1 Na ndele konviɛ kandinga bie mvili nekaa krongron berɛ, né ɔka kyire abɔfo nzoo ne kyɛ: "Ɛmɔhɔ, na ɛmɔɔhwie bɔ ɔwɔ Nyameɛ ɛyaa kyɛnzee nzoo nanu ne bɛgua aseɛ so."

2 Bɔ oli moa ne hɔle, ná oohwiele bɔ ɔwɔ ye kyɛnzee nanu ne guale aseɛ so. Na kena bɔ ɔyɛ yea na ɔyɛ suro tutuli bɛ bɔ bɛle kaka ne ahyɛnsodeɛ ná bɛsõ ye statu ne.

3 Bɔ ɔtɔ so nyɔ ne hwiele bɔ ɔwɔ ye kyɛnzee nanu ne guale ɛpo nu, na ɔyɛle ebie bɔ wawu mogya ne; na nikye biala bɔ ngoa wɔ nu, bɔ ɔwɔ ɛpo nanu ne wuli.

4 Bɔ ɔtɔ so nza ne hwiele bɔ ɔwɔ ye kyɛnzee nanu ne guale nzue bɔ ɔtengyɛ ne nekaa bɔ nzue pukye fi ne, na bɛkakyile mogya. 5 Na ndele kyɛ abɔfo bɔ ɔnea nzue so ne ka kyɛ:

"O Krongroniɛ,

wɔ bɔ né ɛwɔ berɛ, na ɛtɛ́ wɔ berɛ,

atɛn bɔ abu ne kyire kyɛ ɛte teneneeniɛ.

6 Ofikyɛ bɛhwiele akrongronfoɛ ne adiifoɛ né mogya bɛguale,

na ama bɛ mogya kyɛ bɛno,

ɛhene ala yeɛ ɔfata bɛ ɔ."

7 Na ndele kyɛ afɔleɛ bokyea né ka kyɛ:

"Awurade, Otumvoɛ Nyameɛ,

amba, w’atemmuo te nahorɛ na ɔtengyɛ."

8 Bɔ ɔtɔ so nná ne hwiele bɔ ɔwɔ ye kyɛnzee nanu ne guale eyia naso, na bɛmane eyia ne atee kyɛ ɔfa see yerɛ-yera mmenia. 9 Na see bɔ yenoa yɛ hye paa yerɛ-yerale mmenia ne, ná Nyameɛ bɔ ole tumi wɔ ɔhaw nemɔ so ne, bɛkekane mmusue dwirɛ bɛfale ye dumaa nanwo, ná banzakra b’adwene bannhyɛ ye anuonyam.

10 Na bɔ ɔtɔ so nnu ne hwiele bɔ ɔwɔ ye kyɛnzee nanu ne guale kaka né bia* naso. Na ye ahennie né yɛle awosii kabii, na ɛyealɛ bɔ bɛtele nati, bɛpesale bɛ temverema. 11 Nakoso banzakra bamvi bɛ nneyɛɛ nanwo, mmom ɛyealɛ ne né bɛ nwo ngena-ngena nati, bɛ domene Nyameɛ bɔ ɔwɔ anwuro ne.

12 Bɔ ɔtɔ so nzia ne hwiele bɔ ɔwɔ ye kyɛnzee nanu né guale Eufrate nzue pirikua nanu, na nzue bɔ ɔwɔ nu namukoraati wele, kyɛbɔ okosiesie atee kɔma ahemvo bɔ bɛfi eyia afiteleɛ dɔ ne. 13 Na nwuni honhom nza bɔ bɛ nwo nde bie kyɛ bɛfi ɛwoo kandinga ne, kaka suronyi-suronyi ne, ɔne ngondombo adiifoɛ nemɔ noa nu bɛfite, né sɔ honhom nemɔ te kyɛ ɛporohyɛen. 14 Bɔ ɔte yeɛ ole kyɛ, ɛhemɔ te adaemone honhom bɔ bɛyɛ nzɛngyerɛneɛ, na bɛkɔ aseɛ so ahemvo mukoraati berɛ, bɛkɔboɔboa bɛ noa bɛma Otumvoɛ Nyameɛ kyẽa kandinga nanu koɛ ne. 15 "Nea, meba te kyɛ awieniɛ. Anigye yeɛ ole ebiala bɔ ɔmaa ye nye da berɛ,* na ɔnea ye atadeɛ so yé ne, ná wamva ye nwo wando so wannate ma bannwu ye nwo." 16 Na bɛboɔboale bɛ noa wɔ nekaa bie, Hebri nu ne, bɛfrɛ berɛ Amagedon.

17 Na bɔ ɔtɔ so nzoo ne hwiele bɔ ɔwɔ ye kyɛnzee nanu ne guale mvrama nu. Na konviɛ kandinga bie fili bia* bɔ ogyi asɔre awuro berɛ nanu wale kyɛ: "Wayie!" 18 Na agralaa tetele yerɛm-yerɛm, agralaa bobɔle nu, na aseɛ wosolɛ kandinga bie sili, sɔ aseɛ wosolɛ ne, ofi mmerɛ bɔ sona wale aseɛ naso ne, ebie silli lle; né aseɛ wosolɛ ne noa yɛ se paa. 19 Kuro piri nanu hyɛle nza, na maen nemɔ nguro nemɔ sɛkyele; na Nyameɛ kayele Babilon Kandinga ne,* kyɛ ɔ́fa kwangoa bɔ ye yaa bɔ yenoa yɛ hye nzãa wɔ nu né ma ye. 20 Supɔ biala nwatili, na bannwu bokaa biala kõ. 21 Afei asukɔtwea mbiri-mbiri bɔ kõ biala nu nnunɛ kɔyɛ kilo 20* tɔ fili anwuro guale mmenia naso, na ɔhaw bɔ asukɔtwea ne maa ɔwale mmenia naso nati, bɛkekane mmusue dwirɛ bɛfale Nyameɛ nwo, ofikyɛ né ɔhaw ne noa yɛ hye paa.