1 Gama lumoun ábaya hadügüni Ísüraelina le wuribabei ligibugiñe Wabureme, aba lederegeruniña Wabureme labun habafu Filistéana luagu bián-wein irumu.

2 Ñeinñein aban wügüri uburugu Sorá, hádangiñeti lani Dan türibu gíriti Manóa. Maraütu lúmari ladüga maraüheitu. 3 Gama lumoun aba lasaliragun lani Wabureme ánheli tun, lariñaga tun:

—Buguya, siñagili bagaraüdün ni aban wéiyaasu, gama lumoun badageinadá guentó, ábame bagaraüdün aban wügüri irahü. 4 Gama lumoun matabá diwéin, ni amu uniñein le héreti, meigin buguyame katei le wíyeti ligibugiñe Bungiu, 5 bagaraüdüba aban irahü, masarúnbei lídiburi, ladüga deregewañubei irahü ligía lun Wabungiute lúmagiñe lubaragiñe lágurahoun, lun ligíaba lan agumesera esefurei Ísüraeli lábugiñegiñe habafu Filistéana.

6 Aba tidin abahüdaguei lun túmari, tariñaga lun:

—Ñǘbuinti aba leyerite Wabungiute le ñein nubéi, aba taweiridun nanigi, ladüga laganóun nun, kamá hamuga lani guánarügü Wabureme ánheli. Málügüdün numuti katei lan, ni ligía mariñagun lumuti nun. 7 Le lariñagubei nun, luagu nagaraüdüba lan aban eyeri irahü, lun lan matun nan diwéin lúmagiñe guenlé, matun nuguyame amu uniñein héreti, meigin nuguyame ni kata le wíyeti, ladüga deregewañu luba lan irahü ligía lun Wabungiute kei nasaréu lun sun libagari.

8 Ábati lariñagun Manóa lun Wabureme lidan lafurieidun:

—Amuriahatina buma Nabureme lunya bóunahani wügüri ligía woun, ariñaga láamugei woun kaba lan wadüga lau irahü le lunbei lágurahoun.

9 Aba lóunabuni Wabungiute lafurieidun Manóa, ábaya lasaliragun lani ánheli tun lúmari Manóa áraabu. Kei ua lubéi Manóa ñein, 10 aba tidin éibaagueina, tariñaga lun:

—Saliguaya eyeri le narihubei ligirabuga nun!

11 Aba lásaarun Manóa, aba lidin tuma le ñein lubéi wügüri ligía, lariñaga lun:

—Buguya san adimurehabei tuma númari tugurabuga?

Lariñaga lun:

—Anha, au.

12 Ábati lariñagun Manóa lun:

—Danme lagunfulirun le bariñagubei woun, ida lubagia luwuyeri wagüriahani irahü ligía? Kábagia wadüga lau?

13 Lariñaga lani Wabureme ánheli lun:

—Tadügeime búmari sun le nariñagubei tun: 14 Lun matun tan diwéin, ni amu katei le tídangiñeti beibei, ni amu uniñein le héreti, meigin tuguyame ni kata le wíyeti ligibugiñe Bungiu. Adügatéi le nariñagubei tun.

15,16 Ibidiñounga lun Manóa luagu lani lan Bungiu ánheli wügüri ligía, aba lariñagun lun:

—Rédeiba wama lun beigin aban liraüraü gábara le lunbei wábouguni bun.

Lariñaga ánheli ligía lun:

—Íbini ánhana hamuga eredera, siñabei hamuga neigin buma. Gama lumoun gayaraati bíchuguni liraüraü gábara ligía kei adagaragüdüni gudawarügüti lun Wabureme.

17 Ábati lariñagun Manóa lun:

—Ariñagabéi woun ka lan biri, ru wamaamuga eteingiruni bun danme lagunfulirun le bariñagubei woun.

18 Lariñaga ánheli ligía lun:

—Kámegia babusenra basubudiruni niri? Aban iri aramudaguati le buiti niri.

19 Aba lanügüni Manóa liraüraü gábara luma idewesei le fulúaruauti, aba líchuguni ligibuagu aban dübü, aba ladagaragüdüni kei adagaragüdüni gudawarügüti lun Wabureme. Ábati ladügün Wabureme aban milaguru ligibugiñe Manóa tuma lúmari: 20 Dan le lamudeirúnbei watu gemeti luéigiñe latarü, aba larihini Manóa tuma lúmari lamudeirun lani Wabureme ánheli sielun labadinagua leleledagun watu. Ábati háhuduragun darí ladagarun herebe múarugu. 21 Aba lasubudiruni Manóa luagu lani lan Wabureme ánheli wügüri ligía, lugundun aba marufudagunhali lan lungua lun, ni tun lúmari; 22 lariñagati Manóa tun lúmari:

—Chóuruti luagu wóunwegua lan, lugundun ariha wamaali Bungiu.

23 Tariñaga lun:

—Lun hamuga busén lan Wabureme láfaraguniwa, meresibirun lumuti hamuga wadagaragüdün gudawarügüti luma wedewese, marihagüdünlei hamuga burí katei le woun, masubudiragüdün lumuti hamuga giñe sun burí katei le woun.

24 Dan lagunfulirunbei dan, aba tagaraüdün lúmari Manóa aban wügüri irahü, aba tíchugun Sansón lírime. Aba aweirideina lan irahü ligía, abinireinalei Wabureme. 25 Luagu aban weyu dan le tídanñein lan likianpun-agei Sansón labadinagua Sorá luma Ésütaolu, aba lagumeserun lani Wabureme Sífiri arufudagua lungua lidan.