1 Ɛlɛho bie, né Petro ne Yohane kɔ asɔre awuro berɛ, né wabɔ eyia 3:00; sɔ mmerɛ ne yeɛ ne bɛbɔ mbaeɛ ne. 2 Né ebiemɔ so biaa bie, bɛwole ye ne, né wabubu. Daa biala, né bɛfa ye bɛbasie asɔre awuro né anoa bɔ bɛfrɛ ye Nyemene nanwo, kyɛbɔ ɔkɔyɛ a ɔkɔhora kɔsrɛ nikye kofi bɛ bɔ bɛkɔ asɔre awuro dɔ ne berɛ. 3 Mmerɛ bɔ onwuni kyɛ Petro ne Yohane kɔ asɔre awuro berɛ ne, ɔhyɛle yebo kyɛ ɔsrɛ nikye fi bɛ berɛ. 4 Nakoso Petro ne Yohane neane ye dinn, yeɛ bɛhane kyɛ: "Nea yɛ." 5 Yeti ɔfale ye adwene hɔle bɛ so, na ne ɔse kyɛ okonya nikye bie kofi bɛ berɛ. 6 Nakoso Petro ha hyirele ye kyɛ: "Dwetɛ ne sikaa kɔkorɛ de, nnne bie, nakoso bɔ nne ye ne yeɛ mefa mema wɔ ne. Nazerɛtniɛ Yesu Kristo dumaa nu, nate!" 7 Na ɔsɔle ye sa famaa nu mane ye so, na ɛberɛ ala, ye gya ne ye gya-porɛ nanu yɛle se; 8 ná odwɔso gyinane ye gya so, na ɔne bɛ nate hɔle asɔre awuro berɛ, bɛkɔ namukoraati, né ohuri-huri ye Nyameɛ ayɛ. 9 Ná mmenia namukoraati nwuni kyɛ ɔnate ye Nyameɛ ayɛ ne, 10 bɛnwuni kyɛ ye yeɛ né ɔtena asɔre awuro né anoa bɔ bɛfrɛ ye Anoa Nyemene nanwo srɛ-srɛ sikaa ne. Na bɔ wasi ne yɛle bɛ nwanwa, na bɛ nye gyele pa.

11 Ná mmerɛ bɔ biaa ne tɛ́ tira Petro ne Yohane nu wɔ Solomon varanda naso ne, mmenia namukoraati tuli mirika wale berɛ, na bɔ wasi ne maa bɛ nwo dwirili bɛ paa. 12 Petro nwuni ye sɔ ne, ɔhane kyɛ: "Israel mmrienzua, nzuati yeɛ ɛmɔ amaa ɛhe ayɛ ɛmɔ nwanwa sɔ ne? Ná nzuati yeɛ ɛmɔnea yɛ haa te kyɛ ɛnwa yɛ bɔbɔ yɛ tumi anaa yɛ nyamesom pa yeɛ wamaa biaa he anate ne? 13 Abraham, Isaac, ne Yakob Nyameɛ, yɛ Baba mɔ Nyameɛ ne ahyɛ ye akoaa Yesu anuonyam. Sɔ Yesu he yeɛ ɛmɔ yele ye bɛmane ne, na mmerɛ bɔ Pilato yɛle ye adwene kyɛ ɔyakyi ye ne po, ɛmɔ pole ye.* 14 Ɛmɔ pole Sona bɔ ɔte Krongron na ɔte Teneneeniɛ ne, na ɛmɔhane kyɛ ɔyakyi wudiniɛ ne ma ɛmɔ, 15 na ɛmɔhuni bɔ otira ngoa nzafoa ne. Nakoso Nyameɛ tingyele ye fili ewue nu, na yɛte edwirɛ he anwo adanzefoɛ. 16 Ye dumaa ne, ɔne gyidie bɔ yɛle ye wɔ ye dumaa nanu ne, yeɛ wamaa biaa he bɔ ɛmɔnwu ye, na ɛmɔse ye ne nwo atɔ ye ne. Na gyidie bɔ ɔnate Yesu so ne yeɛ wamaa biaa he nwo atɔ ye koraa wɔ ɛmɔ mukoraati nyunu ne.

17 "Afei aliemaa mɔ, mese kyɛ, sɛ ne ɛmɔse a, ahaa ɛmɔ anyɛ sɔ, na atemmufoɛ ne koso, né bɛnze. 18 Nakoso ɛhe amaa bɔ Nyameɛ nate adiifoɛ nemɔ so ha tole berɛ ne awa nu. Ɔhane kyɛ, ye Kristo ne konwu amaneɛ. 19 Yeti, ɛmɔsakra ɛmɔ adwene, na ɛmɔkakyi ɛmɔ nwo ma bɛkyikyi ɛmɔ bɔne. Sɛ ɛmɔyɛ sɔ a, ahotɔ mmerɛ kofi Awurade bɔbɔ berɛ kɔwa, 20 na ɔkɔsoma Yesu bɔ ɔte Kristo bɔ waye ye ne kɔma ɛmɔ. 21 Ɔkɔtena anwuro tonn koodwu mmerɛ bɔ bɛkosiesie nningyein mukoraati ne, ɛhene yeɛ Nyameɛ nate ye adiifoɛ krongron nemɔ so aha ye nwo dwirɛ ato berɛ dadaada ne. 22 Mose hane kyɛ: ‘Awurade, ɛmɔ Nyameɛ kɔye diifoɛ bɔ ɔte kyɛ me kofi eliema mɔ nu kɔma ɛmɔ. Edwirɛ biala bɔ ɔkɔha kohyire ɛmɔ ne, odikyɛ ɛmɔtie. 23 Ná ebiala bɔ wandie sɔ diifo ne, bɛkɔsɛkye ye koraa bɛkofi mmenia nanu.’ 24 Na adiifoɛ namukoraati, ofi Samuel so ɔbaadwu bɛ bɔ bɛli ye si bɛwale naso ne, ebiala bɔ odwudwole ne hane sɔ ngyẽa nemɔ nwo dwirɛ pefee. 25 Ɛmɔte adiifoɛ nemɔ ne apam bɔ Nyameɛ ne ɛmɔ baba mɔ yɛle ne mmaa. Ɔha hyirele Abraham kyɛ: ‘Wɔ bosoniɛ yeɛ ɔkɔmaa mmusua bɔ ɔwɔ aseɛ naso namukoraati ne konya nhyira ɔ.’ 26 Na mmerɛ bɔ Nyameɛ tingyele ye akoaa ne, oli moa somane ye kyɛ ɔbra ɛmɔ berɛ, na ɔɔkakyi ebiala fi ye bɔne nwo, ná wamaa ɛmɔ anya nhyira."