1 ✝अळतेण मे नवलु वादळु अने नवली धरती ने देख्‌यो, काहाके पेल्‌नु वादळु अने पेल्‌नी धरती गायब हय जेली हती, अने दर्‌या बी नी हती।✝ 2 ✝अळतेण मे चोखलु ह़ेर नवलु यरुसलेम ने ह़रग मे भगवान ने तां गेथु उतरते देख्‌यो।✝ तीहयु तीहयी लाडी ह़रकु हतु जे आह़फा ना लाडा जुगु ह़ींगराय। 3 अळतेण मे राजगादी मे गेथो काना ने उची अवाज सी आहयु केते ह़मळ्‌यो, "देख, हाव भगवान नु घोर माणहु नी वच मे से। अने तीहयो तीमनी ह़ाते रेहे, अने तीहया तीना माणहु केवायहे। अने भगवान खुद तीमनी ह़ाते रेहे अने तीमनो भगवान केवायहे।✝ 4 अने तीहयो तीमना डोळा ना आखा आंहवा नुस देहे। अने आनीन अळतेण मोत नी रेय, अने नी दुख, अने नी रड़वा-कलपवा नु रेय, अने नी वेला रेय; पेल्‌नी वात हाव खत्‌तम हय जी।" ✝

5 अने जे राजगादी पोर बहलो हतो, तीहयो केदो, "देख, मे आखु कंय नवलु कर देम।" अळतेण तीहयो केदो, "लीख ले, काहाके आहयो बोल भरहो करे एवो अने खरलो से।" 6 अळतेण तीहयो मने केदो, "आहयी वात पुरी हय ज्‌यी। मे अल्‌फा अने ओमेगा, आदी अने अन्‌त से। अने जे कोय तहरेलु से तीने मे जीवाय ना पाणी ना झोर मे गेथु फीरी मे पाणी पीवा नो हक आपही।✝ 7 जे जीक जहे, तीहयोत आहयी चीज ने हात करहे, अने मे तीमनो भगवान केवायही अने तीहया मारा सोरा।✝ 8 पण बीहण्‌या, अने भरहो नी करन्‌या, गलत काम करन्‌या, हत्‌यारा, छीनाळु करन्‌या, बड़वाय, मुर्‌ती पुजा करन्‌या, अने आखा झुटा नो वाटो तीहयी दर्‌या मे जड़हे, जे आक्‌ठु अने बारुद सी धपती रेय: आहयी बीजी मोत से।"

