1 Gama lumoun aba mabuidun lan hóuserun Ísüraelina ligibugiñe Wabureme aba lederegeruniña labun habafu Madianna luagu sedü irumu. 2 Keiti eibu lan dan, éibutima híchugun Madianna lidere dan houn Ísüraelina, le hanufude Ísüraelina hawéi Madianna, aba hadaagun haramudaguagüle wǘbüwagu, lagadábugiñe dübü luma lidan burí fulasu le hénrenguti ladarirúniwa. 3 Súnwandan, lídanha aniheinhali lan somu nadü le bunagua hamaali Ísüraelina, ábaha hayabin Madianna, Amaléküna hama gürigia ha awinwandubaña luéigiñe oubaü le ñéingiñe lubéi laboucha weyu ábürüha hawagun. 4 Áganigutiha ha ábaha herederun aganóua hamúanrugu Ísüraelina, ábaha háhulahani hachari-agei dagá burí lóubawagu Gasa, mígirunga ni kata houn Ísüraelina lun heigin, ni mudún, ni bágasu ni burigü. 5 Tau sun hakianpun hau halügüniña bágasu hebelura hageiroun agünrinchaguei sun le ñeinti. Hayabinha hau halügüniña kameyu, lau hibe kamá hamuga chagagaru lidan hadaani. 6 Áfagatiña Ísüraelina saragu lénrengunga hadüga Madianna, lagumuhóun dan, aba hamuriahan luma Wabureme lun líderaguniña.

7 Dan hamuriahanbei Ísüraelina luma Wabureme lun lesefuruniña hawéi Madianna, 8 aba lóunahan aban profeta houn, le ariñagubei houn:

—Lariñahare Wabureme le Lubungiute Ísüraeli: "Au asagarubalün Ehiptugiñe le meha ñein hubéi keisi idamuni, 9 ani mámarügüñein hawéi Ehiptuna nesefuraün, sefu numutün giñe hawéi sun ha íchugubaña lidere dan hun. Bugagua numutiña higibugiñegiñe, aba níchuguni hamúan hun. 10 Aba nariñagun hun luagu au lan Haburemebei le Hubungiute, ani lun manufudedun humá hawéi habungiutegu Amoruna, ha gamúanbalin le ñein lubéi haganawa guentó; ani meberesentün nau".

11 Ábati liabin lóunagüle Wabureme, aba lañuurun tábugiñe aban tídibu wewe to ñeinboun Ofürá, to lani Hoasi, aban hádangiñe liduheñu Abieserü. Hedeón le liráü Hoasi ñeinñein áfuruhei türigu aramudaguarügü lidan fulasu le ñein lubéi tachuinhóua beibei lun tadügün diwéin, luéi harihini Madianna. 12 Aba larufudagun lani Wabureme ánheli lungua lun, lariñaga lun:

—Anihein Wabureme buma, wügüri héreti, ani ganigiti!

13 Lóunabeiti Hedeón ítara:

—Ferudunabana Nabureme. Anhein anihein lubéi Wabureme wama, kagia uagu lasusereda sun le woun? Hagéi burí sun seini le uágubei hadimureha wagüchagu woun, dan le hariñagun luagu sagá lániwa Wabureme Ehiptugiñe? Bulíei láadiwa Wabureme, ani derege láadiwa lábugiñoun habafu Madianna.

14 Aba larihin Wabureme luagun, lariñaga lun:

—Yusubéi bere lun bidin esefuraña Ísüraelina lábugiñegiñe habafu Madianna. Au óunahabalibu.

15 Ábayati lóunabun Hedeón:

—Ferudunabanaya nabureme, gama lumoun ida lubagia nesefuruniña Ísüraelina? Hádangiñetinaga iduheñu ha gudemetimabaña hadan lani Manasési türibu, ani áutima ñǘraütimabei hádangiñe lirahüñü núguchi.

16 Lariñaga Wabureme lun:

—Gayaraabei badügüni, lugundun búmabadina. Bagañeirubaña Madianna kéigubeirügü bagañeirun ábanrügü wügüri.

17 Ábati lariñagun Hedeón:

—Anhein gañei naali lubéi fulesei búmagiñe, ruba aban seini nun luagu buguya lan adimurehabei numa. 18 Adügabá fulesei nun, mídinba yebe yáagiñe darí nagiribudun lau aban idewesei le lunbei níchuguni bun.

Aba lachoururun Wabureme lun:

—Yáabadina agurabahei bagiribudun.

19 Aba lidin Hedeón, aba laranserun aban liraüraü gábara, adüga ligía fein to maganatu lébini tau kei burí bián kilu fulúaru; aba líchuguni wiñaadu lidoun aban faniñe, rulei iraü lidoun aban sóudieru, aba lidin lau tabun tídibu wewe lun líchuguni lun lani Wabureme ánheli. 20 Aba lariñagun lani Wabureme ánheli lun, lun líchuguni wiñaadu tau fein ligibuagu aban dübü, ábame láwiyuruni iraü. Lárigiñe ladügüni Hedeón le ariñawagúbei lun, 21 aba ladunruni lóunagüle Wabureme wiñaadu tuma fein lau lígiri badun le lúhaburugubei, aba láfuridun watu gemeti lídangiñe dübü, aba lagumuchaguagüdüni watu gemeti wiñaadu tuma fein; lárigiñe lira aba lagumuchagun lani Wabureme ánheli liñúarürugugiñe Hedeón. 22 Dan le lasubudirunbalin Hedeón luagu lani lan Wabureme ánheli, aba lariñagun:

—Nabureme, Nabureme! Ariha naali lani Wabureme ánheli igibu luma igibu.

