1 Weyu ligía aba teremuhan Débora luma Barakü le liráü Abinóamü ítara:

2 «Ru huméi súngubei uéiriguni lun Wabureme,

ladüga añaheingua wügüriña Ísüraelina aransetiña lun hageindagun.

Ladüga añahagua lan wügüriña waganagua

ha óunabutiña aguarúni lun wuriburugun.

3 Aganba humana, huguya urúeigu!

Aganba humana huguya le agumadihabei!

Neremuha lun Wabureme!

Neremuha lun Lubungiute Ísüraeli!

4 Dan le báfuridunbei Seírügiñe Nabureme,

dan le bídinbei láraabute Edomu,

adadagarati múa,

hingiguati sielu, áhuya ligía huya.

5 Adadagarati wübü ligibugiñe Bungiu

adadagarati Sinaí ligibugiñe Wabureme le Lubungiute Ísüraeli,

6 Lidan lidaani Samügárü, le liráü Anatü,

luma giñe lidan tidaani Haeli,

ígira hamuti ha burí gaweiyasunheibaña üma

aba héibugun lídangiñe üma chigachigaguti;

7 Sun burí lirahüñü aüdü Ísüraeli rédeiti málouga sunsuinagubei.

Darí násaarun, nuguya, Débora,

aba násaarun kei aban úguchuru Ísüraeli!

8 Aba háluahan Ísüraelina iseri bungiu,

ábati ñein lan wuribu fulasurugu,

úati ni aban hádangiñe bián wein milu Ísüraelina anügüti áruma.

9 Nuguya ru numutu nanigi hawagu ábutigu Ísüraelina,

houn ha óunabubaña dan le haguarúniwa lun wuriburugun!

Ru waméi sun uéiriguni lun Wabureme!

10 Ariñaga huméi, huguya burí le agalufehabaña burigü harutiña;

huguya burí, le arúeihabei lau irichaü;

hama sun burí huguya le gaweiyasunheibaña:

11 Yágüta, lidan hátagüle animaalu duna,

lau lamuri asiedu, dimure humá luagu lagañeirun Wabureme,

luagu lagañeirun burí lirahüñü aüdü Ísüraelina!

12 Saraba Débora, saraba, beremuhame aban uremu!

Ánheinti buguya, Barakü, liráü Abinóamü,

iñuraguabá barübaña ha badaürübaña!

13 Ábati harariragun Ísüraelina lun hageindagun hama gabafutiña;

raritiña lisudaranigu Wabureme nuagu,

lun hageindagun hama wügüriña wuriburuguna.

14 Ñéinñanu giñe hádangiñe lánigu Éfürain ararirutiña lidoun fulasu wayati,

hárigi hárigiñanu lánigu Benhamín.

Hádangiñe lánigu Makirü, raritiña ábutigu,

ani hádangiñe lánigu Sabulón, ha gagumadihadibaña.

15 Ñǘdüntiña giñe ábutigu hádangiñe lánigu Isakárü tuma Débora;

Isakárü íchugubei erei lun Barakü,

aba lidin lárigi, lidoun fulasu wayati.

Anhein añahein lubéi wügüriña wéinamutiña tau anigi aransetu hadan lánigu Rubén,

16 kagia uagu heredera lidan hafarügan mudún?

Lun funa san herederun aganbahei hagúarahan amainirutiña mudún?

Hadan lánigu Rubén añahein wügüriña tau anigi hanufudetu!

17 Aba lerederun Galaadü kianpoutu luéigiñe le aban louba Hordán emeraagua;

ánheinti Dan, aba lerederun yarafa tun burí waporu,

liábinti Aserü aba lerederun lárurugu barana ani madiñuti luéigiñe luafuri;

18 lídanti liñun-agei wübü, leredera Sabulón luma Nefütalí íchigei habagari lidoun denchaü.

19 Ábati hayabin urúeigu Taanakün,

yarafa lun lidunari Megidu;

ánhañati urúeigu Kananna hayabin lau saminaü lun hawuribuhan,

lau sun lira mibihintiña pülata ni irisini.

20 Awuribuhatiña waruguma lúmagiñe siélugiñe,

ageindaguatiña lúmagiñe íñugiñe luma Sísara;

21 Buida lumutiña liraüraü duna,

le binadu liraüraü duna, le liraüraü lidunari Kisón.

Buguyaba achuinrei hagülerugu ha gabafubaña!

22 Aganbúati lamuri hagudi gabayu!

Ladüga hagalufehaniña wügüriña ganigitiña ani héretiña!

23 Ariñagati lani Wabureme ánheli ítara:

Heigualá aban lihürü íñarawaguni luagun Merosu hau sun lílana!

Ladüga miabin hamá, kei wügüriña héretiña, ídemueime lun Wabureme.

24 Biniwatá Haeli haganagua würiña, lúmari Éberü le ladügawagun Kaín!

Biniwatá hadan würiña ha tídanbaña kianpu!

25 Lamuriaha Sísara duna tuma; tíchiga Haeli míligi lun.

Míligi tíchugubei lun lidan aban kopu wéndeti!

26 Labadinagua sun lira, aba tanügüni pegi lau tubaünan

barütéi marüdiyu wéiriti lau tóunwenren,

aba tíchugun aban buleseiti lábulugun Sísara

bóugueinatei lichügü, fuduguatei sun lisesun.

27 Aba laguribihan Sísara tugudina Haeli;

lidan laguribihóuniwa lau gáriti aba léiguadun múarugun,

ani ñein lubéi léiguada, ñein lounwe».

28 Aba taganaridun lúguchu Sísara,

luéigiñe funedera lau idiherini tariñaga:

«Ka san uagu ladarasehanbei tachülürün likarün?

Ka san uagu tadarasehanbei likarün to wuriburuguna?»

29 Aba hóunabunu fiu würiña garíaahatiña,

ani íbini tuguya guánarügü ariñaga tumuti túniwagua:

30 «Chóuruti luagu hafanreinhañein lan le hagañeirubei wuriburugu.

Aban o biama idamuni würiña,

lun ábaneina hádangiñe awuribuhatiña;

lun Sísara, gamisa to burí gíbeti tikolorun,

aban gamisa, dagá tumoun biama,

aborudahóuatu lau sun luwuyeri koloru,

lun ligiinébu agañeiruti"."

31 «Ítarala hagünrinchawaguniwa, sun báganiñu Wabureme,

ani ámiriha hamá ha hínsiñehabubaña bun

kei lámirihan weyu lau sun lere!»

Lárigiñebei sun lira ñeinñein darangilaü fulasurugu luagu bián wein irumu.