1 Oo Nutsɔ, i ma je o yi kɛ ye tsui kulaa. I ma fiɛ o nyakpɛ ni slɔɔto ɔmɛ nɛ o pee ɔ kɛ tsɔɔ. 2 I ma na bua jɔmi, nɛ ye mi ma hyi tɔ kɛ nyami ngɛ o he je. Nutsɔ, mo o yi ma la ma je, mo Mawu Ope.

3 Ye he nyɛli ɔmɛ maa gbee senyasenya ngɛ o hɛ mi, nɛ a hɛ mi ma kpata. 4 O bu mi bemi, nɛ o ma ye ni tsumi ɔ nɔ mi kɛ je o matsɛ sɛ ɔ nɔ kaa e hi. 5 O ka je mi ma amɛ a hɛ mi, nɛ o kpata dikali ɔmɛ a hɛ mi, nɛ o gbe a biɛ kɛ yaa neneene. 6 Oo, nyɛ ye he nyɛli, nyɛ gbe nya gbidigbidi. Nutsɔ ɔ ma puɛ nyɛ ma amɛ nɛ nɔ ko be mɛ kaie hu.

7 Se Nutsɔ ɔ ngɛ tsɛ yee kɛ yaa neneene. 8 E ngɛ e matsɛ sɛ ɔ nɔ nɛ e maa kojo je ɔ ngɛ dami nya. 9 Lɛ ji wesa he kɛ ha nihi nɛ a ngɛ mɛ amimi yee. 10 Nutsɔ, nihi kulaa nɛ le o mɔbɔ nami ɔ, maa tu fo kɛ ba o ngɔ ngɛ a fimi be mi nɛ o ye kɛ bua mɛ; ejakaa nihi nɛ ngɔ a hɛ kɛ fɔ o nɔ ɔ, o ngmɛɛ we a ti nɔ ko he hyɛ gblee.

11 Nyɛ la nɛ nyɛ je Zion Mawu ɔ yi. Nyɛɛ fiɛ e ni tsumi ɔmɛ nɛ hɛ be nɔ jee ɔ kɛ tsɔɔ je ɔ. 12 E yeɔ nɔ nɛ a gbe lɛ ɔ e sane kɛ haa lɛ, nɛ e buu nihi nɛ kpaa ngmlaa kɛ tsɛɔ lɛ ɔ tue. E nuɔ nihi nɛ ngɛ haomi mi ɔ a sɔlemi kɛ pɛɛ kpami nɛ e heɔ mɛ.

13 Oo Nutsɔ, moo na mi mɔbɔ. Hyɛ nɔ́ nɛ i ngɛ nae ngɛ nihi nɛ ngɛ mi nyɛɛ ɔ a dɛ mi. Nutsɔ, mo kpɔ mi kɛ je gbenɔ dɛ mi. 14 Mo he mi koo, nɛ i ma je o yi ngɛ Zion agbo ɔmɛ a nya ngɛ ma hɛ mi, nɛ i ma nya ngɛ ye yi wami hemi kɛ kpɔmi ɔ he.

15 Yi mi wali ɔmɛ a nɔ mɛ nitsɛmɛ a muɔhi nɛ a tsua kɛ ha ni kpa amɛ a mi, nɛ a klama nɛ a tsɔ kɛ ha ni kpahi ɔ, e du mɛ nitsɛmɛ. 16 Mawu dami sane yemi ɔ ha nɛ je ɔ tsuo le lɛ. E saa yayami peeli a tue nɛ e haa mɛ nitsɛmɛ a klama duɔ mɛ.

17 Yi mi wali ɔmɛ maa ya abosiamihi a je, nɛ mahi nɛ a hɛ jee Mawu nɔ ɔ, a hɛ mi ma kpata. 18 Mawu hɛ be ohiafo nɔ jee kɔkɔɔkɔ, nɛ níhi nɛ ohiafo ngɛ blɔ hyɛe ɔ, e be yaka pee gblee.

19 Oo Nutsɔ, tee si nɛ o kojo ma amɛ nɛ o sa a tue; ko ha nɛ a ye o nɔ. 20 Mo ha nɛ a he nɛ kpokpo nɛ a ye mo gbeye. Ha nɛ nimli a bimɛ a le kaa adesahi kɛkɛ ji mɛ.