1 अब्राहम दुसरी बईय्यर से बिहा करी, जोको नाओं कतूरा रहै। 2 और बासे जिम्रान, योछान, मेदान, मिद्यान, यिसबक, और सूआ पैदा भै। 3 योछान सेबा और ददान को दऊवा रहै, और ददान के वंस असूरीम, लेतुसिम और लुम्मी रहै। 4 मिद्यान को लौड़ा एपा, एपेर, हनोक, अबीदा और एल्दा भै। जे सब कतूरा के वंस के रहैं।

5 अब्राहम अपनो सब कुछ इसहाक कै सौंप दई; 6 लेकिन जब तक अब्राहम जिंदो रहो, तब तक बौ अपनी दुसरी उपबईय्यर से पैदा भै लौड़न कै भेंट दई। बौ जे बालकन कै अपने लौड़ा इसहाक से दूर अगार दिसा के इलाका मैं भेज दई।

7 जब अब्राहम की कुल आयु एक सौ पिचत्तर साल भई। 8 तौ अब्राहम आखरी सांस लई, बौ बुढ़डो और लम्बी उमर को रहै। बाको अच्छी पकी उमर मैं मौत भई और बौ अपने पूर्वजन मैं जाएकै मिल गौ। 9 बाको लौड़ा इसहाक और इस्माएल बाकै ममरे के अगार दिसा मैं मकपेला गुफा मैं, जो हित्ती सोहर के लौड़ा एप्रोन को खेत रहै, मट्टी दई। 10 जौ बौ खेत रहै जोकै अब्राहम हित्तिन से मोल लई रहै; अब्राहम और बाकी बईय्यर सारा दोनों कै हूँनै दफन करो गौ। 11 परमेस्वर अब्राहम की मौत के बाद, बाके लौड़ा इसहाक कै आसीस दई, इसहाक वीर लहई-रोई नाओं मतलब "कुआँ जो जीवित प्रभु मोए देखथै" बहे के झोने रहत रहै।

12 अब्राहम के लौड़ा इस्माएल की वंसावली, जोको सारा की मिस्री दासी हाजिरा अब्राहम से जनम दई रहै, 13 इस्माएल के लौड़न के नाओं, उनके जनम के क्रम के हिसाब से ऐसे करकै हैं, इस्माएल को जेठो लौड़ा नबायोत रहै। बाके बाद: केदार, अदबएल, मिबसाम, 14 मस्सा, दूमा, मस्सा, 15 हदद, तेमा, यतूर, नापीस और केदमा। 16 जेईं इस्माएल के लौड़ा रहैं। इनके नाओं के हिसाब से इनके गांवों और पहाड़न कै नाओं भी रखे गै। और जेईं बाहरै अपने-अपने जनजातियन के सासक बने। 17 जब इस्माएल की कुल उमर एक सौ सैंतीस साल भई, तौ बौ आखरी सांस लई, और अपनी ज्यान छोड़ दई। बौ अपने मरे भै पूर्वजन मैं जाएकै मिल गौ। 18 बाके बंसज हवीला से सूर ले, जो मिस्र देस के अगार मैं और अस्सूर के रास्ता मै है, रहत रहैं। हर एक अपने भाई-बंधु के खिलाप बसो भौ रहै।

19 अब्राहम इसहाक कै जनम दई है, 20 जब इसहाक चालीस साल को भौ, तौ बौ पद्दन-अराम के रहन बारे अराम वंस के बतूएल की लौड़िया और लाबान की बहेनिया रिबका से बिहा करी। 21 काहैकि रिबका की कोई औलाद नाय रहै, इसहाक बाके ताहीं प्रभु से प्रार्थना करी। और प्रभु बाकी प्रार्थना सुन लई, और रिबका पेट से ही गई। 22 बाके जुड़वा बच्चा होन बारे रहैं और बच्चा पैदा होन से पहले, बे बाके गर्भ मैं एक-दूसरे से मार-पिटाई करत रहैं। रिबका कहीं, "अगर ऐसिये होत रहो तौ मैं काहे जीमौं?" जौ बजह से बौ प्रभु से जबाब माँगन गई।

23 प्रभु बासे कही,

तेरे कोक मैं दुई जाति हैं;

तोसे जनम लेत खिना कि दुई जाति अगल हुई जांगी;

एक रास्ट्र दुसरे रास्ट्र से ताकतवर होगो,

बड़ो, छोटे की सेवा करैगो।

24 जब बाको जनम देन को समय आए गौ, तौ बाके जुड़वा लौड़ा भै। 25 पहले को रंग लाल रहै, और बाकी खाल रुआदार कम्मर की तराहनी की रहै, जौ बजह से बाको नाओं एसाव रखो गौ। 26 बाके तुरंत बाद बाको भईय्या कोक से बाहर आओ। बौ अपने हात मैं एसाव की एड़ी कसकै पकड़े रहै, जौ बजह से बाको नाओं याकूब रखो गौ।* जब रिबका उनकै जनम दई, तौ इसहाक की उमर साठ साल रहै।

27 जब दोनो लौड़ा बड़े ही गै, तौ एसाव जंगल मैं रहन बारो एक अच्छो सिकारी बनो, लेकिन याकूब एक सांत आदमी रहै जो घर मै ही रहत रहै। 28 इसहाक एसाव कै प्यार करत रहै, काहैकि बौ एसाव के मारे गै सिकार को मास खात रहै, लेकिन रिबका छोटे लौड़ा याकूब कै प्यार करत रहै।

29 एक दिन जब याकूब दार पकात रहै, तौ एसाव जंगल से आओ। बौ भूंको रहै। 30 और एसाव याकूब से कही, मैं भूंको मर रौ हौं; जो तू बनाओ है मोए बौ लाल चीज मैं से कुछ दे। जौ बजह से बाको नाओं एदोम कहो गौ।*

31 याकूब जबाब देथै, "अगर तैं मोकै पहलोठे लौड़ा के तराहनी अपनो अधिकार देगो तौ मैं जाकै तोए दै दुंगो।"

32 एसाव कही, "देख! मैं मरनबारो हौं; जौ अधिकार को मेरे ताहीं का फायदा?" 33 याकूब बाकै जबाब दई, "पहले मोसे कसम खा। और एसाव कसम खाई, और बाकै अपने जेठो होन को अधिकार बेंच दई।" 34 तौ याकूब बाकै कुछ रोटी और कुछ मसूर की दार दई। बौ फिर खाई-पी और फिर उठकै चले गौ। ऐसे करकै एसाव अपने बड़े लौड़ा होन के अधिकार कै तुच्छ समझी।