1 Nutsɔ, mɛni he je nɛ o ho se ya lokoo kikɛ ɔ? Mɛni he je nɛ o ngɔ o he kɛ laa mi be mi nɛ o he hia mi pe kulaa?

2 Moo ba nɛ o kɛ dikali, he nɔ woli, nɛ ngɛ ohiafohi yi mi wae nɛ ɔ nɛ ba ye. Ha nɛ a yi mi yayami nɛ a to kɛ wo nihi a he ɔ nɛ kpa bu mɛ nitsɛmɛ a nɔ. 3 Ni nɛ ɔmɛ kɛ a musu ni nami ɔmɛ fiaa. A gbee Mawu he guɛ, nɛ a jeɔ nihi nɛ Nutsɔ ɔ sume ɔ a yi, nihi nɛ a kɔmɔ nɛ a yeɔ pɛ ji sika a.

4 Yi mi wali kɛ he nɔ woli nɛ ɔmɛ a susumi ji kaa Mawu ko be. Lɔ ɔ he je ɔ, e se blɔ hlami he hia we mɛ. 5 Se a nɔ́ tsuaa nɔ yaa nɔ pɛpɛɛpɛ, nɛ a nine suu a he nyɛli a nɔ. A li kaa o kojomi kɛ tue sami ko ngɛ nɛ ma ba na mɛ. 6 A fiaa nɛ a deɔ ke Nɔmlɔ ko loo Mawu po be a nya nyɛe maa tsi ligbi ko; bɔ fɛɛ bɔ nɛ ji ɔ, nɔ́ nɛ a ngɛ hlae ɔ, a maa pee.

7 Lakpa kɛ musu bɔmi munyu pɛ nɛ a tuɔ, nɛ a dika ga nɛ a tsɔɔ ɔmɛ ji a fiami nɔ́. 8 A woɔ ka ngɛ diblii mi ngɛ blɔ he nɛ a gbee blɔ nyɛɛli. 9 A woɔ ka kaa jata nɛ ngɛ mlɛe nɛ maa hi kɛ ma nɔ nɔ. Nɛ a nuu nihi nɛ a ngɛ hlae ɔ kaa de dalɔ nuu lohwe kɛ klama. 10 Nihi nɛ a he be ni ɔmɛ a nyɛ we a he wami nya dami, nɛ a kpataa a hɛ mi. 11 Nɔ́ nɛ a deɔ a he ji, "Mawu tsa nɛ, nɛ e be lee hulɔ."

12 Oo Nutsɔ, tee si! Oo Mawu, mo kpata a hɛ mi! O hɛ nɛ ko je ohiafo nɔ aloo nɔ ko nɛ e fi lɛ ɔ. 13 Mawu, ko ha nɛ yi mi wali nɛ bui mo ɔ nɛ a ye a he, nɛ e pee mɛ kaa kojomi ko be ha mɛ. 14 Nutsɔ, o na nɔ́ nɛ a ngɛ pee ɔ, nɛ o le awi nɛ a ngɛ yee ɔ. Saa a tue. Mo ji ohiafo hɛ nɔ kami; yemi kɛ bualɔ ji mo, nɛ o yeɔ kɛ buaa nihi nɛ be nɔ́ ko ɔ. 15 Moo ku dikali ɔmɛ a he wami nya. Moo gbla a tue ngɛ a yayami peemi ɔ he kɛ ya si o ma kpata mɛ tsuo a hɛ mi.

16 Nutsɔ ɔ ji matsɛ kɛ yaa neneene. Nɛ nihi nɛ jaa mawu kpahi ɔ, e ma kpata a hɛ mi ngɛ zugba a nɔ.

17 Nutsɔ, o nuɔ humihi a sɔlemi kɛ a kɔmɔ yemi. O ma he mɛ. O maa pee a hiami ni ha mɛ nɛ o ma kɛ jɔɔ a bua. 18 Tsɛ Mawu, moo nu awusahi kɛ nihi nɛ a ngɛ mɛ amimi yee ɔmɛ a sɔlemi kɛ pɛɛ kpami. Moo kɛ mɛ nɛ hi si bɔ nɛ pee nɛ nɔ ko nɛ ko wo a he gbeye hu.