1 Abimélekü le liráü Herubaali, aba lidin Sikemü adimureha hama liduheñu tuéigiñe lúguchu, lariñaga houn:

2 —Amuriahatina huma lun hariñagun houn lílana Sikemü luagu buídutima lan lun ábanrügü lan wügüri warúeite, lun mama lan súngubei lirahüñü Herubaali arúeihawa.

3 Keiti haduhe lubéi Abimélekü, ñǘdüntiña lúmagiñe, ñǘdüntiña giñe adüga daradu hama lílana Sikemü lun hafalaruni. 4 Barütiña giñe ǘrüwa-wein-diisi murusun pülata tídangiñe litenpulun Baali-beritü, aba híchuguni lun Abimélekü. Lau seinsu ligía, ladüga Abimélekü daradu hama fiu gáfarahatiña lun hafalaruni. Ñǘdüntiña wügüriña hagía luma 5 Ofürá, le ñein lubéi meha laganawa Herubaali le lúguchi, áfaragua hamutiña ǘrüwa-wein-díisigubei líbirigu Abimélekü luagu ábanmeme dübü. Hotamü le lagumuhóun hádangiñe lirahüñü Herubaali, ligíarügüñein aramudagua lun lesefurun. 6 Lárigiñe, aba hóundaragun sun lílana Sikemü luma Betü-miló tábugiñe tídibu wewe to yarafaboun lun dübü sánduti le ñeinbei Sikemü, aba híchuguni Abimélekü urúeime.

7 Dan le lasubudirunbalin Hotamü katei le, wariti luagun wübü Gerisímü, aba lagúaragun here lun haganbuni súngubei, lariñaga:

—Aganba humana buidu lílana Sikemü! Ítara láamuga giñe laganbunün Wabungiute!

8 —Luagu aban dan, busén buriti tídibu wewe lun garúeite lan; aba hamuriahan luma oliwu lun ligía lan harúeite. 9 Gama lumoun lariñaga oliwu houn: "Uá. Ladüga lun au lan hurúeite, gasu lerederun níchugun garaba, ani seriwiti garaba lun líchugun inebesei dandu houn wügüriña kéigubeirügü lun Wabungiute".

10 —Amuriahatiña giñe luma tídibu igu lun ligía lan harúeite. 11 Lariñaga tídibu igu houn: "Uá, ladüga lun au lan hurúeite, magindunhadiname igu bímeburitu ani semeetu".

12 —Ábati hamuriahan luma tídibu beibei lun ligía lan harúeite. 13 Lariñaga tídibu beibei houn: "Siñati, ladüga lun au lan hurúeite, míchuhadiname diwéin to eseriwiduboun lun hagundaarun dandu wügüriña kei Bungiu".

14 —Lagumuhóun dan, aba hamuriahan luma hiiyu lun ligíaba lan harúeite. 15 Lariñaga hiiyu houn: "Anhein lan busén habéi lun ligía lan harúeite, gasu lan herederun sun hagía lábugiñe lamuñadiri. Gama lumoun ánheinti mabusenrun habéi lun harúeite lan, láfuriduña hamuga watu gemeti lídangiñe ábame láguduni sun hibúari le Líwanubei".

16 —Nálügüdaadünti guentó: Lau san úarani luma inarüni hadügei katei le hadügübei, íchigei Abimélekü lun ligíaba lan urúei? Óusera humaali san Herubaali hama liduheñu lau areini lememe aubei lóuseraün? 17 Ladüga ru lumuti núguchi libagari lidoun denchaü huagu, dan le lageindagunbei lun lesefurunün lábugiñegiñe habafu Madianna; 18 ánheinti huguya, garabaguaadün hawagun liduheñu núguchi, ani áfaragua humaña ǘrüwa-wein-díisigubei lirahüñü luagu ábanmeme dübü. Bóugudin luéi lira, ru humaali Abimélekü urúeime, le tiráü aban lubúali Herubaali ladügarügü hiduhe lan. 19 Gama lumoun nariñagati hun uguñe: Anhein óusera humaali lubéi Herubaali hau sun liduheñu lau inarüni luma úarani, buidulá lidin hun luma Abimélekü, buidu ligíame lidin lun huma. 20 Gama lumoun anhein mítaran lubéi, furila watu gemeti lídangiñe Abimélekü, lun lagumuchaguagüdüniña lílana Sikemü luma Betü-miló, furí ligíame watu gemeti lídangiñe Sikemü luma Betü-miló, lun lagumuchaguagüdüni Abimélekü!

