1 Hedeón, le unbei hagúaha guentó Herubaali, aba lásaarun lubá larugan hau sun ha lúmabaña, aba houdin erederagua lubadu lísensen lidunari Arodu. Terederati hakianpun-agei Madianna houn luéigiñe nórute, lidan fulasu wayati le lugudinabei luwübüri Moré.

2 Lariñagati Wabureme lun Hedeón:

—Gíbeyatiña gürigia ha búmabaña; ani ánhaña nagañeiragüda Madianna houn Ísüraelina, hanaaguba houngua, hariñagame luagu lau lan here hagañeiraña. 3 Ariñagabá lubeiti houn gürigia luagu ha lan hanufudetiña, lun lan houdin hábiñoun.

Aba lóuchaguniña Hedeón ítara, aba houdin wein-bián-milu, heredera diisi-milu. 4 Ani ariñagamémegi Wabureme lun:

—Gibemémegiña. Barübaña ata duna, ñeinba nóuchaguaña nariñageime bun kaba lan ñüdün buma ani kaba lan moudin.

5 Ábati lanügüniña Hedeón ata duna, aba lariñagun Wabureme lun:

—Díreibaña ha átutiña duna háhaburugu éheluharügü kei ounli, hawéi ha áhuduragutiña lun hatun.

6 Ǘrüwa-sánñanu ha átubaña háhaburugugiñe éheluharügü kei ounli. Sun ha híbiri, huduguatiña lun hatun. 7 Ábati lariñagun Wabureme lun Hedeón:

—Hauba ǘrüwa-san wügüriña ha nesefuraün, ábame nagünrinchaguniña Madianna. Ha híbiri, gayaraati houdin águyu.

8 Ábati lariñagun Hedeón houn híbiri lun hagiribudun hábiñoun; ani lubaragiñe houdin, gidá lumuti éigini luma liganchun mudún hawéi. Aba lerederun háurügü ǘrüwa-san wügüriña ha anúadirubaña, aba híchugunu hakianpun iñumémeraü hawéi Madianna ha lídanbaña fulasu wayati.

9 Guñoun ligía, aba lariñagun Wabureme lun Hedeón:

—Saraba, rariba ageindagua hama Madianna, nederegeraaña búhaburugun. 10 Ani anhein hanufude bubéi lun bageindagun hama, rariba furumiñe tidoun kianpu-agei luma Purá le íderagubalibu, 11 baganbeime le hariñagubei. Lárigiñeme, ábame basandirun erei lun bageindagun hama.

Ábati laragachun Hedeón luma Purá le íderagubalin darí le ñein tubéi tagumuhóun hakianpun-agei háganiñu. 12 Madianna, Amaléküna hama gürigia ha ñéingiñe lubéi laboucha weyu chagagu haña fulasurugu, kei chagagaru lidan hadaani; saraguhaña giñe kameyu hama kei sagoun laru beya. 13 Dan le layarafadunbei Hedeón tun hakianpun-agei háganiñu, aba laganbun labahüdaguni aban hádangiñe áganiñu luénedü lun aban, lariñaga lun:

—Gewenedütina tiabin aban fein abalabaheina chülǘ tuagun wakianpun-agei, sagü tabuguchun tuagu aban wani dibasein, tágurunu.

14 Aba lóunabuni lani paaná, lariñaga lun:

—Mama amu katei le tuéi lefeinte Hedeón le liráü Hoasi, le Ísüraelina. Lederegeraadiwa Bungiu tau sun wakianpun-agei lúhaburugun Hedeón.

15 Dan laganbuni Hedeón lanichigu uénedü ligía, aba láhuduragun lun Wabureme. Lárigiñe aba lagiribudun tidoun hakianpun-agei Ísüraelina lariñaga houn:

—Sará humá, lederegeraaña Wabureme Madianna woun!

16 Aba ladügün ǘrüwa sétanu hau ǘrüwa-san luwügüriñan, aba líchugun fidu le lauti haganchun mudún houn súngubei luma diná lau aban tochi lurageirugu. 17 Lariñaga houn:

—Danme nachülürün tóubawagun hakianpun-agei áganiñu, hariheime le lunbei nadügüni hadügeime giñe. 18 Danme nínwinruni liganchun mudún au hama ha númabaña, hínwinreime giñe le húmabei geyegu tau hakianpun-agei, hagúaraguameti here: "Luagu Wabureme luma luagu Hedeón!"

19 Ítara liña lubeiti, lachülürün Hedeón hama san wügüriña ha lúmabaña luagun le aban oubaü tun hakianpun dan le lagumesera lan lidaani óunigiruni le lánina amidi áriebu. Ábati hínwinruni liganchun mudún, aba habouchaguni diná le hanügübei háhaburugu, 20 ǘrüwagubeiti sétanu, aba hínwinruni liganchun mudún lidan aban, bougua haméi diná le hámabei. Lidan háhabu le habaünan hanügei tochi durunguti, ánheinti fidu le laubei liganchun mudún luéigiñe hóunwenren hanügei, agúaraheina hagía: «Wuribu! Luagu Wabureme luma luagu Hedeón!» 21 Keiti aba lubéi herederun Ísüraelina deregüdagu lidan habara geyegu tau hakianpun háganiñu, súngubei hasudaranigu Madianna aba héibaagun anuraha agúaraheina hagía, 22 sun añahaméme lan ǘrüwa-san Ísüraelina íñaahei liganchun mudún, aba lageindaguagüdüniña Wabureme Madianna hámagua, aba háfuridun anuraheina dagá Betü-sitá, üma luagun Sererá, darí lumoun láfadaragun Aweli-meolá, yarafa lun Tawatü.

23 Ábati laguarúniwa houn Ísüraelina ha lánigu Nefütalí, Aserü, hama sun lánigu Manasési, lun héibaahaniña Madianna. 24 Aba lóunahan Hedeón ariñaga houn lánigu Éfürain, lun haragachun ageindagua hama Madianna, lun giñe herederun lidan burí fulasu le ñéingiñe lubéi gayara lan lánhiñurawagun duna dandu Betü-bará kei Hordán, lubaragiñe hachülürün. Ítara liña hagunfuliruni lánigu Éfürain le ariñawagúbei houn, 25 ragütiña biama ábutigu hádangiñe Madianna gíritiña Orebü luma Seebü. Aba háfaruni Orebü luagu dübü le gíribei guentó lidübüri Orebü. Liábinti Seebü háfarei lidan fulasu le gíribalin liri, fulasu le meha ñein lubéi tachuinrawagua beibei lun tadügǘniwa diwéin. Lárigiñe héibaahaniña Madianna aba hanügüni lichügü Orebü luma lichügü Seebü lun Hedeón, luagun le aban louba duna Hordán.