1 Afei ohyirele me ngoa nzue bɔ ɔtengyɛ, bɔ ye nye te hyɛnn kyɛ ahwehwɛ, né ɔtengyɛ fi Nyameɛ ne Boan Ba né bia* nanu, 2 na ɔbafa atee kandinga bɔ ɔla kuro nanu né afia. Na ngoa mmakaa gyigyi nzue ne bɛen ne ye famaa, bɔ osu mmaa buru-ne-nyɔ afoɛ biala, osu mmaa bosome biala. Na ye nyaa yeɛ bɛfa bɛsa mmenia ne anwonyerɛ ɔ. 3 Mmusue biala ngɔwa berɛ kõ. Mmom Nyameɛ ne Boan Ba ne bia ne yeɛ ɔwɔ kuro nanu ɔ, na ye ngoaa kɔsõ ye. 4 Bɛkonwu ye nyunu, na ye dumaa kogua bɛ nwoma so. 5 Aleɛ ngɔsa berɛ kõ, na bengohia kanea anaa eyia, ofikyɛ Awurade Nyameɛ yeɛ ɔkɔyɛ bɛ kanea ɔ, na bɛkoli hene daa daa.

6 Ɔha hyirele me kyɛ: "Sɔ dwirɛ hemɔ te nahorɛ, na ɔkɔwa nu. Awurade, Nyameɛ bɔ ɔnate adiifoɛ so dwudwo ne, wasoma ye abɔfo kyɛ ɔma ye ngoaa nwu nningyein bɔ ɔngɔhyɛ okosisi ne." 7 "Nea, meba ndɛ-ndɛ. Ebiala bɔ odi ngɔmhyɛ dwirɛ bɔ ɔwɔ nwomaa he anu naso ne, ole anigye."*

8 Me Yohane, me yeɛ ndele ɛhemɔ na nwuni ye ne, na mmerɛ bɔ ndele na nwuni ye ne, mmutuli abɔfo bɔ ohyirele me sɔ nningyein nemɔ ne gya bo kyɛ mesõ ye. 9 Nakoso ɔha hyirele me kyɛ: "Nea yé! Nnɛyɛ sɔ! Me koso nde akoaa te kyɛ wɔ ne eliema adiifoɛ ne bɛ bɔ bɛdi edwirɛ bɔ ɔwɔ nwomaa he anu naso nala. Sõ Nyameɛ."

10 Osa ha hyirele me kyɛ: "Ngɔmhyɛ dwirɛ bɔ ɔwɔ sɔ nwomaa he anu ne, nnɛfa nikye ta ye noa, ofikyɛ mmerɛ bɔ bahyɛ ne aso ayie. 11 Bɔ ɔndengyɛ ne, ɔhɔ so yɛ nningyein bɔ ɔndengyɛ, yeɛ bɔ ye nwo nde ne, ɔhɔ so yɛ nningyein bɔ ye nwo nde; nakoso teneneeniɛ de, ɔhɔ so yɛ bɔ ɔtengyɛ, na bɔ ɔte krongron ne hɔ so yɛ nningyein bɔ ɔte krongron.

12 "Nea, meba ndɛ-ndɛ, na ndira m’akatua kyɛ mefa mebrɛ ebiala kyɛbɔ ye adwuma te ɔ. 13 Me yeɛ nne Alfa ne Omega, bɔ oli moa ne bɔ ɔpɛ yebo, ahyɛaseɛ ne awieɛ ne."

14 "Anigye yeɛ ole bɛ bɔ bɛpo bɛ ndadeɛ, kyɛbɔ ɔkɔyɛ a, bekonya atee bɛkɔhɔ ngoa mmakaa nanwo, na banya atee bafa anoa nemɔ nu bahɔ kuro nanu ne. 15 Kuro ne si yeɛ ngyea, bɛ bɔ bɛyɛ ahonhomzɛm, adwamammɔfoɛ, awudifoɛ, bɛ bɔ bɛsõ bosoen, ɔne bɛ bɔ bɛkuro ngondombo na bɛpɛ ngondombo ne gua ɔ.

16 "Me Yesu, me yeɛ nzomane m’abɔfo kyɛ ooli sɔ nningyein hemɔ nwo adanzeɛ hyire ɛmɔ ma asafo nemɔ. Me yeɛ nde David ndii ne ye bosoniɛ ne, ná nde ngyerɛmɔ nzramaa bɔ ɔta ne."

17 Na honhom ne né ayeforɔ ne ka kyɛ: "Bra!" Ebiala bɔ ɔkɔte ne, ma ɔha kyɛ "Bra!" Na ebiala bɔ nzuhɔen ku ye ne, ma ɔbra, ná ebiala bɔ okuro ne, ma oole ngoa nzue mbaen.

18 "Ebiala bɔ ɔkɔte ngɔmhyɛ dwirɛ bɔ ɔwɔ nwomaa he anu ne, mebɔ ye kɔkɔ kyɛ: Sɛ ebie fa edwirɛ bie boka so a, Nyameɛ kɔfa ɔhaw bɔ bahworɔ ye wɔ nwomaa he anu ne kɔboka ye so; 19 na sɛ ebie ye edwirɛ bie fi ngɔmhyɛ nwomaa he anu a, Nyameɛ kɔye ye kyɛfa deɛ kofi ngoa bakaa ne kuro krongron bɔ bahworɔ ye nwo dwirɛ wɔ nwomaa he anu nanu."

20 Bɔ odi ɛhe anwo adanzeɛ ne nwa: "Amba, meba ndɛ-ndɛ."

"Amen. Awurade Yesu bra!"

21 Awurade Yesu adom ha akrongronfoɛ namukoraati.