1 Luagu aban weyu, aba lidin Sansón uburugu Gasa. Aba larihin aban horu ñein, aba lidin ásügürei áriebu tuma túbiñe. 2 Dan hasubudirunbalin lílana Gasa luagu anihein lan Sansón ñein, aba hegeyedaguni uburugu; aba herederun óunigirei lubenari uburugu sun weyu ligía. Guñoun, aba houdin emeraagua, haritagun lun háfaruni hilagubei danme larugadun. 3 Gama lumoun lamidanrügüñein áriebu lau Sansón arumuga ñein. Aba lásaarun, aba láhuluni lubenari uburugu lau sun luagaburi luma lidaünda, aba liñurahani légewagun, aba lanügüni lábulugun wübü le ligibugiñebei uburugu Ebürón.

4 Lárigiñe aba tínsiñedun aban würi aganóutu Sorekü lun Sansón, gíritu Dalila. 5 Aba houdin hábutigu Filistéana tumoun Dalila, aba hariñagun tun:

—Yéeguabei Sansón, subudi báamugei halíagiñe lan libihei lanarime lere, luma ida luba lan wagañeiruni; lun gayara lan wagüraguni. Líchuguba kada aban wádangiñe milu-san murusun pülata bun anhein badüga.

6 Ábati tariñagun lun Sansón:

—Adügabá fulesei nun, ariñagabéi nun halíagiñe lan liabin lanarime bere. Ida luba gayara lan bagürawagun lun siñá lan bafaragaduni?

7 Lariñaga Sansón tun:

—Ánhana agürawagúa lau sedü mibi le mamabeidúngili buidu, neferidirubei nere, ábame nerederun kei furumiñeguarügü wügüri.

8 Aba hanügün hábutigu Filistéana sedü mibi iserigili tun Dalila, aba tagüraguni Dalila Sansón lau. 9 Keiti buga aramudaaru lan átiri wügüriña tirumunrugu, aba tagúaragun:

—Sansón, háfaraadibu Filistéana!

Aba látumuraguni Sansón mibi kamá hamuga filu gudaali. Siñá hamuti Filistéana asubudira halíagiñe lan liabin lere. 10 Tariñaga Dalila lun:

—Yeeda báadina! Beyeehañadina sun dan le! Anati guenlé, ariñagabéi nun ida luba lan gayara lan bagürawagun.

11 Lariñaga Sansón tun:

—Ánhana agürawagúa lau gúrudu le iserigili, le mayusurúngili ni aban wéiyaasu, neferidirubei nere, ábame nerederun kei furumiñeguarügü wügüri.

12 Ábati tanügün Dalila gúrudu iserigili, aba tagüraguni lau, aba tagúaragun:

—Sansón, háfaraadibu Filistéana!

Aramudayatu giñe átiri wügüriña tirumunrugu; Gama lumoun aba látumuraguni Sansón gúrudu, kamá hamuga filu le bürüraüti. 13 Tariñaga Dalila lun Sansón:

—Abunhamémegua eyeedana! Ariñagabéi nun ida luba lan gayara lan bagürawagun!

Lariñaga Sansón tun:

—Le lunbei badügüni, badügün sedü arurahóuni lau nídiburi tau gamisa, ábame bábununi wewe buidu múarugu. Ítara luba neferidiruni nere ábame nerederun kei furumiñeguarügü wügüri.

Ábati tarumaagüdüni Dalila Sansón, aba tanügüni sedü larurahóun lídiburi, aba taruragun gamisa labadinagua, 14 lárigiñe aba tábununi wewe buidu múarugu, aba tagúaragun:

—Sansón, háfaraadibu Filistéana!

Gama lumoun aba lásaarun Sansón, aba láhuluni wewe múarugugiñe tau sun gamisa. 15 Aba tariñagun Dalila lun:

—Yéetibu! Ida liñati bariñagubei luagu hínsiñe nan bun! Ǘrüwaali wéiyaasu béherahan nau, ani mariñagun bágili nun halíagiñe lan liabin bere!

