La Amɛ 45

Matsɛ yo ngɔmi

1 Susumi kpakpa ko ba ye mi; i ma po la kɛ ha Matsɛ ɔ. La ngɛ ye nya bae kaa bɔ nɛ e baa asilɛte nya a.

2 O nɔ afɛu nɔmlɔ ko be; o nya mi tsɔ. Mawu nitsɛ ngɛ mo jɔɔe daa.

3 Moo mia kɛ ta hwumi nihi, he walɔ matsɛ; anunyami nɔmlɔ ji mo nɛ o je agbo!

4 Moo ya ngɛ agbo jemi mi nɛ o ya ye kunimi; nɛ o fa anɔkuale kɛ he si bami kɛ dami sane yemi he. O maa ye kunimi ejakaa o ngɛ he wami.

5 O kɛ̃ɛ̃ mi bi ɔmɛ a nya ba, nɛ a gbɔɔ o he nyɛli ɔmɛ kɛ sɛɛ a tsui mi tɔɔ, nɛ a nɔɔ ngɛ o hɛ mi.

6 Oo Neneene Tsɛ, o matsɛ yemi ɔ ngɛ daa. Dami sane yemi ji o matsɛ tso.

7 O suɔ nɔ́ nɛ da, nɛ o hiɔ nɔ́ yaya. Enɛ ɔ he je nɛ o Mawu ɔ ha o na bua jɔmi pe nɔ fɛɛ nɔ ɔ nɛ.

8 O tadehi a mi ngɛ via jee kɛ mimɛ kɛ nu je via, nɛ lali ngɛ lae kɛ kpa sakuhi kɛ ngɛ o hɛ ja jee ngɛ o matsɛ we nɛ a ngɔ suɔ wu kɛ dla mi ɔ mi. 9 Matsɛmɛ a biyihi ngɛ o anunyami yi ɔmɛ a kpɛti. Nɛ manyɛ ɔ nɛ wo sika tsu níhi nɛ a kɛ je Ofir ɔ daa si ngɛ o hiɔ nɔ je. 10 "Oo biyo, moo bu ye ga womi ɔ tue. Koo ye o tsui ngɛ o fɔli nɛ ngɛ o ma mi lokoo ɔ a he. 11 O he peeɔ o huno matsɛ ɔ fɛu. Moo ba o he si kɛ ha lɛ, ejakaa o nutsɔ ji lɛ. 12 Tiro bihi nɛ ji wa mwɔnɛmwɔnɛ ɔ niatsɛmɛ pe kulaa a ma ba ke mo ni nɛ a kɛ hla blɔ nya."

13 Matsɛ biyo ɔ ngɛ mlɛe ngɛ e tsu ɔ mi. E wo afɛu sika tsu tade. 14 E wo tade nɛ a kɛ nine lo, nɛ e anunyami mawa amɛ kpaka lɛ kɛ yaa matsɛ ɔ ngɔ. 15 A sɛ matsɛ we ɔ mi kɛ bua jɔmi kɛ nyami. 16 O bi ɔmɛ ma ba ye matsɛ ngɛ a tsɛ nane mi, nɛ a maa ye matsɛ ngɛ je ɔ mi tsuo.

17 I ma ha a bu o biɛ ɔ ngɛ yi nɔhi kulaa, nɛ je ɔ tsuo ma je o yi kɛ ya neneene.