1 Átiri dan lárigiñe, lidan lidaani lalubahóun türigu, aba lidin Sansón bisidoun lúmari barüina ligía aban liraüraü gábara tun. Dan lachülürün, aba lariñagun:

—Nebelura arihoun númari tirumunrugu.

Gama lumoun mígirun lumuti límedamuru lun lebelurun, 2 lariñagarüga lun:

—Súnyebe nariñagun mabusenrun baaru lan, ábati níchugunu lun aban hádangiñe bumadagu. Gama lumoun magadiñetimatu tamulelua tuéi, barüboun teweñegua.

3 Lariñaga Sansón lun:

—Anati guentó madurunbadina luagu wuribani le lunbei nadügüni houn Filistéana!

4 Ábati lidin, aba lárügüdün ǘrüwa-san ounli áraabugiñe, aba lagüraguniña luéigiñe hali bián bián, aba lagüürün aban tochi labadinagua hali; 5 lárigiñe aba lébeduni tochi, aba lígiragüdüniña ounli áraabuna hagía hacharirugu Filistéana. Ítara liña lágudun türigu le oundarúaalibei luma le ráragilibei, íbini burí beibei-agei luma oliwu-agei. 6 Aba hálügüdahan Filistéana ka lan adügübalin katei le, danti le hasubudirunbalin luagu ladüga lan Sansón luéigiñe lagidarunu límedamuru lúmari luéi lun líchugunu lun lumada, aba houdin, aba hágudunu würi tuguya lau sun túguchi. 7 Ábati lariñagun Sansón:

—Kei ítara liña lubéi higaburi, memeraagunbadina darime fáyeigüda naadün luagu le hadügübei!

8 Aba lábürühan hawagun lau lanarime igañi, darí lun mígirun lan abun masanditi hawagu. Lárigiñe aba lidin aganawa lagadábugiñe dübü Etamü.

9 Aba hayabin Filistéana aba híchugunu hakianpun-agei lúmagiñe Hudá darí uburugu Lei; 10 aba hariñagun lílana Hudá houn:

—Ka uagu hiabin ageindagua wama?

Hariñaga houn:

—Wayabiña lun wárügüdüni Sansón, lun lafayeirun luagu le ladügübei woun.

11 Dan haganbunbalin katei le, aba houdin ǘrüwa-milu wügüriña lídangiñe lani Hudá türibu ariñaga lun Sansón:

—Marihin bumuti san luagu here hamá Filistéana sügǘ wau? Ka uagu bádarawa lidoun turobuli?

Lariñaga Sansón houn:

—Madügüntina ni kata luéidigia nafayeiragüdüniña luagu le hadügübei nun.

12 Ábati hariñagun lun:

—Wagia, wayabiña árügüdabu lun wederegerunibu houn Filistéana.

Lariñaga Sansón houn:

—Fiñú humá nun luagu máfarun hubadina lan hilagubei.

13 Aba hariñagun lun:

—Máfarun wabadibu. Busenrügütiwa wárügüdünibu lun wederegerunibu houn Filistéana.

Ábati hagüraguni lau bián gúrudu iseri, aba hasagaruni lídangiñe laramudaguagüle.

14 Dan hachülürünbei Lei, aba hayabin Filistéana lubaroun, agúaraheina lau ugundani. Gama lumoun aba liabin lani Wabureme Sífiri luagun Sansón, aba látumuraguni gúrudu le aubei hagüraguei larüna luma lúhabu kamá hamuga filu; 15 Aba lanügün aban láribugu burigü mamabeidúngili buidu, ladarirun ñein, aba láfarun milu Filistéana hilagubei lau. 16 Lárigiñe aba lariñagun:

«Lau láribugu aban burigü,

ábürügüdatina saragu.

Lau láribugu aban burigü,

áfaratina milu wügüriña hilagubei"."

17 Lárigiñe, aba láguruni láribugu burigü. Ligía Ramatü-lei lubéi líribei fulasu ligía. 18 Kei wéirihali lubéi lumagürabu Sansón, aba lagúarun lun Wabureme, lariñaga lun:

—Ida liñagia bíchugunbalin óunwenbu agañeiruni le nun, lun bígirubadina lan guentó lun láfarunina numagürabu ábürüha nuguyame háhaburugun gibe tubungiutegu ha?

19 Ábati ladaaruni Wabungiute huyu le ñeinbei uburugu Lei, aba latun Sansón lídangiñe duna le áfuridubei lídangiñe huyu ligía, aba lárügüdagun lungua. Ligía En-akoré lubéi líribei lísensen duna le ñeinbei uburugu Lei chülǘ lumoun dan le.

20 Rédeiti Sansón hábutime Ísüraelina luagu wein irumu lidan dan le Filistéana lubéi agumadihabaña fulasurugu.