16 Keiti térebei luagu, sun oura tálügüdüñein luagu ábanmeme katei le, aba labuchadun luagu Sansón, aba labusenrun lounwen; 17 aba lubeiti lariñagun tun Dalila:

—Masarúngili nídiburi ni aban wéiyaasu, lugundun deregewañuniña lun Bungiu kei nasaréu lúmagiñe lubaragiñe nágurahoun. Anhein asarúa nídiburi, neferidirubei nere, ábame nedebilidun kei furumiñeguarügü wügüri.

18 Dan tasubudirunbalin luagu ariñaga laali lan inarüni tun, aba tóunahan ariñaga houn hábutigu Filistéana:

—Anati guenlé, higougu, ariñaga laali Sansón lanichigu lere nun!

Ábati houdin tumoun lau seinsu háhaburugu.

19 Aba tarumaagüdüni Dalila Sansón balañu lichügü luagu tiyada, aba tanügün aban wügüri lun líbuguni sedü larurahóun lídiburi. Aba tagumeserun abuleseirei, 20 aba tagúaragun lun:

—Sansón, háfaraadibu Filistéana!

Aba lagagudun Sansón haritagueina luagu lesefuruba lan kéiñaha ligaburi, gama lumoun ibidiñeti lun luagu úaali lan Wabureme luma. 21 Ábati hárügüdüni Filistéana, aba hasagaruni lagu, aba hanügüni uburugun Gasa, aba hagüraguni ñein lau güringüri le buronse, aba híchuguni nadagimein luagu amuligülei furisunrugu. 22 Gama lumoun ábaya lagumeserun lídiburi áhücha.

23 Aba hóundaragun hábutigu Filistéana lun hefeduhan luagu hagañeirun, luma lun hadagaragüdün lun habungiute le Dagón. Hariñagati lidan heremuhan:

«Rula wabungiute Sansón le wágani wáhaburugun"."

24 Dan harihinbaliña gürigia, aba giñe heremuhan lun habungiute, hariñaga:

«Rula wabungiute Sansón le wágani wáhaburugun,

léñaha agünrinchagubalin wanadürigu,

áfaragua ligía saragu wádangiñe hilagubei"."

25 Le lueirin hagundan, aba hamuriahan lun lanügǘn Sansón houn lun héherahan lau. Ábati hasagaruni furisunrugúgiñe, aba híchuguni labadinagua bián wagabu, aba héherahan lau. 26 Ábati lariñagun Sansón lun irahü le árühabalin lúhabu:

—Barübana le ñeinhin lumuti gayara lan naguuruni wagabu le ágüdahabarun ténpulu, busentina nabalachun luagu.

27 Ñéinñanu sun hábutigu Filistéana ténpulurugu, buin tiña ténpulu hau gürigia, dandu wügüriña kei würiña. Ñéinñanu giñe hawara ǘrüwa-milu gürigia íñugiñe tibiti muna, aríaguei héherahan ha híbiri lau Sansón. 28 Ábati lafurieidun Sansón lun Wabureme, lariñaga lun:

—Nabureme, ayumuraguatina bun lun baritagun nuagun ábanraüya wéiyaasu, lun bíchugun erei nun lun nafayeiragüdüniña Filistéana luagu hasagaruni nagu.

29 Aba láluahani bián wagabu le tamidanguabei ténpulu lau lúhabu, le ágüdahabarun ténpulu, aba líchuguni lúhabu le lóunwenren luagu aban wagabu le lubaünan luagu le aban, 30 aba lagúaragun:

—Hilagua hamá Filistéana úara numa! Ábati ládaruni wagabu lau sun lere!

Aba tábürühan ténpulu hawagun hábutigu Filistéana hama sun ha ñéinbaña. Gíbetimatiña ha láfaragubaña Sansón dan le lóunwenbei sügǘ hau ha láfaragubaña lidan sun libagari.

31 Lárigiñe aba hayabin líbirigu Sansón hau sun liduheñu, aba hanügüni lúgubu, aba hábununi labadinagua Sorá luma Ésütaolu, lidan lumuaha Manóa le lúguchi. Rédeiti Sansón hábutime Ísüraelina luagu wein irumu.