1 Nɔ nɛ hii Neneene Tsɛ ɔ laami he ɔ, e maa hi Mawu Ope ɔ nɔuu hɔ̃ mi.

2 I ma de Tsaatsɛ Mawu ke, "Mo ji ye wesa he kɛ ye mwɔ. Ye Mawu, o nɔ nɛ i ngɔ ye hɛ kɛ fɔ." 3 E ma je mo kɛ je oslaahi nɛ o nɛ kulaa mi, kɛ gbenɔ hiɔhi tsuo mi. 4 E maa ha o nɔ kɛ e pɛlihi, nɛ o ma na sihi he. E anɔkuale si womi ɔmɛ maa pee o he fami níhi. 5 Jehanɛ ɔ, o be nyɔ gbeye yee hu, aloo oslaa nɛ baa piani ɔ. 6 Nɛ gbenɔ hiɔ nɛ baa nyɔ mi ɔ be o he gbeye woe, aloo hɛ mi kpatami nɛ baa piani.

7 Ke nihi akpe nɔ ngɛ o kasa nya, nɛ akpe nyɔngma hu ngɛ gboe kɛ bɔle mo tete po ɔ, nɔ́ ko be o he sae. 8 O hɛ ngmɛ pɛ nɛ o ma kɛ hyɛ nimli yi mi wali a hiɔwo. 9 Ejakaa Yehowa ji o wesa he! O ngɔ Tsaatsɛ Mawu Ope ɔ kɛ pee o he bulɔ. 10 Yayami ko be o nɔ bae, nɛ haomi ko be o we nae. 11 Ejakaa e ma fa e bɔfo ɔmɛ nɛ a bu o he ngɛ o blɔhi kulaa nɔ. 12 A maa hɛɛ mo ngɛ a dɛ mi konɛ o nane nɛ ko si tɛ ko. 13 O kɛ jata maa kpe nɛ o maa naa sinɔ duɔtsɛhi a nɔ, o maa naa jata bihi kɛ demi nɔ, se a be mo nɔ́ ko pee.

14 Ejakaa Neneene Tsɛ ɔ de ke, "Akɛnɛ e suɔ mi he je ɔ, i ma kpɔ lɛ, nɛ i ma wo e nɔ gojoo, ejakaa e le mi. 15 Ke e tsɛ mi ɔ, i ma he nɔ. I be e he ngmɛɛe ngɛ haomi mi; i ma kpɔ lɛ nɛ i ma wo e hɛ mi nyami. 16 Ma ha lɛ wami se kɛmi, nɛ e ma na yi wami hemi."