9 अळतेण जे ह़ात ह़रगदुत पांह ह़ात आखरी गरा सी भरला ह़ात कटोरा हता, तीमनी माय्‌न एक जणो मारीन्‌तां आयो, अने मारी ह़ाते वात करीन केदो, "आंखर आव, मे तने लाडी मतलब गाडरु नी लाडी देखाड़ही।" 10 ता मे आत्‌मा नी लारे घेरवाय ज्‌यो, अने ह़रगदुत मने एक मोट्‌ला अने उचा बड़ा पोर ली ज्‌यो, अने तीहयो मने चोखलु ह़ेर यरुसलेम देखाड़्‌यो, तीहयु भगवान भणी ह़रगे गेथु हेटु उतरतु हतु।✝ 11 भगवान नी बड़ाय तीमनी मे हती अने तीमनु वीजाळु* घण मोगला दगड़ा, मतलब, पपलन्‌या दगड़ान तेवु चोखलु हतु। 12 अने तीनी च्‌यारो-मेर एक मोट्‌लु अने उचु भीतड़ु हतु, अने तीना बारे फाटा हता, अने आखा फाटे एक-एक ह़रगदुत रखवाळ्‌या हता; अने तीहया फाटे ईस्‌रायल ना बारे घोराणा नु नाम लीखलु हतु। 13 आनी मे गेथा तीन फाटा उगवणा, तीन फाटा धुराव, तीन फाटा दखणाव, अने तीन फाटा बुडवणा हता।✝ 14 आहयु ह़ेर बारे दगड़ा नी नीव पोर बणावलु हतु, अने एक-एक पोर गाडरु ना बारे नेवताळा ना नामु लीखला हता। 15 जे ह़रगदुत मारी ह़ाते वात करतो हतो तीनी पांह ह़ेर अने तीना फाटा अने तीनु भीतड़ु ने मापवा जुगु एक ह़ोना नी मापवा नी ह़ोटी हती।✝ 16 तीहयु ह़ेर च्‌यार खुट्‌यु वहलु हतु अने तीहयु जेतरु चवड़ु हतु, तेतरु नाम्‌बु हतु; अने तीहयो तीहयी ह़ोना नी मापवा नी ह़ोटी सी तीहयु ह़ेर ने माप्‌यो, ता बे हजार च्‌यार ह़ोव कीलोमीटर नु नीकळ्‌यु: तीहयु नाम्‌बु उचु अने चवड़ु बराबर हतु। 17 तीहयो तीनु भीतड़ु ने माणहु ना माफ सी जे ह़रगदुत ना हात मे हतो माप्‌यो, ता बे ह़ोव ह़ोळ्‌ळे फीट नीकळ्‌यु। 18 तीनु भीतड़ु मोगला दगड़ा सी बणलु हतु, अने ह़ेर एवु चोखलु ह़ोनु नु हतु जे वारला काच ने तेवु हय। 19 तीहया ह़ेर नी नीव आखा भाती ना मोगला दगड़ा सी ह़जाड़ली हती; पेल्‌नी नीव नो दगड़ो योसोब नाम नो रात्‌लो हतो, बीजी नीव नो दगड़ो नीलमणी नाम नो जामण्‌यो एवो हतो, तीसरी नीव नो दगड़ो लालड़ी नाम नो लीलोगार हतो, अने चवथी नीव नो दगड़ो मरकत नाम नो लील्‌लो एवो हतो। 20 पांचवी नीव नो दगड़ो गोमेदक नाम नो भुरलो दगड़ो हतो, छठवी नीव नो दगड़ो माणीक्‌य नाम नो रात्‌लो हतो, ह़ातवी नीव नो दगड़ो पीतमणी नाम नो पीळ्‌ळो हतो, आंठवी नीव नो दगड़ो पेरोज नाम नो लीलोगार हतो, नव्‌वी नीव नो दगड़ो पुखराज नाम नो पीळ्‌ळो हतो, दसवी नीव नो दगड़ो लहसनीया नाम नो लीलोगार हतो, ग्‌यारवी नीव नो दगड़ो राहु नाम नो लील्‌लो हतो, बारवी नीव नो दगड़ो याकुत नाम नो जामण्‌यो हतो। 21 बारोव फाटा बारे मोती ना हता; एक-एक फाटो एक-एक मोती नो बणलो हतो। ह़ेर नी ह़ड़क वारला काच ने तेवी चोखलु ह़ोनु नी हती✝।

22 मे तीहया ह़ेर मे कानो बी मंदीर *नी देख्‌यो, काहाके जोरभर्‌यो मालीक भगवान अने गाडरु तीमनो मंदीर से। 23 तीहया ह़ेर मे दाहड़ु अने चांद नु वीजाळु नी जोवतु, काहाके भगवान ना तेज सी तां वीजाळु हय र्‌यु, अने गाडरु तीनो दीवो से।✝ 24 कळी ना माणहु तीहयु वीजाळु मे चालहे फीरहे, अने धरती पोर वाळा राजा आह़फा-आह़फाम नु आखु माल-धन तीनी मे लावहे।✝ 25 तीना झापला दीहु कारु बी नी देय, अने रात तां नी हये। 26 माणहु जाती-जाती ना वीजाळु अने बड़ाय नु ह़मान तीनी मे लावहे।✝ 27 पण कानी बी वीटळ्‌ळी चीज तीनी मे नी भराय सके, अने नी गलत काम करवा वाळा, अने नी झुट मेकवा वाळा मोय नी भराय सके, पण तीहया माणहु एतरात जीमनु नाम गाडरु नी जीवाय नी कीताप मे लीखलु से।✝