23 Lariñaga Wabureme lun:

—Manufudedabá, móunwenbadibu. Resibibéi nidarangilaü.

24 Ábati ladügün Hedeón aban latarü ñein lun luéirigun Wabureme, aba líchugun liri: "Wabureme darangilaübei". Aniheingua latarü ligía Ofürá, le haburugute liduheñu Abieserü.

25 Gúñounmeme ligía, aba lariñagun Wabureme lun Hedeón:

—Barüba aban bágasu wügüri hádangiñe lilügüniña búguchi, le habiaman bágasu, le sédübei irumu lau, bágureime lani Baali latarü, le lúmabei búguchi. Bágureime giñe tídibu wewe sánduti le lubadubei lani Baali latarü, 26 Ani adügabá aban latarü lun Wabureme le Wabungiute luagu liñun-agei fulasu le. Banügeime bágasu, le habiaman, dagagüdabéi nun kei adagaragüdüni gudawarügüti, bayusureimeti tídibu wewe sánduti le buga báchugubei wátume.

27 Ábati lanügün Hedeón diisi hádangiñe lubúeingu lun, aba ladügüni sun le uágubei lariñaga Wabureme lun; madügünrügü liñalinti wéyuagu, áriebu ladügei ladüga lanufude hawéi liduheñu lúguchi luma hawéi lílana uburugu. 28 Larugan binaafin, dan le hásaarunbei lílana uburugu, aba harihin luagu fuiwa lan latarü le lani Baali, luma tídibu wewe sánduti le lubadubei, luagu giñe dagagüdawa lan aban bágasu wügüri kei adagaragüdüni le gudawarügüti luáguya aban iseri latarü. 29 Ábati hálügüdagun houngua, hariñaga:

—Ka funa san adügübalin katei le?

Lárigiñe saragu áluahani luma hálügüdahan, aba hasubudiruni ladüga lan Hedeón le liráü Hoasi, aba houdin ariñaga lun Hoasi:

30 —Sagabei biráü, wáfaraali. Fuila lani Baali latarü luma tídibu wewe sánduti le lubadubei!

31 Ábati lóunabuniña Hoasi ha geyegubaña lau:

—Hageindagua san luéigiñe lufulesein Baali? Furumiñeguarügü le ageindaguti luéigiñe lufulesein Baali, hilala lubaragiñe larugadun! Anhein bungiu lubéi Baali, ígira huméi lun lageindagun luéigiñegua, kei ligía lubéi laburemebei latarü le agurúbei.

32 Lúmagiñe dan ligía, aba hagumeserun agúaha lun Hedeón Herubaali, aba hariñagun: «Lageindagua Baali luéigiñegua luma Hedeón le águrubalin lani latarü"."

33 Ábati hayabin sun Madianna, Amaléküna hama ha erederubaña luéigiñe oubaü le ñéingiñe lubéi laboucha weyu, aba hóundaragun, aba hánhiñuraguni Hordán, aba herederagun luagu fulasu wayati le lani Hesüreeli. 34 Gama lumoun aba lebelurun lani Wabureme sífiri lidoun Hedeón, aba línwinrun lau aban liganchun mudún lun hóundarun lánigu Abieserü lumoun; 35 óunaha ligía hawagu sun lani Manasési türibu lun hóundarun lumoun. Óunahati giñe hawagu lani Aserü, Sabulón luma Nefütalí türibu, aba hóundarun lumoun.

36 Lariñaga Hedeón lun Wabungiute:

—Anhein bayusuraadina lubéi lun nesefuruni Ísüraeli, kei bariñaguni, 37 níchigaali luguerun aban mudún lidan fulasu le ñeinba lubéi léferehoua türigu. Laruganme binaafin, anhein düdü lubéi lura mudún lárigi serenu, ani mabei ligíame múa, ligíaba nasubudiruni luagu bayusurubadina lan lun nesefuruni Ísüraeli keisi bariñaguni.

38 Ani ítara liña lasuseredun. Dan le lásaarunbei Hedeón binaafin, aba lagiñuruduni lura mudún, aba lasagarun aba kopu buin lau serenu lídangiñe. 39 Ani ábayati lariñagun Hedeón:

—Magañidabatia numa, ladüga busentina narihin ábanya katei guentó, busentina lun lerederun lura mudún mábeiñu, ladüdürame múa.

40 Aba ladügüni Wabungiute ítara áriebu ligía. Larugan binaafin mábeiñu liña lura mudún, ladüdüra múa lau serenu.