1 जे घटना के बाद अब्राम एक दर्सन देखी। उन्हैं प्रभु को जौ संदेस मिलो, "अब्राम मत डराबै। मैं तेरी ढाल हौं तोकै हर खतरा से बचांगो और तोकै भौत बड़ो इनाम दुंगो।"

2 तौ अब्राम जबाब दई, "प्रभु, मैं तौ बिन औलाद हौं और अब तेरे इनाम से मोकै का फायदा है? मेरे परिवार को एकै वारिस दमिस्क नगर को एलीएजेर आदमी होगो।* 3 अब्राहम कही तू मोकै कोई औलाद नाय दौ, और जौ बजह से मेरे घर मै जनमो दासन मैं से कोई एक मेरी सम्पत्ति को वारिस होगो।"

4 फिर बौ प्रभु कै फिर जौ कहत सुनी, "जौ दास एलीएजेर तेरी सम्पत्ति को वारिस नाय होगो; बल्कि तेरो अपनो लौड़ा तेरो वारिस होगो।" 5 प्रभु बाकै दुआरे लै जाएकै कही, "आसमान के घाँईं देख और तारन कै गिनन की कोसिस कर; तेरो बंस ऐसोई होगो।"

6 अब्राम प्रभु ऊपर भरोसा करी, और प्रभु बाके विस्वास कै देखकै बाकै धार्मिक बोली।

7 फिर प्रभु बासे कही, "मैं प्रभु हौं, जो तोए कसदियन के ऊर नगर से निकार कै लाओ, कि जौ देस कै तेरे अधिकार मैं देमौं।"

8 लेकिन अब्राहम पूँछी, "प्रभु, मैं कैसे जानंगो कि जौ देस मैं मेरो ही अधिकार होगो?"

9 बौ अब्राम कै जबाब दई, "मेरे ताहीं एक बछिया, एक बकरिया और एक भेंड़, जो सब तीन-तीन साल के होमैं, और एक धौंरिया और एक कबूतर लै आ।" 10 और अब्राम जे सब जानवरन कै परमेस्वर के झोने लाई, और इनकै बीच से दुई टुकड़ा मैं बाँट दई और जे टुकड़न कै एक दुसरे के सामने धर दई; लेकिन पक्छिन के टुकड़ा नाय करी। 11 जब मांसाहारी पक्छी इनके ऊपर झपेटा मारी, तौ अब्राम इनके झुंग कै भजाए दई।

12 जब दिन ढलन लग्गौ, तौ अब्राम गहरी नींद मैं सोए गौ, और तभई बाकै घोर अंधकार और डर की दहसत छाए गई। 13 प्रभु बासे कही, "अब्राहम तेरो बंस परदेस मैं परदेसी रहेगो; बे हुँआँ दास रहमंगे और चार सौ साल ले उनके संग बे बुरो बर्ताव करंगे। 14 फिर जो देस के बे दास होंगे उनकै मैं सजा दुंगो, और जाके बाद बे भौत सेठ हीकै हूँना से निकरंगे। 15 तौ अब्राहम अपने पुर्खन के संग सांतिपूर्ड़ जागो, और तोकै तेरे बुढ़ापे मैं मट्टी देंगे। 16 लेकिन बे चौथी पीढ़ी मैं हिंयाँ दुबारा से आंगे, काहैकि अब तक एमोरी जाति को अधर्म पूरो न भौ है।"

17 जब दिन मुंद गौ और घोर अंधियारो छाए गौ, तौ एक धुआँ और एक आगी को खम्मा और एक जलत भई मसाल बे मरे भै जानवरन के टुकड़न के बीच से हुईकै गई। 18 बहे दिन प्रभु अब्राम के संग वाचा भाँदी, और बासे कही, "मिस्र देस की नदिया से लैकै फरात नाओं की बड़ी महानद ले जित्ते देस है बे मैं तेरे बंस कै देथौं, 19 मतलब केनिया, कनिज्जिया, कदमोनिया 20 हित्ती, परिज्जी, रापाईन, 21 एमोरिया, कनानी, गिर्गासिया और यबूसियन देस, मैं जौ सब तेरे बंस कै दै दौ हौं।"