1 Lidan buga dan ligía, marúeitetiña meha Ísüraelina, hayabin lani Dan türibu, mamúangiña meha giñe le hani houngua, háluahañati halíaba lan haganawa. 2 Ábati hóunahan lánigu Dan seingü hádangiñe hawügüriñanigu ha ganigitimabaña, Soragiñe luma Ésütaolugiñe lun houdin aríaahei fulasu aramudaguarügü. Aba houdin seingü wügüriña hagía luagun luwübüri Éfürain, aba hachülürün lúbiñoun Mikaíasi, aba herederun ásügürei áriebu ñein. 3 Dan le hayarafadunbei tun luban Mikaíasi, aba hasubudiruni Lewita le ñeinbei luagu ligaburi ladimurehan, aba houdin, hariñaga lun:

—Ka anügübalibu ñahoun? Ka badügübei ya? Ka báluahabei ya?

4 Aba labahüdagun houn luagu daradu le ladügübei luma Mikaíasi luma luagu ladaradaruni lun ligíaba lan lufadirin. 5 Ábati hariñagun lun:

—Álügüdabei Wabungiute anhein buídubei lubéi lidin woun lidan waweiyasun.

6 Aba lariñagun fádiri lewita ligía houn:

—Heiba lau darangilaü, lóunigirubadün Wabureme luagu héibugun.

7 Ñéingiñe, aba houdin seingü aríaahatiña hagía Laisü. Gürigia ha aganóubaña lidan uburugu ligía, madiheriñu habagarida, kei bugaha hagaburi Sidonna; darangilañu liña habagaridun, úouga añawarihati houn, úouga giñe ni kata hemegeirun. Dísetiña hawéi Sidonna, ani mánitiña ni kata ni ka uma. 8 Ábati hagiribudun seingü aríaahatiña hagía uburugun Sorá luma Ésütaolu, le ñein habéi hapanaagu, ha ariñagubaña houn:

—Ida liñagia lidin hun?

Hariñaga houn:

9 —Éibuga wamaali fulasu ligía ani ariha wamaali luagu buidu lan múa. Sará humá! Keimoun! Meredera humá ñun ñein, madügünga ni kata! Gasu woudin agañeirei múa lira! 10 Danme hachülürün ñein, hadariruba gürigia ha madiheritiña ñein, gürigia ha gíbeti hamúan ani memegeiruntiña ni kata.

11 Aba háfuridun sisi-san wügüriña hádangiñe lani Dan türibu tau hárumate uburugugiñe Sorá luma Ésütaolu, 12 aba hachülürün Hudá, aba herederagun luéigiñe oubaü le ñéingiñe lubéi lálüda weyu libiti Kiriatü-hearimü, lidan fulasu le gíribei guentó likianpun-agei Dan. 13 Ñéingiñe aba houdin luagun luwübüri Éfürain, aba hachülürün lúbiñoun Mikaíasi. 14 Ábati hariñagun seingü ha buga ñǘdünbaña aríaahei fulasu aramudaguarügü houn hapanaagu:

—Subuseti aban katei hun? Tidan muna to, anihein aban tidáü dúnigu hama habungiutegu tílana muna, luma aban guáriua lauti pülata. Kagia haritagubei hadügün?

15 Ábati hígiruniña ha buga aríaahabaña ha híbiri, aba houdin lúbiñe Mikaíasi le ñein lubéi laganawa Lewita, aba habusurun lun. 16 Añahánti buga sisi-san súdaragu ha lánigu Dan bénabu aranseñu tau hárumate agurabaha. 17 Aba hebelurun seingü aríaahatiña hagía, aba hanügüni guáriua, tidáü dúnigu hama búngiugu, sun anihán lan fádiri bénabu hama sisi-san súdaragu.

18 Larihinbei fádiri hebelurun seingü hagía anügei guáriua, tidáü dúnigu hama búngiugu, aba lariñagun houn:

—Ka san hadügübei?

19 Hariñaga lun:

—Maniba, keimoun wama! Busentiwa lun beseriwidun woun kei fádiri, kei aban úguchili! Ma funagia buítimati bun lun hafadirin ban aban hádangiñe lani Ísüraeli türibu, sügǘ lau lun hafadirin ban liduheñu ábanrügü wügüri?

20 Gúndaati fádiri lau katei le, ábati lanügüni guáriua, tidáü dúnigu hama búngiugu, aba lidin hama lánigu Dan, 21 aba houdin hau irahüñü, halügüniña luma hálagu habá habá. 22 Dan le díseeli héibugun, aba lóundaragun Mikaíasi hama lubesinanigu, aba háfuridun hárigi. 23 Dan le haganbunbalin lánigu Dan hagúarahan ha éibaahabaliña, aba hagararaagun, aba hariñagun lun Mikaíasi:

—Ka suserebei bun? Ka uagu bagúaraha wárigi?

24 Lariñaga Mikaíasi houn:

—Barǘ humá nubungiutegu ha nadüga guánarügü ani barǘ huméi giñe nufadirin, ígira humaadina sin ni kata, ani álügüda humagidina ka lan suserebei nun?

25 Hariñaga lánigu lun:

—Mareinchabá woun, gañi liñein aban wádangiñe, ábame lagumuchun bau hau sun biduheñu.

26 Kei larihin Mikaíasi luagu gibe hamá, aba lagiribudun lúbiñoun; ánhaña lánigu Dan aba hasigiruni hémeri 27 lau le hanügübei lúbiñegiñe Mikaíasi lau sun lufadirin, aba hachülürün uburugun Laisü. Lidan uburugu ligía, darangilañu haña gürigia ha ñéinbaña, madiheri hagía, aba lubeiti háfaraguniña lánigu Dan sun ha ñéinbaña tau eféin, aba háguduni uburugu. 28 Kei dise lubéi uburugu ligía luéi Sidón, ani manaaguntiña houngua luma amu uburugu, úati kaba lan esefuraña. Lídanñein fulasu wayati le lani Betü-reobu. Lárigiñe aba hábunagun lánigu Dan lidan uburugu ligía, aba herederun aganawa ñein. 29 Laisü, ligía meha líribei uburugu ligía, aba híchugun Dan luagu, le meha liri hagücha, Dan le liráü Hakobu. 30 Aba hadagaragüdüni lánigu Dan guáriua le hanügübei lúbiñegiñe Mikaíasi ñein lun háhuduragun lun, Yónatan le liráü Gerüsón, libari Moisesi, ligía hafadirinbei. Lárigiñe, aba hafadirinigu hamá lánigu Dan ladügawagun Yónatan, darí lumoun hasagarúniwa adaürawagúa lidan amu fulasu. 31 Ñeinñein lani Mikaíasi guáriua hama sun dan le Siloñoun lubéi lani Wabureme sanduariu.