1 Lárigiñe Abimélekü, ñeinñein aban wügüri gíriti Tolá, lídangiñe lani Isakárü türibu liráü Puá libari Dodó iñuraguati lun lesefuruniña Ísüraelina. Samirü bugaha laganawa Tolá, luagu luwübüri Éfürain, 2 aguseragüdati Ísüraeli luagu wein-ǘrüwa-irumu, darí lounwen, aba hábununi uburugu Samirü.

3 Lárigiñe aba liñuragun Hairü le Galaadüna, lun lagumadihan Ísüraeli luagu wein-biama irumu. 4 Darandiñanu lirahüñü Hairü, kada aban hádangiñe luagu burigü héibuga, ani darandiñein haburugute lóubawagu Galaadü. Uburugu burí ligía, «luburugute Hairü» líribei dagá lumoun guentó.

5 Dan le lóunwenbei Hairü, aba labunún uburugu Kamón.

6 Ábayati hadügüni Ísüraelina le wuribabei ligibugiñe Wabureme, áhuduragua houn ámuñegueinarügü liyawa Baali luma Asütárüte, luma houn lubungiutegu Siria, Sidón, Moabü, Amón luma houn habungiutegu Filistéana. Ígira hamuti Wabureme ani aba máhuduragunhaña lan lun. 7 Ligía lébunabei lagañidun Wabureme hama, aba lederegeruniña lábugiñoun habafu Filistéana hama Amonna. 8 Lúmagiñe dan ligía, luagu disiwídü irumu rútiña Filistéana hama Amonna lidere dan houn sun Ísüraelina ha aganóubaña Galaadü loubafurugu Hordán, lidan hamúan Amoruna. 9 Hiñugua hamuti giñe Amonna Hordán lun houdin ageindagua hama lani Hudá, Benhamín luma Éfürain türibu, aba hadariragun Ísüraelina houngua lidan saragu idiheri. 10 Ábati hamuriahan luma Wabureme lun líderaguniña, hariñaga lun:

—Wabungiute, afigouhaadiwa bigibugiñe, lugundun ígira wamaadibu lun wáhuduragun houn báaligu.

11 Lariñaga Wabureme houn:

—Rúhaña Ehiptuna, Amonna, Amoruna, Filistéana, lidere dan hun 12 hama Sidonna, Amaléküna, Madianna; gama lumoun dan le hagúarunbei nun, aba nesefurunün. 13 Lau sun lira, ígira humutina lun hidin áhuduragua houn búngiugu, guentoti mesefudigia naadün. 14 Guentoti heiba amuriaha hama búngiugu ha hanúadahabaña lun híderagunün! Hagía lúnbaña hesefurunün dan le lidan humá lénrengunga!

15 Ábati hóunabuni Ísüraelina Wabureme hariñaga lun:

—Afigouhaadiwa, adügabéi le babusenrun wau, gama lumoun fuleseihabubá woun, sefubáwa guentó!

16 Aba hachagaruniña Ísüraelina búngiugu ha hámabaña lun hagiribudun áhuduragua lun Wabureme, aba mawandun laali lan Wabureme lun hasigirun Ísüraelina asufurira.

17 Aba hóundarun Amonna aba hararamun Galaadü, Ísüraelinati ararama Misüpá. 18 Ísüraelinati ha aganóubaña Galaadü, hama hábutigu, adügatiña aban daradu hámagua, le lan lunbei ábuti lan wuriburugu, ligíaba lan ábuti houn lílana Galaadü.