1 Mawu ji ye kane kɛ ye yi wami nami; mɛnɔ nɛ i ma ye gbeye? Lɛ ji ye tɛ sa, mɛnɔ po ma ye gbeye? 2 Ke dikali te si ba na mi ɔ, a ma tɛ nɔ́ nɛ a maa nɔ si. 3 Ke ta ngua ko ba na mi tete po ɔ, ye tsui be poe, ejakaa i le kaa Mawu ma he mi.

4 Nɔ́ kake nɛ i biɔ Mawu daa, nɛ lɔ ɔ ji ye hiami nɔ́ pe kulaa ji kaa, ma hi e we ɔ kɛ sɔlemi, nɛ ma hi e hɛ mi ye wami ligbi ɔmɛ tsuo, nɛ ma na e himi kɛ e anunyami ɔ. 5 Lejɛ ɔ nɛ i ma hi, nɛ e ma wo mi ngɔ laa ngɛ haomi be mi. E ma wo mi ngɔ to tɛ sa nɛ ya hiɔmi nɔ. 6 He nyɛlɔ ko nine be ye nɔ sue ngɛ lejɛ ɔ. Nɛ i ma sã bɔ ha lɛ kɛ ye nya he yi jemi la kɛ bua jɔmi, 7 Tsaatsɛ, moo bu ye kue fami tue. Naa mi mɔbɔ nɛ o ye kɛ bua mi.

8 I nu he ngɛ ye mumi mi lokoo be nɛ o tsɛ nɛ o de ke, "Oo ye bimɛ, nyɛ hla ye se blɔ." Nɛ ye mumi kplɛɛ nɛ e he nɔ de ke, "Tsaatsɛ, i ma."

9 Oo, mo ko wo o hɛ mi ngɔ laa mi be mi nɛ i ngɛ mo hlae. Ko wo abofu kɛ fie o sɔmɔlɔ ɔ. O ye kɛ bua mi hyɛ ngɛ ye kahi slɔɔto ɔmɛ a mi; ko si mi piɔ. Oo Mawu, ye yi wami helɔ, ko kua mi. 10 Ejakaa ke ye tsɛ kɛ ye nyɛ ngmɛɛ ye he ɔ, mo nɛ o ma he mi nɛ o maa jɔɔ ye bua.

11 Tsaatsɛ, moo tsɔɔ mi nɔ́ nɛ o suɔ nɛ ma pee, ejakaa he nyɛli wo ka ngɛ mlɛe nɛ a ye mi awi. 12 Ko ha nɛ a nine nɛ su ye nɔ; ko ha nɛ ma sɛ a dɛ mi. Ejakaa nɔ́ nɛ i pee we hu a ke i pee, nɛ a ngɛ ye he ga toe be fɛɛ be. 13 I ngɛ Mawu blɔ hyɛe nɛ e je mi, bɔ nɛ pee nɛ ma na e mi mi himi ɔ ekohu be mi nɛ i ngɛ wami mi nɛ ɔ.

14 Moo to tsui, moo hyɛ Mawu blɔ nɛ e ma he o yi wami. Moo pee kɔ. Moo hyɛ lɛ blɔ nɛ e maa ye kɛ bua mo .