1 Aba hagañidun lani Éfürain türibu, asigeneha hagía luma Hedeón ladüga buga móunahan lan hawagu dan le láfuridunbei ageindagua hama Madianna. 2 Ábati lóunabuniña:

—Ibidiñeti san hun luagu gíbetima lan le hadügübei sügǘ lau le nadügübei? Gebegitimati murusun le hadügübei sügǘ lau saragu le wadügübei. 3 Derege lumutiña Wabungiute hábutigu Madianna hun Orebü luma Seebü, Kagia katei buiti luéi lira nadügübei? Dan haganbunbalin lánigu Éfürain lariñaguni Hedeón dimurei burí le, aba lásügürün hagañi.

4 Chülüti Hedeón hau ǘrüwa-san wügüriña ha lúmabaña larun duna Hordán aba hánhiñuraguni, lau sun buchá lan buga hawagu lárigi houdin éibaahaña háganiñu. 5 Lariñaga Hedeón houn ha aganóubaña Sukotu:

—Adüga humá aban fulesei nun, ru humá murusun éigini houn gürigia ha númabaña, lugundun buchá hawagu. Wéibaahañanu urúeigu Madianna, Sebá luma Salümuná.

6 Gama lumoun aba hóunabuni ábutigu ha Sukotuna:

—Ragǘ baaña funagia Sebá luma Salümuná, lun wéigagüdübaña lan bisudaranigu?

7 Lariñaga Hedeón houn:

—Lárigiñeme lederegeruni Wabureme Sebá nun lau Salümuná, nagiribudayaba, ábame naheiridaguni hǘgürügü lau hiiyu.

8 Ñéingiñe aba lidin Penueli, aba giñe lamuriahan éigini houn lisudaranigu ítara kei ladüga Sukotu. Ítarameme giñe kei hóunabuniña Sukotuna, ítara liña giñe hóunabuniña Penuelina: 9 Aba lariñagun Hedeón houn:

—Danme nagiribudun lárigiñe nagañeirun, nágurubei wáyelesi le!

10 Ñeinñein Sebá luma Salümuná Karükóru hau keinsi-milu wügüriña ha erederubaña hádangiñe ha aganóubaña lidan burí fulasu le luéigiñebei oubaü le ñéingiñe lubéi laboucha weyu, kei hilagua habéi san-wein-milu hádangiñe. 11 Aba lawanserun Hedeón luéigiñe üma le geyegubei lau fulasu mageirawati, luéigiñe oubaü le ñéingiñe lubéi laboucha weyu libiti Noba luma Hogübeá, aba hábürühan hawagun dan le magaradahan hamá. 12 Aba láfuridun Sebá luma Salümuná éibaagueina, gama lumoun aba léibaahaniña Hedeón, aba lárügüdüniña, aba tabuinchun hanigi súdaragu lau anufudei.

13 Dan le lagiribudunbei Hedeón wuriburugugiñe luéigiñe Éresi, 14 aba lárügüdün aban irahü Sukotuna aba lálügüdaguni; aba labürüdüni irahü ligía hiri ǘrüwa-wein-disedü ábutigu ha Sukotubaña lun. 15 Ábati lidin Hedeón Sukotu, lariñaga houn lílana fulasu:

—Haritagua humagili san héherahan nau luéigiñe Sebá luma Salümuná? Haritagua humagili giñe míchugun humá éigini houn nánigu, ha buchaañabaña uagu, luéigiñerügü márügüdün wamagiña lan? Guentoti añahán!

16 Ábati lanügün Hedeón hiiyu lídangiñe fulasu mageirawati, aba labeichaguniña ábutigu Sukotuna lau. 17 Fui lumuti giñe luayelesin Penueli, aba láfaraguniña lílana uburugu ligía. 18 Lárigiñe aba lálügüdüni Sebá luma Salümuná:

—Ida haña meha wügüriña ha háfaragubaña uburugu Taworu?

Aba hóunabuni:

—Benegegu. Kada aban hádangiñe ítara liña kamá aban liráü urúei.

19 Ábati lagúaragun Hedeón:

—Níbirigu! Níbirigu guánarügü ha háfaragubaña! Ninarün hau kei gabagari lan Wabureme, luagu ánhaña lan hamuga meha máfaragun humutiña, máfaragun nubadün yebe giñe guentó.

20 Aba lariñagun lun Héterü, le liráü le íbugañaü:

—Saraba, áfaraguabaña!

Gama lumoun nibureingili Héterü, hanufudeti lasagarunu lefeinte lun láfaraguniña. 21 Ábati hariñagun Sebá luma Salümuná lun Hedeón:

—Buguyalá áfaraguawa! Luagu lanigi wügüri lasubudirúa! Aba lásaarun Hedeón, aba láfaraguniña, aba lanügüni uéndeni le luágubei hagiina halügüniña kameyu.

22 Ábati hariñagun Ísüraelina lun:

—Kei sefu báadiwa lubéi lábugiñegiñe habafu Madianna, busentiwa lun buguya lan hama badügawagun warúeitegu.

23 Lariñaga Hedeón houn:

—Ni au, ni niráü, meredebadiwa hurúeiteme. Wabureme, ligíaba hurúeite. 24 Le namuriahabei huma, lun híchuguni sun burí bagü le hagidarubei hawéi háganiñu nun, yusu burí hamuti meha súdaragu ha wáganiñu bagü burí golu ligía, lugundun gürigia meha hagía, lídangiñetiñaha fulasu mageirawati.

25 Ábati hábuudun Ísüraelina aban seriweidu múarugu, aba híchuguni sun burí bagü le hagidarubei hawéi háganiñu tidoun, hariñaga lun Hedeón:

—Anihán.

26 Yarafa lun disinéfu kilu lihürü bagü burí golu ligía, bóugudin luéi burí uéndegu, katei burí lauti golu tuma gamisa fínutu to buga hawaguboun lurúeitegu Madián, luma hañari halügüniña kameyu. 27 Aba ladügün Hedeón aban lidáü aniguagu lau golu ligía, aba líchuguni uburugu Ofürá le lageira, aba múaran hamá sun Ísüraelina lun Wabureme tadüga lidáü aniguagu tuguya, aba tiabin lun ábanboun tan sádara lun Hedeón hau liduheñu.

28 Ítara liña herederun Madianna lábugiñe habafu Ísüraelina, miñuragunhaaña buga hawagun. Sun winwan lan Hedeón, ñeinñein darangilaü fulasurugu luagu bián-wein irumu.

29,30 Aba lidin Herubaali lememe Hedeón aganawa lúbiñe guánarügü, ǘrüwa-wein-díisiñanu lirahüñü, ladüga gíbetiña bugaha lúmarigu. 31 Ñeinñoun giñe aban lubúali uburugu Sikemü agaraüdütu aban wügüri irahü lau, aba líchugun Abimélekü lírime.

32 Wéiyaali Hedeón lóunwenbei, aba hábununi lidan lumuaha Hoasi le lúguchi, uburugu Ofürá le hageira lani Abieserü külán.

33 Lárigiñe lounwen Hedeón, ábaya hígiruni Ísüraelina Wabungiute lun háhuduragun tun ámuñegueinarügü liyawadina Baali, aba hanúadiruni Baali-beritü lun habungiuteme. 34 Aba habulieiduni Wabureme le Wabungiute, le bugaha esefurubaliña hawéi sun áganiñu ha geyegubaña hau, 35 ani marufuduntiña areini houn liduheñu Hedeón luagu buiti le bugaha ladügübei houn.