1 Na nwuni kyɛ Boan Ba ne ate stamp nzoo nanu kõ, na ndele kyɛ ateasefoɛ nna nanu kõ fa konviɛ bɔ ɔte kyɛ agralaa ka kyɛ: "Bra!" 2 Mekwaanea a, pɔngɔ fufue bie ɛhe! Na bɔ ɔte ye so ne tira agyan, na bɛmane ye ɔhene kyerɛ, na ɔhɔ oolili ngunim, na oyiele ye ngunim ne.

3 Boan Ba ne tele stamp bɔ ɔtɔ so nyɔ ne, ndele kyɛ ateasefoɛ bɔ ɔtɔ so nyɔ ne ka kyɛ: "Bra!" 4 Na pɔngɔ foforɛ kɔkorɛ kɔɔ bie yele ye ti, na bɛmane bɔ ɔte so ne tumi kyɛ ɔye asomdwie fi aseɛ naso, na ɔma mmenia huhu bɛ nwo. Bɛmane ye dadeɛ kandinga bie.

5 Ɔtele stamp bɔ ɔtɔ so nza ne, ndele kyɛ ateasefoɛ bɔ ɔtɔ so nza ne ka kyɛ: "Bra!" Mekwaanea a, pɔngɔ bire bie ɛhe! Na bɔ ɔte so ne tira skeil. 6 Na ndele konviɛ bie mvili ateasefoɛ nna nanu kyɛ: "Hwiit kongo kõ te dɛnare kõ, na atokoɔ*6:6 Anaa "Baali." kongo nza te dɛnare kõ; anwa ne nzãa de, nnɛsɛkye ye."

7 Ɔtele stamp bɔ ɔtɔ so nna ne, ndele kyɛ ateasefoɛ bɔ ɔtɔ so nna ne ka kyɛ: "Bra!" 8 Mekwaanea a, pɔngɔ hoyaa bie ɛhe. Na bɛfrɛ bɔ ɔte so ne ewue, na Asieleɛ li ye si pɛɛ. Na bɛhyɛle aseɛ nanu nna bɛmane bɛ kõ so tumi, kyɛ ɔfa dadeɛ, ɛhɔen, anwonyerɛ, ne aseɛ so ngaka suronyi-suronyi bɛhu bɛ.

9 Mmerɛ bɔ ɔtele stamp bɔ ɔtɔ so nnu ne, nwuni bɛ bɔ Nyameɛ dwirɛ, ɔne adanzeɛ bɔ bɛlili nati, bɛhuni bɛ ne kra wɔ afɔleɛ bokyea nabo. 10 Na bɛteane nu serɛ-serɛ kyɛ: "O Awurade Tumvoɛ, wɔ bɔ ɛte krongron na ɛdi nahorɛ, ɛkɔ nwondɛ koodwu kyẽa beni kora ne abu bɛ bɔ bɛte aseɛ naso ne atɛn, na atua bɛ kerɛ wɔ yɛ mogya nwo?" 11 Na bɛmane bɛ nu biala atadeɛ fufue tendee bie, na bɛha bɛhyirele bɛ kyɛ, bɛle bɛ nwomeɛ kaa ma oodwu kyɛ, bɛ mmango ngoaa, ɔne bɛ liema mɔ bɔ bɛbaahu bɛ kyɛ bɛ ala ne dodoɔ kɔbɔ yenoa.

12 Ɔtele stamp bɔ ɔtɔ so nzia ne, nwuni ye, na aseɛ wosolɛ kandinga sili; na eyia yɛle tumm kyɛ brisie, na ɛsraen yɛle kyɛ mogya, 13 na nzramaa bɔ ɔwɔ anwuro ne tete guale ase te kyɛ borɔdoma bɔ mvrama kandinga woso ye poro ye mma amui gua ne. 14 Na anwuro minini te kyɛ nwomaa bɔ bɛbobɔ ne, na bɛtuli bokaa ne supɔ biala bɛfili nekaa bɔ ɔwɔ ne. 15 Afei aseɛ so ahemvo, atitire, sogyafoɛ mbanyi, asikafoɛ, bɛ bɔ bɛle anwoserɛ, ngoaa ne bɛ bɔ balɛ́ bɛ nwo namukoraati feale kumaa ne mmokaa so nyɔbotaen mɔ nu. 16 Na bɛha bɛhyirele mmokaa ne nyɔboɛ nemɔ kyɛ: "Ɛmɔɔgua yɛ so, na ɛmɔfa yɛ bɛfea bɔ ɔte ɔhene bia*6:16 Anaa "Ahennie bia." naso ne, ɔne Boan Ba ne yaa ne, 17 ofikyɛ kyẽa piri bɔ bɛkɔfɛ yaa ne adwu, na nwa yeɛ ɔkɔhora kogyina ye noa ɔ?"