1 Je ɔ tsuo nyɛ la kɛ je Tsaatsɛ Mawu yi! 2 Nyɛ la kɛ je e anunyami biɛ ɔ yi. Nɛ nyɛɛ tsɔɔ bɔ nɛ e he ngɛ nyakpɛ ha.

3 Oo Tsaatsɛ Mawu, hyɛ bɔ nɛ o ni tsumi ɔmɛ a he ngɛ gbeye ha! O he wami kle, nɛ e be nyakpɛ kaa o he nyɛli ɔmɛ ha yi. 4 Je ɔ kulaa ma kpla si ma ja mo, nɛ a ma la kɛ je o yi ngɛ o anunyami ní ɔmɛ a he. 5 Nyɛɛ ba nɛ nyɛ ba hyɛ anunyami níhi nɛ Mawu tsu, kɛ nyakpɛ níhi nɛ e ha a ba e nimli ɔmɛ a nɔ ɔ. 6 E je blɔ kɛ gu wo ɔ kpɛti kɛ ha mɛ, nɛ a po wo ɔ kɛ nane. Jamɛ a ligbi ɔ pee bua jɔmi kɛ nyami ligbi.

7 Ngɛ e he wami ɔ he je ɔ, e maa ye matsɛ kɛ ya neneene. E hyɛɛ ma amɛ tsuo a je mi bami. Oo nyɛ mahi nɛ nyɛ tsɔɔ atuã, e maa ba nyɛ si.

8 Nyɛ je Mawu yi, nyɛ je ɔ kulaa, nyɛ la kɛ je e yi. 9 Ejakaa wa wami ngɛ e dɛ mi, nɛ e hɛɛ wa mi konɛ wa ko nɔ si. 10 Oo Tsaatsɛ Mawu, o ka wɔ hyɛ ha, nɛ o kɛ tsu wa he kaa a tsuɔ sika hiɔ he ɔ. 11 O kɛ o ya a du wɔ, nɛ o ngɔ tlomihi nɛ jiɔ kɛ tloo wɔ. 12 O ha nɛ he nyɛli wa wɔ yi mi. Wa nyɛɛ la mi nɛ wa po pa hu. Se nyagbe mi ɔ, o ke wɔ ba ni nami kɛ he jɔmi mi.

13 Jehanɛ ɔ, i ba o Sɔlemi We ɔ nɛ ma ba ye ye si womi ɔ nɔ nɛ ma sa afɔle kɛ ha mo. 14 Ejakaa be mi nɛ i sɛ haomi mi ɔ, i wo mo sihi fuu. 15 Enɛ ɔ he je nɛ i ngɔ apletsi kuhi kɛ jijɔ kuhi kɛ na kuhi nɛ wo zɔ kɛ ba ngɛ. Nɛ bɔ sami la su ku ɔ maa ba o ngɔ.

16 Nyɛɛ ba nɛ nyɛ ba nu, nyɛ nihi tsuo nɛ nyɛ buu Mawu ɔ, nɛ i ma de nyɛ níhi nɛ e tsu kɛ ha mi. 17 Ejakaa i kpa ngmlaa kɛ tsɛ lɛ nɛ e ye kɛ bua mi, nɛ i je e yi. 18 E ji i jaje we ye tomi ɔmɛ ɔ, jinɛ e be mi tue bue. 19 Se e bu mi tue. E nu ye sɔlemi kɛ pɛɛ kpami ɔ, nɛ e ha mi heto.

20 A je Mawu yi daa, ejakaa e bu ye sɔlemi ɔ tue, nɛ e suɔmi kɛ mɔbɔ nami ɔ ngɛ ye nɔ.