1 अळतेण वादळा मे एक मोट्‌ली सेलाणी देखाव पड़ी, मतलब एक बयर जे दाहड़ु ने ओड री हती, अने चांद तीना पोग तळे हतो, अने तीना मुंडा पोर बारे तारा नी पागड़ी हती। 2 तीहयी भारेपोगे हती, अने आड़ती हती, काहाके तीहयी पोखड़ायवा नी टेमे ना दुख मे हती।

3 एक अळी मोट्‌ली सेलाणी वादळा मे देखाव पड़ी; अने देखो, एक मोट्‌लो रात्‌लो अजगर हतो, जीना ह़ात मुंडा अने दह़ ह़ींगड़ा हता, अने तीना ह़ातोव मुंडा पोर एक-एक पागड़ी हती।✝12:3 दानीयल 7:7 4 तीनु पुछड़ु वादळा मे ना तीन खुणा मे गेथा एक खुणा ना तारा ने हापकीन धरती पोर पाड़ देदु।✝12:4 दानीयल 8:10 तीहयो अजगर तीहयी बयर अगळ जे पोखड़ायवा वाळी हती, उबो हयो के जत्‌यार तीहयी पोखड़ाये ता तीहयु सोरु ने गळ जाय। 5 अळतेण तीहयी बयर एक सोरु ने पयदा करी जे सोरो हतो, अने आहया सोरा ने लुहड़ा नो डंडो लीन आखी जाती पोर राज करनु हतु, पण तीहयु सोरु ने तत्‌यारुत उचलीन भगवान अने तीनी राजगादी अगळ लीजती र्‌या;✝12:5 यसाया 66:7; भजन सहीता 2:9 6 अने तीहयी बयर तीहया जंगल मे नाह ज्‌यी जां ह़ारीक भगवान नी लारे तीनी जुगु एक जागो तीयार करलो हतो, के तां ह़ारीक तीहयी बयर ने एक हजार बे ह़ोव साट दाड़ा तक ह़माळे।

7 ✝ 12:7 यहुदा 1:9 अळतेण ह़रग मे झगड़ो हयो, मीकाईल अने तीना ह़रगदुत अजगर ह़ाते झुमायवा नीकळ्‌या; अने अजगर अने तीना ह़रगदुत तीमनी ह़ाते झुमाया,✝12:7 दानीयल 10:13,21; 12:1; यहुदा 9 8 पण तीहया टेक नी सक्‌या, एतरे तीमनी जुगु ह़रग मे रेवा नो हक नी र्‌यो। 9 ✝12:9 लुका 10:18अने तीहया अजगर ने हेटो धकल देदा, आहयो तीहयोत पेल्‌नो गड़हो से, जीने भुतड़ो अने वेरी केवाड़े, आहयो आखी धरती पोर वाळा ने भटकाड़न्‌यो से, तीने अने तीना दुत ने धरती पोर नाख देदा।✝12:9 उबजणाय कीताप 3:1; लुका 10:18

10 अळतेण मे ह़रगे गेथी एक उची अवाज आवते ह़मळ्‌यो, "हाव अमारा भगवान नो छुटकारो अने ताखत अने राज अने तीना मसी नो हक उजन्‌तो हयलो से, काहाके अमारा भाय-बेन्‌या पोर गुनो लगाड़वा वाळो, जे रात-दाड़ो अमारा भगवान अगळ तीमनी पोर गुनो लगाड़्‌या करतो हतो,✝12:10 अय्‌युब 1:9-11; जकर्‌याह 3:1 हेटो पाड़ देदा। 11 तीहया गाडरु ना लोय ना कारण सी अने तीमनी गवाय ना बोल ना कारण सी तीनी सी जीक ज्‌या, अने तीहयो आह़फा ना जीव ने मोंगाळ्‌ळो नी जाण्‌यो आञे तक के मोत ने बी वेठ लेदो। 12 करीन ए ह़रग अने ह़रग मे रेवा वाळा, खुस हयो, पण ए धरती, अने दर्‌या, तमारी पोर गरा आय पड़े! काहाके भुतड़ो*12:12 ईबलीस घण-जबर खीजवाय र्‌यो अने तमारीन्‌तां उतर जेलो से, काहाके तीहयो जाणे के तीनी पांह थोड़ीकेत टेम री, री।"

13 जत्‌यार अजगर ना ह़मज मे आयु के तीने धरती पोर हेटो धकल देदा, ता तीहयो तीहयी बयर ने जे सोरो पयदा करली, तीनी पसळ पड़्‌यो। 14 पण तीहयी बयर ने मोट्‌ला घुवड़ ना बे पाखड़ा आप्‌या के गड़हा नी अगळ गेथी उडीन जंगल मे तीहया जागे जत रेय, जां ह़ारीक तीने अजगर ना हमला सी ह़माळीन राखवा मे साड़ी तीन साल तक तीनी देख-रेख हये।✝12:14 दानीयल 7:25; 12:7 15 अने गड़हो तीहयी बयर पसळ आह़फा ना मोडा मे गेथु नंदीन तेम पाणी वयाड़्‌यो के तीने आहयी नंदी मे वयाड़ देय। 16 पण धरती तीहयी बयर नी मदत करी, अने धरती मोडु उगाड़ीन तीहयी नंदी ने जे अजगर आह़फा ना मोडा मे गेथो वयाड़लो पी जी। 17 अळतेण तीहयो अजगर बयर पोर घण-जबर रीह कर पड़्‌यो, अने बयर नी बीजी अवल्‌यात नी ह़ाते जे भगवान ना हुकम माने अने ईसु नी गवाय देवा टेकला से, तीमनी ह़ाते झुमायवा करीन चाल पड़्‌यो। 18 अने गड़हो दर्‌या नी धेकड़ पोर जाय्‌न उबो हय ज्‌यो।