1 Ɛhemɔ si ne, ndele konviɛ bie, né wayɛ kyɛ ɛlɔen kandinga bie konvi. Na bɛteane nu kyɛ

"Haleluya!*

Yɛ Nyameɛ yeɛ odɛ́ ngoa, na ye yeɛ anuonyam ne tumi te ye deɛ ɔ.

2 Ofikyɛ ye atemmuo te nahorɛ, na ɔtengyɛ.

Wabu tuutuuniɛ kandinga bɔ wafa ye adwamammɔ wagua aseɛ nanwo fiɛ ne atɛn;

ná ye ngoaa nemɔ mogya bɔ ɔwɔ ye sa nwo ne, watua so kerɛ."

3 Na besa bɛteane nu kyɛ:

"Haleluya!

Ye nwosina ne tu kɔ anwuro daa, daa."

4 Na mbanyi 24 ne né ateasefoɛ nna ne fale bɛ nyunu butuli berɛ, na bɛsõne Nyameɛ bɔ ɔte ɔhene bia naso ne, na bɛhane kyɛ:

"Amen! Haleluya!"

5 Na konviɛ bie fili ɔhene bia nanu wale kyɛ:

"Ɛmɔye yɛ Nyameɛ ayɛ,

ye ngoaa bɔ ɛmɔsuro ye namukoraati,

atitire ne mmaa-mmaa."

6 Na ndele konviɛ bie te kyɛ ɛlɔen kandinga bie konvi, né konviɛ ne te kyɛ nzue pee bɔ obu fa so ne agralaa bɔ ɔbobɔ nu ne. Na bɛhane kyɛ:

"Haleluya!

Ofikyɛ Awurade, yɛ Nyameɛ bɔ ɔte Otumvoɛ ne, wahyɛ yebo odi tumi.

7 Ɛmɔma yɛ nye gye na yɛli ahurusi,

ná yɛhyɛ ye anuonyam;

ofikyɛ Boan Ba né ayeforɔ ne adwu so,

na ɔye ne asiesie ye nwo.

8 Bama ye atee kyɛ ɔhra nwera pa bɔ ye nye te kama.

Nwera pa ne gyi berɛ ma akrongronfoɛ ne nneyɛɛ bɔ ɔtengyɛ ne."

9 Na ɔha hyirele me kyɛ, "Tworɔ ɛhe: Anigye yeɛ ole bɛ bɔ bato bɛ sa bafrɛ bɛ kyɛ bɛbra Boan Ba n’ayeforɔ né paati nabo ne." Osa ha hyirele me kyɛ: "Ɛhe te nahorɛ dwirɛ bɔ ofi Nyameɛ berɛ." 10 Yeti, mvale me nyunu mmutuli berɛ kyɛ mesõ ye, nakoso ɔha hyirele me kyɛ: "Nea yé! Nnɛyɛ sɔ! Me koso nde akoaa te kyɛ wɔ ne eliema mɔ bɔ bɛtira Yesu nwo adanzeɛ adwuma nanu ne. Sõ Nyameɛ! Ofikyɛ Yesu nwo adanzeɛ yeɛ ɔmaa bɛhyɛ ngɔm ɔ."

11 Na nwuni kyɛ anwuro abukye, mekwaanea a, pɔngɔ fufue bue ɛhe. Na bɔ ɔte so ne, bɛfrɛ ye Ebie bɔ ɔka Nahorɛ ná Bɛle ye nu Gyidie; na tenenee nu yeɛ obu atɛn na ɔkɔ koɛ ɔ. 12 Ye nye mmaa te kyɛ see bɔ ɔsɔ ne, na ahennie abotire pee bobɔ ye ti anwo. Bahworɔ dumaa bie bagua ye nwo, bɔ ebiala nze, sana ye bɔbɔ, 13 na atadeɛ bɔ owura ye ne, mogya abɔ apete nu. Na bɛfrɛ ye Nyameɛ Dwirɛ. 14 Afei, sogyafoɛ lɔen bɔ bɛwɔ anwuro ne tete mbɔngɔ so li ye si, na bɛwura nwera pa, nwera fufue bɔ ye nye te. 15 Na dadeɛ tendee naen-naen bie fili ye noa nu fitele, ɛhene yeɛ ɔkɔfa kɔbobɔ maen-maen ne; na ɔkɔfa buralɛ pɔmaa koli bɛ so. Afei koso, ye yeɛ otietia Otumvoɛ Nyameɛ ɛyaa kumaa bɔ bɛtwi nzãa wɔ nu naso ɔ. 16 Na bahworɔ dumaa bie wɔ ye atadeɛ nanu ne ye sɔ nanwo kyɛ, Ahemvo nu Hene ne awura mɔ nu Awurade.

17 Nza nwuni abɔfo bie bɔ ogyi eyia nu, na ɔteane nu frɛle nnomaa bɔ batu nate ewienu namukoraati kyɛ: "Ɛmɔbra, ɛmɔɔyia Nyameɛ paati pirikua nabo, 18 na ɛmɔli ahemvo mɔ naen, asahene mɔ naen, mmrienzua bɔ bɛ nwo yɛ se naen, mbɔngɔ ne bɛ bɔ bɛtete bɛ so ne naen, ɔne ebiala naen, bɛ bɔ balɛ́ bɛ nwo, ne ngoaa, mmaa-mmaa ne atitire." 19 Na nwuni kyɛ kaka suronyi-suronyi ne né aseɛ naso ahemvo ne bɛ sogyafoɛ aboa bɛ noa kyɛ, bɛne bɔ ɔte pɔngɔ naso ne né ye sogyafoɛ nemɔ kwaahõ. 20 Na bɛhyele kaka ne, na bɛhyele ngondombo diifoɛ bɔ ɔyɛle nzɛngyerɛneɛ wɔ ye nyunu fa laka-lakale bɛ bɔ bɛlɛle kaka né ahyɛnsodeɛ ne, ɔne bɛ bɔ bɛsõne ye statu ne bɛ bokale ye so. Na bɛgyili bɛ munyɔ anikaen bɛguale see bɔ sɔfa wɔ nu nanu. 21 Na bɛ ngaa ne de, dadeɛ tendee bɔ ofi bɔ ɔte pɔngɔ naso né noa nu wale ne, ɛhene yeɛ bɛfa bɛhuni bɛ ɔ. Na nnomaa namukoraati lili bɛ naen maa bɛ ko yili.