1 Ñeinñein aban wügüri aganóuti luagu luwübüri Éfürain gíriti Mikaíasi, 2,3 le ariñagubei tun lúguchu:

—Libügürü duusu kilu dimí pülata le íweruhoubei buéi, le uéigiñebei bíñaraguei le íweruhabalin, anihein numa, au íweruhabalin, gama lumoun náguyugüdaali bun, ladüga naganbun bariñagun anúadira baali lan lun Aburemei lun badaagüdün aban guáriua lauti fulansu lafurarúame lau pülata.

Aba láguyugüdüni pülata tun. Ábati tariñagun lúguchu:

—Binilabu Wabureme niráü!

4 Gama lumoun aba láguyugüdüni Mikaíasi pülata tun lúguchu, aba tederegerun bián kilu murusunraüya pülata lun aban nadagimeinti pülata lun ladügün aban guáriua le lauti pülata tun, aba tíchuguni lúbiñe Mikaíasi.

5 Ñeinñein aban fulasu lúbiñe Mikaíasi le ñein lubéi ladüga kultu. Aba láhüchagüdün aban hadaüragun fádirigu, aba líchugun aban liráü lun fádirime. 6 Keiti ua lan meha urúei Ísüraeli lidan dan ligía, kada gürigia adügei le labusenrun.

7 Ñeinñein aban wügüri ñǘraügili chülüdügüti Belén, hádangiñeti lani Hudá türibu, lewita wügüri ligía. 8 Aba láfuridun wügüri ligía Belengiñe áluaha amu fulasu lun laganóun ñein, aba lachülürün luagu luwübüri Éfürain, lúbiñoun Mikaíasi.

9 —Lariñaga Mikaíasi lun:

—Halíagiñedibu san?

Lariñaga lun:

—Belengiñe niabin, lewita au, náluahaña halíaba lan naganawa.

10 Lariñaga Mikaíasi lun:

—Rédeiba numa ya, buguya láamuga nun kei úguchili luma kei fádiri. Níchuguba diisi murusun pülata bun luagu irumu, bóugudin tuéi badaüragun luma beigin.

11 Aba lerederun lewita ligía aganawa luma Mikaíasi, aba ítara lan kei aban hádangiñe lirahüñü. 12 Aba ladügüni Mikaíasi lufadirinme, aba lerederun aganawa ñein. 13 Ábati laritagun Mikaíasi luagu libihuba lan abiniruni lúmagiñe Wabungiute ladüga aban lan lewita lufadirinbei.