lɛ se i nɛ lɛ. 37 Se nɔmlɔ kpakpa a, e sane ɔ ngɛ slɔɔto. E woɔ weku nɛ e ngɛ tue mi jɔmi, nɛ e nyagbe peeɔ bua jɔmi. 38 Se nimli yayami ɔmɛ ɔ, a ma kpata a hɛ mi, nɛ a weku maa gu.

39 Mawu heɔ dali a yi wami, nɛ lɛ ji a we sami he ngɛ haomi be mi. 40 E yeɔ kɛ buaa mɛ nɛ e heɔ a yi wami. E kpɔɔ mɛ kɛ jeɔ dikali a dɛ mi, ejakaa a heɔ e nɔ yeɔ.