21 Lárigiñe lariñaguni Hotamü katei le, aba lanurahan, aba lidin aganawa Beerü, ladüga lanufude luéi líbugaña.

22 Gumadi lumutiña Abimélekü Ísüraelina lidan ǘrüwa irumu, 23 gama lumoun aba líchugun Wabungiute aban sífiri wuribati haganaguóun Sikemüna luma Abimélekü, lun hagarabaagun luagun, 24 ítara luba lafayeiruni Abimélekü láfaraguniña ǘrüwa-wein-díisigubei lirahüñü Herubaali, afayeiha hagíame Sikemüna ladüga híderaguni. 25 Aba híchugun lílana Sikemü fiu wügüriña aramudaguñu laru üma lun háfaruni Abimélekü. Ábatiha híweruhan hawéi gürigia ha ásügürütiña ñéingiñe. Aba lasubudiruni Abimélekü katei le.

26 Luagu aban weyu, lásügürüña Gaali le liráü Éwedi hama líbirigu uburugugiñe Sikemü, aba lagañeiruni haritagun lílana uburugu ligía. 27 Ñǘdüntiña abudaha beibei áraabu, lun hadügün diwéin, adüga hagía aba óunwenbu fedu, hou hagía gurá hagía tidan hatenpulun habungiutegu, íñaragua haméi Abimélekü. 28 Lariñagati Gaali:

—Káteiñein san Abimélekü? Liraürügüñein Herubaali, ani Sebulu íderagubalin. Wagíati le Sikemüna, kátawagia lun werederuba lan kei idamuni houn? Lidamun wamaagia Amoru le adügübalin Sikemü, mama wamá lidamun Abimélekü. 29 Lun hamuga au lan hábuti, nagumuchaguagüdüñein hamuga Abimélekü furese furese! Ariñagati giñe: "Abimélekü, óundarabaña bisudaranigu, ñǘbuinba ageindagua!"

30 Dan laganbunbalin Sebulu le agumadihabei uburugu, ka lan lariñagubei Gaali, aba lagañidun 31 ábati lóunahan ariñaga lun Abimélekü uburugu Arumá:

—Anihein Gaali le liráü Éwedi hau líbirigu ya Sikemü, ani hesetiruñanu lílana fulasu lun hagarabaagun buagun. 32 Le lunbei badügüni, báfuridun áriebu hau bisudaranigu, lun haramudagun áraabu. 33 Binaafingiuame, danme láfuridun weyu, ábame bábürühan luagun uburugu, danme láfuridun Gaali hau lánigu ageindagua buma, badügeime le babusenrun lau.

34 Aba lubeiti láfuridun Abimélekü hau lumutuniña áriebu, aba haramudagun geyegu lau Sikemü fánreingu lidan gádürü sétanu. 35 Dan le láfuridunbei Gaali lubenarin uburugu, aba láfuridun Abimélekü hau lumutuniña lídangiñe haramudaguagüle. 36 Dan larihinbaliña Gaali, aba lariñagun lun Sebulu:

—Arihabá, añate aban sétanu súdara ararireina luéigiñe wübü!

Lariñaga Sebulu lun:

—Liyawadi burí wübü le henegebei gürigia bun.

37 Lariñagamémegiti Gaali:

—Añate giñe súdaragu ararireina lamidanguagiñe múa! Luma ábanya sétanu luéigiñe üma le tani wewe to hanadüri garíaahatiña!

