1 Neneene Tsɛ, kɛ je blema lokoo ɔ, mo ji wa wesa he! 2 Loko ji a bɔ je ɔ, nɛ loko ji a bɔ yoku ɔmɛ ɔ, mo ji Mawu nɛ be sisije loo nyagbe.

3 O haa nɛ nɔmlɔ kpaleɔ peeɔ zu, nɛ o deɔ ke, nyɛɛ kpale nyɛ se nɛ nyɛɛ ba, nyɛ nimli a bimɛ. 4 Jeha akpe ngɛ kaa hiɛ pɛ ngɛ o hɛ mi. E ngɛ kaa nyɔ hwɔɔmi be kɛkɛ! 5 O muɔɔ mɛ kɛ yaa kaa pa nɛ ngɛ bee; a nya taa kaa mahe nɛ a hwɔɔ. Mɔtu mi ɔ, a ngɛ kaa nga nɛ ma pɔpɔɔpɔ. 6 Mɔtu mi ɔ, e peeɔ flɔflɔɔflɔ; gbɔkuɛ mi ɔ, a poo lɛ ngɔ fɔɔ si nɛ e nglaa. 7 O mi mi la a nɛ ha wa hɛ mi ngɛ kpatae, nɛ o mi mi fumi ha wa ngɛ nɔ́ nae. 8 O ngɔ wa ni peemi ni yayami ɔmɛ kɛ to o hɛ mi, nɛ o naa wa diblii mi ni ɔmɛ hu paa. 9 Wa ligbi ɔmɛ ngɛ bee ngɛ o abofu nya, nɛ wa yeɔ wa jeha amɛ kaa nyazia nɛ a ngɛ siae.

10 Jeha nyingmi kpaago ji wa be ɔ nɛ; nɛ ke wa se kɛ hluu ɔ, jeha nyingmi kpaanyɔ; se dengme kɛ aywilɛho nɛ ngɛ mi. E kɛ we nɛ a poo nɔ nɛ wa bee kɛ hoɔ. 11 Mɛnɔ nɛ le o mi mi fumi ɔ he wami? Bɔ nɛ o he ngɛ gbeye ɔ, ja a o mi mi fumi hu ngɛ.

12 Lɔ ɔ he je ɔ, moo tsɔɔ wɔ nɛ waa le wa ligbi ɔmɛ kanemi, bɔ nɛ pee nɛ wa na ni lemi tsui.

13 Oo Yehowa, mo ba jɔɔ wɔ! Mɛni be po o maa mlɛ kɛ ya si? Mo je o mi mi fumi ɔ kɛ je wa nɔ. 14 Nɛ o je o suɔmi ɔ kpo kɛ tsɔɔ wɔ mla, bɔ nɛ pee nɛ wa nya, nɛ wa na bua jɔmi ngɛ wa si himi be ɔ tsuo mi. 15 Mo ha nɛ wa na bua jɔmi kɛ to behi nɛ o ha wa ye aywilɛho ɔ nane mi. Moo ngɔ jeha kpakpahi kɛ to jeha yaya amɛ a nane mi. 16 Mo ha nɛ waa na o nyakpɛ ni tsumi ɔmɛ ekohu; nɛ o ha wa bi ɔmɛ a na anunyami níhi, nɛ ji níhi nɛ o peeɔ sa be ɔ mi ɔ. 17 Nɛ Neneene Tsɛ, wa Mawu ɔ, e anunyami ɔ nɛ hi wa nɔ, nɛ e jɔɔ wa nine nya ni tsumi ɔmɛ, nɛ a hi ha wɔ daa.