5 Ihyo Petulo hoavaga ang’acha ali munyumba ya vawopwa, nacho chikundi cha vanya litumbilo lya Chilisito chikamusuchilaje ndalahela kwa Mulungu.
Petulo anhumwa mu nyumba ya vawopwa
6 Chilo chicho Helode Ajilipa hoavaga ang’acha ang’ali kumuhumya na kumuhiga, Petulo avaga avasise hagati ha vimilitsi vavili. Kuno awopitwe nyololo tsivili na vimilitsi vanji vavaga vankwimilila lwitsi lwa nyumba ya vawopwa. 7 Luvala lulo akahumilaje mutantsi va kilanga va Mulungu na kwima habehi na Petulo na mwangatsa gukang’alikaje mu chumba cha nyumba ya vawopwa. Mutantsi va kilanga va Mulungu akamudometsaje Petulo mulubafu na kumulamusa na akalongaje, "Wangufitse uwuche!" Luvala lulo nyololo tsikawopokaje na kugwa hasi. 8 Yula mutantsi va kilanga va Mulungu akamulonjelaje, "Ufwale myenda jako na ndatu tsako." Petulo akafwalaje, na kaha akamulonjelaje, "Ufwale mugolole gwako na ufwate heni." 9 Petulo akahumaje mula mu nyumba ya vawopwa kuno valihamwe na yula mutantsi va kilanga va Mulungu. Nayo siatselaga chila cho chihumye kuta chavaga kweli, mwene ahotsaga kuta an’wona nduntsuchilo. 10 Vakalutilaje ha lwimililo lulongola na lwa kavili na vakafikaje mbaka ha lwitsi lwa chuma lwa kwinjilila ku mujini. Lwitsi ulo lukadindukaje lwene, nawo vakalutilaje iho vakahumaje kivala. Hovavaga mung’asi yula mutantsi va kilanga va Mulungu akamulekaje Petulo. 11 Iho ho Petulo akatselaje wukweli wa chila chochihumye na kilonjela, "Lelo ntselye nachene kuta Mutwa amulajitse mutantsi va kilanga va Mulungu na kung’ulusa mu lulongwa lula loavaga angulutsinda Helode Ajilipa na Vayawudi veka." 12 Petulo hoavaga kutsela ihyo akabitaje mbaka ku kaye ya Maliyamu yuve va Yohana yo achemwaga litawa linji Maliko. Uko kwavaga na vanu wolofu vakong’ine kumusuka Mulungu.