Pawulo na Sila vanvikwa mu nyumba ya vawopwa
16 Siku yimwe hotwavaga tum’bita hono hahalaga ha kusalila, mupogotsi yumwe muhintsa yo avaga na lisoka lya wulagutsi. Nayo avapelaga vatwa vake magobole molofu kwa kulagula. 17 Ihyo yula muhintsa akamufwataje Pawulo na hetwe kuno an’yova, "Iva vanu wo vatantsi va Mulungu va kilanga wo vangutuvikulila ndongwa tsa wukulusi." 18 Aditaga hihyo kwa siku ntsolofu, mbaka siku yimwe Pawulo akavipaje, akamupituchilaje na kulilonjela lila lisoka, "Ntsingukung’anulila kwa wuvetso wa Litawa lya Yesu Chilisito umuhume!" Lila lisoka likamuhumaje luvala lulula. 19 Ihyo vatwa va yula muhintsa hovavaga kuwona kuta lihuvilo lyawo lya kupatila magobole liyatsile, vakavabataje Pawulo na Sila vakavabulunaje mbaka hono ha vanu wolofu halutalo ha vavina va muji. 20 Vakavategulaje mbaka kwa vanya kuhiga vakavahigaje kwa kulonga, "Vanu vano Vayawudi, nawo vankwambutsa chitika ha muji gwetu. 21 Van’dahitsa ntsovelo tso sinambe tsiganiche na hetwe tu vanu va inyi ya Lumi na tunlemetswa kutsidichila na kutsifwata." 22 Vanu wolofu vakikong’asaje vakavibataje Pawulo na Sila.
Iho vala vahigaji vakavalagitsaje vimilitsi vavawopole myenda jawo na vavatove mikotya. 23 Hovavaga kuvatowa ndalahela vakavavikaje mu nyumba ya vawopwa na vakamulonjelaje muvina va vimilitsi va nyumba ya vawopwa avimilile. 24 Kwasawuli ya malagitso igo uyo muvina va vimilitsi va nyumba ya vawopwa akavavikaje mu chumba cha kugati ndalahela cha nyumba ya vawopwa, na akavawopaje kwa nyololo mu magulu gawo.
25 Hoyavaga kufika hachilo na gati Pawulo na Sila vakatsaje kusuka na kwimba ntsimbo tsa kumutsumitsa Mulungu, nawo vawopwa vanji vavahulikitsaga. 26 Luvala lulo kukahumilaje likakamo likomi lya inyi, likatigasaje misinji ja nyumba ya vawopwa. Luvala lulo ntswitsi tseka tsikadindukaje na nyololo tso vavaga vavawopite tsikawopokaje. 27 Muvina va vimilitsi va nyumba ya vawopwa avaga kulamuka na kutsiwona ntswitsi tseka tsidinduche, atyaga kuta vawopwa veka vachimbye na ihyo akasomolaje waladi wake mu yala ili ikopole. 28 Lechelelo Pawulo akalongaje fikami, "Uleche kikopola kwasawuli hetwe tweka tulibahanago!" 29 Yula muvina va vimilitsi akalagitsaje tsiletwe koloboyi, akinjilaje mula mugati na kufugama halutalo ha Pawulo na Sila kuno ankakama. 30 Akavahumyaje kivala na kuvaputsa kuta, "Nyee vatwa, ntsin’ganika ndite chinu chachi ili mbetse kukuluka?" 31 Vene vakamujibulaje, "Umutumbe Mutwa Yesu heve hamwe na vanu veka va kukaye yako, iho ho mukukuluka?" 32 Ihyo vakamuvikulilaje ndongwa tsa Mutwa Yesu mwene hamwe na vanu va mukaye yake. 33 Yula muvina va vimilitsi akavategulaje luvala lululaga na kuvahofuga fikong’o fyawo, kaha mwene na vanu vake veka va mukaye yake vakabatitswaje luvala lulo. 34 Akavategulaje Pawulo na Sila na kuvalibulitsa valye chilyo. Ihyo mwene hamwe na vanu va mukaye yake vakahechelelaje ndalahela kwasawuli vavaga vamutumbye Mulungu.