1 Tsaatsɛ Mawu, moo bu ye sɔlemi ɔ tue! 2 Oo, moo bu ye he kɛ je yi mi wali kɛ awi yeli nɛ ɔmɛ nɛ ngɛ ye he ga woe ɔ a dɛ mi. 3 A puɛ mi kɛ a lilɛhi nɛ nya ba amɛ. A nya mi munyuhi hí, a gbɔɔ mi ngɛ ye tsui mi tɔɔ kaa kɛ̃ɛ̃ mi bihi. 4 A fiaa nɔ nɛ li nɔ́ ko ɔ nɔ́ ngɛ laami mi. A peeɔ enɛ ɔ nɛ a yi gbeye. 5 A woɔ a si bi he wami nɛ a pee nɔ́ yayami. A kpee ngɛ laami mi nɛ a tsɔɔ a klama amɛ. A deɔ ke, "A be wɔ nae ngɛ hiɛ ɔ gblee!" 6 A peeɔ klaalo kɛ hlaa yayami peemi se blɔ. A puɛɔ be babauu kɛ hii a ni yayami ɔmɛ a he susue.

7 Se Mawu nitsɛ maa fia mɛ nɔ́ kɛ fɔ si. E kɛ̃ɛ̃ mi bi ɔ ma na mɛ tlukaa. 8 E ma kpata a hɛ mi ngɛ a nya mi munyu nɛ hí ɔ he je, nɛ nɔ fɛɛ nɔ nɛ maa na a ma huanya yi. 9 Kɛkɛ ɔ, nɔ tsuaa nɔ maa ye gbeye nɛ a maa jaje nyakpɛ ni nguahi nɛ Mawu pee ɔmɛ, nɛ a maa nu sisi. 10 Nɛ dalɔ ɔ bua maa jɔ ngɛ Mawu mi. E ma he e nɔ maa ye nɛ e ma je e yi.