La Amɛ 98

Je ɔ nɛ nya, Mawu ji Matsɛ

1 Nyɛ la la he kɛ ha Tsaatsɛ Mawu nɛ nyɛ kɛ tsɔɔ nyakpɛ ni nguahi nɛ e pee ɔ! Ejakaa e kɛ e klɔuklɔu nɛ e ji ɔ kɛ e he wami ye kunimi agbo ko. 2 Neneene Tsɛ ɔ ha nɛ a le e yi wami hemi ɔ, nɛ e tsɔɔ e klɔuklɔu nɛ e ji ɔ paa ngɛ wɔ jali a hɛ mi. 3 E kai mɔbɔ nami kɛ anɔkuale yemi he si nɛ e wo Israel bi ɔmɛ; nɛ je ɔ tsuo na wa Mawu ɔ e yi wami hemi ɔ. 4 Je ɔ tsuo nɛ je Yehowa yi. Nyɛ kpa ngmlaa wawɛɛ nɛ nyɛ nya, nɛ nyɛ la kɛ je e yi.

5 Nyɛ la kɛ je Tsaatsɛ Mawu yi, nyɛ la kɛ saku kɛ je e yi. 6 Nyɛ kpa titimati, nɛ nyɛ kpa bɛ ngɛ Matsɛ, Neneene Tsɛ ɔ hɛ mi. 7 Wo ɔ nɛ fia kɛ e mi nɔ́ fɛɛ nɔ kɛ je Tsaatsɛ Mawu yi. Zugba a kɛ nɔ́ tsuaa nɔ nɛ ngɛ nɔ ɔ nɛ kpa ngmlaa ke, "A ngɔ anunyami kɛ ha Neneene Tsɛ ɔ!"

8 Oslɔke ɔmɛ a gbɔ vu, nɛ yoku ɔmɛ tsuo a la kɛ bua jɔmi ngɛ Tsaatsɛ Mawu hɛ mi. 9 Ejakaa e ma je ɔ kojomi. E maa kojo je ɔ ngɛ dami nya.