1 Nyɛ je Tsaatsɛ Mawu yi! E sa kaa a la nɛ a je Neneene Tsɛ wa Mawu ɔ yi. E hi nɛ e da kaa a je e yi.

2 Yehowa maa ma Yerusalem ekohu, nɛ e maa kpale nihi nɛ a ngɔ mɛ nyɔguɛ ɔ kɛ ba. 3 E tsaa nihi tsuo nɛ a tsui hao ɔ, nɛ e fiɔ a pa amɛ a nɔ kɛ haa mɛ. 4 E le hlami dodoe ɔmɛ tsuo a yi bɔ, nɛ e tsɛɔ eko tsuaa eko kɛ e biɛ. 5 Wa Neneene Tsɛ ɔ kle, nɛ e he wami hu kle. E nɔ sisi numi kɛ e nile be nyagbe. 6 Yehowa woɔ he si bali a nɔ, nɛ e woɔ dikali ɔmɛ kɛ fiaa si. 7 Nyɛ la nɛ nyɛɛ na Neneene Tsɛ ɔ si; nyɛ la kɛ kpa saku nɛ nyɛ je wa Tsɛ Mawu yi. 8 Lɛ nɛ e haa bɔ woɔ; e haa nyu nɛɛ pueɔ zugba a nɔ, nɛ nga puɛɛ ngɛ yoku ɔmɛ a nɔ. 9 E haa lohwe nane eywiɛtsɛmɛ niye ni, kɛ kɔɔkɔmite ɔmɛ nɛ hii pɛe ɔ hu a nya ngma. 10 Okpɔngɔ fo tumi pi nɔ́ ko nɛ e nyaa he, nɛ nɔmlɔ he wami pi nɔ́ ko kulaa ngɛ e hɛ mi. 11 Se mohu e naa bua jɔmi ngɛ nihi nɛ yee lɛ gbeye ɔ a mi, nɛ a woɔ a hɛ kɛ fɔɔ e suɔmi kɛ mɔbɔ nami nɔ ɔ.

12 Oo Yerusalem, mo je e yi! Mo je o Mawu ɔ yi, oo Zion! 13 Ejakaa e ha o agbo ɔmɛ a he wa, nɛ e jɔɔ o nimli ɔmɛ. 14 E haa tue mi jɔmi baa o huza amɛ tsuo a mi, nɛ e haa mo ngma kpakpa. 15 E woɔ kita kɛ maneɔ zugba a nɔ, e munyu ɔ he sɔɔ wawɛɛ. 16 E haa nɛ sinoo nɛɛ kɛ pueɔ si futafuta, nɛ e gbɛɛ bɔ nɛ fi ɔ kɛ fiaa kaa la zu. 17 Nɛ e fiaa nyu nɛ fi kaa tɛ ɔ kɛ pueɔ zugba a nɔ. Mɛnɔ ma nyɛ maa da e yluduu ɔ nya? 18 Se e haa nɛ je mi dɔɔ la nɛ aisi ɔ sileɔ; e haa kɔɔhiɔ fiaa nɛ nyu ɔmɛ foo dɔ kɛ yaa. 19 E ha nɛ Israel le e mlaa amɛ kɛ e sɔmɔmi blɔ nya tomi ɔmɛ. 20 E pee we enɛ ɔ kɛ ha we ma kpa amɛ; a li e mlaa amɛ. Nyɛ je Yehowa yi!