João 13

Lachibuni Hesusu hagudi lani disipulugu

1 Ábanrügaali weyu lubá Luéyuri Esefuruni. Subudi laali Hesusu luagu chülüha lan oura lun lígiruni ubóu le lun lidin lumoun Lúguchi. Súnwandan meha hínsiñe hamá lánigu ha ubouagubaña lun, ani ítara liña hínsiñe lun dagá lagumuhóun.

2 Da laaliti buga Mafia saminaü lidoun Húdasi Isükarióte lun lederegeruni Hesusu houn láganiñu. 3 Lau sun subudi lani Hesusu luagu lúmagiñe lan Bungiu liabin, ani lúmounba lan giñe Bungiu lagiribuda, subudi lumuti meha giñe luagu ru laali lan Úguchili sun katei lúhaburugun. 4 Dan lubeiti hadineruña lan, aba lásaarun luéigiñe dábula, aba laragachunu lidáü, aba lagüürün aban tuaya liranaagua. 5 Aba líchugun duna lidoun aban dabarasi, aba lagumeserun achibei hagudi disipulugu, aba laragahani tau tuaya to liranaaguaboun.

6 Dan yebe le lachibaali lubéi lugudi Simón Féduru, aba lariñagun Féduru lun:

—Nabureme, bachibaali san nugudi?

7 Aba lariñagun Hesusu lun:

—Guentó, úati gunfuranda bani le nadügübei, gunfuranda bubéi lárigiñe.

8 Aba lariñagun Féduru lun:

—Machibun bubéi nugudi!

Lariñaga Hesusu lun:

—Anhein machibun nan bugudi, siñabei gafanran ban numa.

9 Aba lariñagun Simón Féduru lun:

—Mámarügüla nugudi bachiba, chibabei giñe núhabu luma nichügü.

10 Lariñaga Hesusu lun:

—Le ágawaalibei, lugudirügüñein abusenra lachibúniwa, ladüga harumati líbiri lúgubu. Huguya, harumatün, luéidigia aban hídangiñe.

11 Le lariñagunbei luagu mama lan sun hagía harumatiña, ladüga subudi lani kaba lan ederegerei.

12 Lásurun lachibuni Hesusu hagudi, ábaya ladaürünu lidáü, ábaya lañuurun luagu dábula, aba lariñagun houn:

«Gunfuranda humuti san le nadügübei hun? 13 Huguya agúahatün nun Máisturu luma Nabureme, ani richatün ladüga ítara liña; 14 ánheinti chibá nubalin hugudi lau sun Humaisturun nan ani Habureme, lunti giñe hachibuni hugudi húmagua. 15 Rúhadina aban hénpulu hun lun hadügüni libeméme le nadügübei. 16 Ninarün hau luagu míñugun lan ni aban musu luéi liyubudiri, ni aban le ounahóuti luéi le óunahabalin. 17 Anhein gunfuranda humá burí katei le ani adüga humeime, gúndaabadün.