1 Nzɛngyerɛneɛ kandinga bie sili anwuro: Né brasua bie ahra eyia, bɔ né ɛsraen wɔ ye gya bo, na ne abotire bɔ bafa nzramaa 12 bayɛ bɔ ye ti. 2 Né ɔnwonzɛ, na aworɛ hane ye; na amaneɛ ne yealɛ bɔ ne onwu nati, né ɔteɛtea nu. 3 Afei nzɛngyerɛneɛ bieku sili anwuro: ɛwoo kandinga kɔkorɛ suronyi-suronyi bie yele ye ti. Né ole tire nzoo, ne mmɛen buru, na ahemotire nzoo bobɔ ye ti nanwo. 4 Na ɔfale ye dua hwene anwuro nzramaa ngyekyɛmue nza nu kõ, na ogyili bɛ guale aseɛ naso. Na ɛwoo ne gyinane brasua bɔ aworɛ aha ye ne nyunu, kyɛ ɔwo ala a, ɔkye ɔwa ne di. 5 Na ɔwole baa brienzua, ye yeɛ ne ɔkɔfa buralɛ pɔmaa koli maen biala so ne. Nakoso bɛfale ɔwa ne bɛhɔle nekaa bɔ Nyameɛ ne ye bia* ne wɔ ne. 6 Na brasua ne nwati hɔle ɛserɛ so, nekaa bɔ Nyameɛ asiesie ama ye kyɛ bɛma ye aleɛ ngyẽa 1,260.

7 Na ngondii sili anwuro. Mikael ne ye abɔfo ne ɛwoo ne hone, na ɛwoo ne koso ne ye abɔfo ne bɛ hone; 8 nakoso ɛwoo ne né ye abɔfo nemɔ angora, na bamma bɛ atee maa bandena anwuro kõ. 9 Yeti, bɛgyili ɛwoo suronyi-suronyi ne bɛtole aseɛ so, sɔ daa tete ɛwoo bɔ bɛfrɛ ye Abɔnzam ne Satan, bɔ ɔlaka-laka aseɛ sofoɛ mukoraati ne, bɛgyili ye bɛtole aseɛ naso, na bɛgyili ye abɔfo nemɔ koso bɛ bokale yeso. 10 Na ndele konviɛ kandinga bie wɔ anwuro kyɛ:

"Bekye bɔ yɛ Nyameɛ ne ngwagyeɛ, ne ye Ahennie,

ne ye Kristo ne tumi awa ɔ,

ofikyɛ bagyi bɔ ɔbɔ yɛliema mɔ kwaadu ne bato ase,

bɔ né ɔbɔ bɛ kwaadu eyia ne kɔngɔen ne.

11 Na ɔnate Boan ba né mogya ne adanzeɛ bɔ bɛlili naso,

yeɛ ɔmaa bɛlili ye so ngunim ɔ.

Na sɛ ɔba kyɛ bɛku bɛ po a,

né bɛndwene bɛ ngoa* nwo.

12 Yeti, anwuro ne ɛmɔ bɔ ɛmɔ tete nu ne,

ɛmɔma ɛmɔ nye gye!

Aseɛ ne ɛpo de, bɛ yaakɔ;

ofikyɛ Abɔnzam adwu awa ɛmɔ berɛ,

na wafɛ yaa paa, ofikyɛ, ɔse kyɛ waha ye mmerɛ kaa bie."

13 Mmerɛ bɔ ɛwoo ne nwuni kyɛ bagyi ye bato aseɛ so ne, otuli ye nye siele brasua bɔ ɔwole baa brienzua naso. 14 Nakoso, bɛfale kɔleɛ kandinga ne ndaa nyɔ ne bɛmane brasua ne, kyɛ ɔfa tu fi ɛwoo ne nyunu hɔ ɛserɛ so, nekaa bɔ ne bɛkɔma ye aleɛ afoɛ nza ne bue,* na ɛwoo ne anya ye. 15 Na ɛwoo ne puli ye noa nu nzue bɔ ɔte kyɛ nzue kandinga lili braa ne si kyɛ ɔfa ye. 16 Nakoso aseɛ bokale brasua ne, aseɛ memene nzue bɔ ɛwoo ne pu fili ye noa nu ne. 17 Yeti, ɛwoo ne fɛle brasua naso yaa paa, na ɔne ye bosofoɛ bɔ baha, bɔ bɛdi Nyameɛ mmeraa so ná bɛtira Yesu Kristo adanzeɛ adwuma nanu ne hone. 18 -