Nehemia 2

Nehemia Lakyɛ Yerusalem

1 Di Ɔka Artasasta alɛɛ afosi-anyɔ kamɛ, di Yuda batii kɔwɛntɛ ko manlɛɛ ni Nisan*2.1 kɔwɛntɛ ko mmle ninle kɔkasale di Babilonia batii awɛntɛ kamɛ nɛ, diɛyɔ ni di kɔwɛntɛ tiɛfa ntɛɛ diɛlaase ni di kwɛntɛ naafa ntɛɛ kamɛ, di obe wɔ baawako ni ɔka nta yi, ni layɔ nta nwu lata ɔka nɛ. Diidii nimbla biɔɔ di anu nɔɔ; 2 nioso ɔka nwu lakaalɛ mi alɛ, "Obe oso di anu lɛfɔ lɛbla biɔɔ nkpo, di obe wɔ fonoofiɛ ni? Nle mmle diele lɛsalɛsaa kafɔɔ, otu kamɛ sɛnyaami dile."

Layɛkɛ osie kanya, 3 kafɔɔ latɔkɔ ɔka nlɛ, "Ɔka asiɛ nkpa dinaa ni kaloo! Obe oso di anu nii dilaabla biɔɔ, di obe wɔ di okpoo kplɛ wɔ baakookaa ni bate nii ntoobiɛ ni, di ɔtɔ kafɔɔ ntoofiɛ ni n-yoko ninwu?"

4 Ni di ɔka nwu lakaalɛ mi alɛ, "Obe ninle nle foomiɛ ni?"

Ninfɛ lapɛ ɔlaa lata Yaa nwu di osi nɛ, 5 ni latɔkɔ ɔka nwu nlɛ, "Nse diɛyɔɔ ɔka kafutu di kpɛmblatɛ lɛfɔ kafɔɔ kawɛ sibualɛ di anu nɔɔ yi, ni ɔka aakpee mi okpoo kplɛ nwu di Yuda, di nfũ baakookaa ni bate nii alɛ kakple nsè nwu letofo."

6 Ninfɛ di ɔka nwu, di ɔka-sanko lasiɛ nwɔ ni di ɔlɔɔkɔ, lakaalɛ mi alɛ, "Lɛ di osuku lɛfɔ ɔkyɛ kamaklɛ? Ɔmɛmbe kafɔɔ fabakple fanwa?" Diayɔɔ ɔka kafutu alɛ okpee mi; nioso latɛ obe.

7 Ni latɔkɔ nwɔ kafɔɔ nlɛ, "Nse diɛyɔɔ ɔka kafutu yi, ni atɛɛ akũ nkyɛnko abaa kanyabayilatɛ nwu di Okle-Kamaa, alɛ baatɛɛ osuku nfe buɛɛ nnaabuo Yuda. 8 Ni faatɛɛ kukũ kafɔɔ nkyɛnko ɔka lepoo nyuntɛ Asaf, alɛ aatɛɛ awoso mbɛ sewoso nta kaTiNiKoKɔ nwu di olekatakɔ ɔlɔɔkɔ n-yoko ku okpoo kplɛ nwu seyoyiɛ ku leyo le kamasiɛ nii." Ta di Yaa nii sibualɛ kɔnɛɛ latika mi ni di suoto oso yi, ɔka nwu latɛɛ asaa ya lakaalɛ nii. 9 Nioso lakyɛ abaa kanyabayilatɛ nwu nfũ di Okle-Kamaa, ni lalaayɔ ɔka akũ nwu lata ma nɛ. Ɔka kafɔɔ lakpee bakpɛtɛ ku bapɔnkɔ basiɛtɛ latikankoe.

10 Obe wɔ di Sanbalat, Horon otii nwu ku Tobia, Amon otii ɔnɔɔfotii nwu lanu ni nle mmle yi, diakpee ma kubuɛ osie kanya alɛ otii owo ntɔɔwa alɛ ɔɔbatakatɛ Israel batii disi katoo.

Nehemia Lanyunyuu Yerusalem Seyoyiɛ Nwu Aafenko

11 Ni lakyɛ Yerusalem nɛ, lasiɛ ninfa ayi atiɛ, 12 ni ladie ku kakyɛ munko basuɔtɔ basɛɛ nɛ. Ntatɔkɔ kuonwii lɛsaa le di Yaa nii layɔ aakpee mi ni di otu alɛ mbla nta ni Yerusalem. Bapɔnkɔ ku-banwii ditawɛ di ɔkyɛ nii, dilenkee onwii wɔ suoto lasiɛ nii.

13 Di kakyɛ ladie lafe di Ɔtaata Kayoko diofe ni di Kɔsanwu Ntu Dibiɔ ku Lefleku Kayoko, lanyunyu Yerusalem seyoyiɛ se niabiɛ siate ni, ku n-yoko nɔɔ be di ɔtɔ lafiɛ nii. 14 Ninfɛ lakple lakyɛ sitũ diofe ni Ntu Kataakɔ Kayoko ku Ɔka Ntu Lɛpanta nwu, kafɔɔ lɛba nwu dita blɛfɛ di pɔnkɔ nii kafuo ni ofe; 15 nioso lakata lakyɛ ɔtaata nwu ku kakyɛ, lalaanyunyu oyoyiɛ nwu. Di kayɛntɛkɔ, lapɛ lakple sɛmaa, ni lalaase dibuo ofe di Ɔtaata Kayoko nɛ. 16 Banɔɔfotii nwu ditatofo fɛ lafe ee lɛsaa le latɔɔbla nii, diekye di obe nwu nimbuɛ ɔlaa kuonwii ntɔkɔ Yuda batii ee olebatatɛ ee banɔɔfo ee banɔɔfotii ee batii bamba ba nimabla ni ɔkpɛ nwu.

17 Ni latɔkɔ ma nlɛ, "Biɔnya dibuo le kamɛ busi ni: Yerusalem ntoobiɛ, bɛɛfiɛ n-yoko ninwu kafɔɔ ku ɔtɔ. Biwa, biɛta buse Yerusalem oyoyiɛ letofo, ni buloosinwa ɔbasiɛ di sinunsɔ kamɛ." 18 Latɔkɔ ma kafɔɔ mmle di Yaa nii sibualɛ kɔnɛɛ ntika mi ni di suoto ku ɔlaa wɔ di ɔka latɔkɔ mi nii.

Ni baadiki kanya alɛ, "Bita bukyekasɔ buose otootofo." Nioso baakye ɔkpɛ biene wɔ mmle kasɔ.

19 Kafɔɔ obe wɔ di Sanbalat, Horon otii nwu, Tobia Amon otii ɔnɔɔfotii nwu ku Gesem, Arabia otii nwu lanu nwu ni ole yi, baama wo, baanyu wo nyakatãa. Ni baakaalɛ alɛ, "Obe ninle nle biