1 Tsa pi wɔ, oo Yehowa, tsa pi wɔ, se o biɛ ɔ mohu nɛ o maa ngɔ anunyami kɛ ha ngɛ o suɔmi kɛ o anɔkuale yemi ɔ he. 2 Mɛni he je nɛ o ha nɛ ma amɛ ma bi ke, "Jije a Mawu ɔ ngɛ?"

3 Wa Mawu ɔ ngɛ hiɔwe, nɛ nɔ nɛ e suɔ ɔ, lɔ ɔ nɛ e peeɔ. 4 Mɛɛ lɛɛ a amaga amɛ ɔ, sika hiɔ kɛ sika tsu nɛ ji nimli a nine nya ni tsumi kɛkɛ i. 5 A ngɛ nya, se a tui munyu, a ngɛ hɛ ngmɛ, se a hyɛ we nɔ. 6 A ngɛ tue, se a nui nɔ, a ngɛ gugwɔ, se a nui nɔ he fu. 7 A ngɛ ninehi, se a kɛ tɛ nɔ́ he, a ngɛ nanehi ngɛ a sisi, se a nyɛɛ we; nɛ a kuɛ si hu pɛ́. 8 Ni nɛmɛ nɛ pee mɛ ɔ, a ngɛ kaa mɛ nɔuu; nɛ ja a nɛ nɔ tsuaa nɔ nɛ woɔ e hɛ kɛ fɔɔ a nɔ ɔ hu ngɛ.

9 Oo Israel, mo wo o hɛ ngɔ fɔ Tsaatsɛ Mawu nɔ! Lɛ ji o yemi kɛ bualɔ kɛ o he pulelɔ. 10 Oo Aaron we osɔfohi, nyɛ wo nyɛ hɛ kɛ fɔ Tsaatsɛ Mawu nɔ! Lɛ ji nyɛ yemi kɛ bualɔ kɛ nyɛ he pulelɔ. 11 Nyɛ nihi tsuo nɛ nyɛ yee Yehowa gbeye ɔ, nyɛ wo nyɛ hɛ kɛ fɔ e nɔ! Lɛ ji nyɛ yemi kɛ bualɔ kɛ nyɛ he pulelɔ.

12 Yehowa hɛ ji wa nɔ; e maa gbaa wɔ. E maa gbaa Israel, nɛ e maa gbaa Aaron we osɔfo ɔmɛ. 13 E maa gbaa nihi kulaa nɛ yee lɛ gbeye ɔ, nimli guhi kɛ nimli nguahi tsuo.

14 Neneene Tsɛ ɔ nɛ ha nɛ o plɔke kɛ o bimɛ tsuo. 15 Yehowa, hiɔwe kɛ zugba bɔlɔ ɔ maa jɔɔ mo. 16 Hiɔwe ɔ, Yehowa nɔ i; se e wo zugba a kɛ ha nimli a bimɛ.

17 Gbogboehi kɛ nimli nɛ ngɛ gbeje ɔ je we Yehowa yi. 18 Se wɔɔ lɛɛ wa ma je Tsaatsɛ Mawu yi! Wa ma je e yi kɛ ya neneene! Nyɛ je Tsaatsɛ Mawu yi!