38 Lariñaga Sebulu lun:

—Badimureha guentó, adimuredügüti buguya le! Ma bariñahare luagu ni kata lan Abimélekü lun lidamunbadiwa lan! Anihán hau lisudaranigu ha buga ítarabaña bun kei biánrügü gürigia. Furiba ageindagua hama guentó!

39 Aba láfuridun Gaali habá habá lílana Sikemü lun lageindagun luma Abimélekü. 40 Gama lumoun aba léibaahani Abimélekü, aba lanurahan luéi. Ñéinñanu saragu hilaguaaña chülǘ lumoun lubenari uburugu. 41 Aba lerederun Abimélekü Arumá, ábati labuguni Sebulu Gaali hau líbirigu Sikemügiñe.

42 Larugan aba houdin Sikemüna áraabu. Dan le lasubudirunbalin Abimélekü, 43 aba ladügün ǘrüwa sétanu hau lisudaranigu, ábati laramudagun áraabu; dan le larihinbei háfuridun Sikemüna uburugugiñe, aba láfuridun lídangiñe laramudaguagüle aba lageindagun hama. 44 Ligía hama ha lúmabaña ragǘ hamuti lubenari uburugu, sun añaha lan ha híbiri ageindagua, áfaraguaña ha áraabubaña; 45 aba lásügürüni Abimélekü sun weyu ligía ageindagua hama Sikemüna, darí lun lárügüdüni uburugu. Ábati lagünrinchaguni uburugu ligía, áfaragualaña sun lílana, aba lafuruhan salu lidan.

46 Dan le hasubudirunbalin lílana Migüdáli-sikemü katei le ladügübei Abimélekü, aba houdin aramudagua ténpulurugu Eli-beritü. 47 Dan lasubudirunbalin Abimélekü luagu ñéinñanu lan sun hagía óundaragu, 48 aba lidin hau sun lánigu luagun luwübüri Salümón, ábati láchugun aban tilimun wewe tau aban harawa aba líchuguni légewagu, lariñaga houn sun luwügüriñanigu lun hadügün kei ladüga furese furese. 49 Aba háchugun aban limu súngubei, ábati houdin lárigi lárigi Abimélekü darí ténpulurugun, le ñein lubéi hóundarei sun limu lidan aban, gudeina haméi, ítara liña háfaraguniña milu wügüriña hama würiña ha lílana Migüdáli-sikemü.

50 Lárigiñe aba lidin Abimélekü Tewesin, aba laranserun lun lábürühan luagun, aba lárügüdüni. 51 Ñeinñein aban wáyelesi lamidangua uburugu ligía, ñein haramudagua sun lílana uburugu, dandu wügüriña keisi würiña. Aba ladouruni lubenari buidu, ábati hawarirun lábulugun; 52 gama lumoun chülüti Abimélekü darí lubenari wáyelesi aba lagünrinchaguni. Laranseruña yebe lun láguduni, 53 ligía tachüürün aban würi dübü le amuligülei luagun, le adagarubei lábulugun, aba labouchaguni lichügü. 54 Aba lagúarun Abimélekü lun le íderagubalin, lariñaga lun:

—Sagaboun befeinte, áfarabana, lugundun mabusenruntina lariñawagún luagu aban lan würi áfarubalina.

Ábati límiruni lubúein tau lefeinte, aba lounwen. 55 Dan le harihinbei Ísüraelina luagu hilá lan Abimélekü, aba hagiribudun hábiñoun.

56 Ítara liña lafayeiragüdüni Wabungiute Abimélekü luagu láfaraguniña ǘrüwa-wein-diisi líbirigu. 57 Fáyeigüda lumutiña giñe Wabungiute lílana Sikemü luagu háfarahan. Ítara liña lubeiti lagunfulirun líñaraguniña Hotamü le liráü Herubaali.