1 Luagu aban weyu, aba laragachun Sansón fulasurugún Timüná, aba larihin aban würi Filistéana, aba tínsiñedun lun; 2 dan lagiribudun hábiñoun, aba labahüdaguni houn lagübürigu. Lariñaga houn:

—Arihaadina aban würi Filistéana uburugu Timüná. Amuriaagüda humóun nun lun namarieidun tuma.

3 Hariñaga lagübürigu lun:

—Kábagia uagu bidin áluaha búmari hadan Filistéana ha gíbebaña ubungiute? Úatiña funagia würiña hadan waduheñu o hadan sun Ísüraelina?

Lariñaga houn:

—Tuguya würi to hínsiñeboun nun, ani busentina hibihinu nun, lun númarime.

4 Ibidiñeti yebe houn lagübürigu luagu Wabureme lan aransehabei lun ítara luba lan, láluguña lébuna lageindagun hama Filistéana ha agumadihabaña Ísüraeli lidan dan ligía. 5 Aba lubeiti lidin Sansón hama lagübürigu uburugu Timüná. Dan lachülürünbei Sansón lubeibein-ágeirugu uburugu, aba liabin aban liñún ñǘraügili adürürühéina luagun. 6 Ábati liabin lani Wabureme Sífiri luagun Sansón, aba lapiisihani Sansón liñún ligía lau lúhabu kamá hamuga aban liraüraü gábara; gama lumoun mabahüdagun lumuti houn lagübürigu. 7 Lárigiñe, aba lidin aba ladimurehan tuma würi to buga ínsiñeduboun lun.

8 Átiri weyu lárigiñe, dan le lagiribudunbei Sansón lun lamarieidun tuma würi tuguya, aba lidin arihei liñún le buga láfarubei, aba ladarirun aban haban maba luma sírudu lidan lúgubu, 9 aba lasagaruni haban maba ligía lau lúhabu aba lidin áteinalei. Dan le ladunragunbei hama lagübürigu, aba líchugun sírudu houn, aba hátuni gama lumoun mariñagunti houn luagu lídangiñe lan liñún le láfarubei lasagarei.

10 Aba lidin lúguchi Sansón arihoun würi; aba ladügün Sansón aba fedu ñein según hagaburi wügüriña nibureintiña. 11 Gama lumoun kei hanufudebei Filistéana luéi, aba hanügün darandi umadagu lun ñein hamá luma. 12 Lariñaga Sansón houn darandi hagía:

—Níchiga aban dibinasu hun. Anhein hóunaba kei lubudubu lidan sedü weyu le lunbei ladurarun fedu, níchuguba aban idáü tautu linu fínutu tuma aban daüguaü to lánina fedu lun kada aban hídangiñe. 13 Gama lumoun anhein móunabun humá, líchuguba kada aban hídangiñe idáü tautu linu fínutu tuma aban daüguaü to lánina fedu nun.

Hariñaga lun:

—Ariñagabéi dibinasu, waganbaali.

14 Lariñaga Sansón:

«Furiti éigini lídangiñe le éigibei,

furiti ibimeni lídangiñe le hérebei"." Káteigia?

Ǘrüwabei weyu lárigiñe, madari hamagili lóunabagüle dibinasu; 15 luagu ligadürün weyu, aba hariñagun tun lúmari Sansón:

—Houchabá lun líchuguni búmari lóunabagüle dibinasu woun, anhein míchugun lan, wágudubadibu hau sun liduheñu búguchi. Laganóun woun kamá hamuga lun hagidaruni wámati wawéi hamisurahawa lidoun fedu le!

16 Ábati tidin lumoun Sansón, aba tariñagun lun ayahuaheina:

—Buguya, mínsiñetina bun! Iyereegutina bun! Rúhadibu aban dibinasu houn nupaisanun gama lumoun mariñagun bumuti lóunabagüle nun.

Lariñaga Sansón tun:

—Ni houn nagübürigu mariñagun nágili, mariñaguntima nubéi bun.

17 Aba tasigirun ayahua lubadu, sédügubei weyu le ladurarubei fedu, héretu luagu, darí lun lariñaguni lóunabagüle dibinasu ligía tun luagu lisedün weyu. Ábati tidin, aba tasubudiragüdüni houn tupaisanun. 18 Luagu lisedün weyu, lubaragiñe lálüdün weyu, aba houdin Filistéana ariñaga lun Sansón:

«Úati katei bímeti luéi sírudu,

ua héreti luéi liñún"."

Lariñaga Sansón houn:

—Lun hamuga mawouhantün tau núute, masubudirun hubéi yebe lóunabagüle dibinasu le.

19 Lárigiñe aba liabin lani Wabureme Sífiri luagun Sansón; ábati lidin Sansón Asükalón, aba láfarun darandi wügüriña lílana fulasu ligía, aba lafayeiruniña ha óunabubalin dibinasu tau daüguaü to lagidaruboun hawéi. Lárigiñe, aba lagiribudun lau igañi lúbiñoun lúguchi, 20 aba tichugún lúmari lun aban hádangiñe lumadagu.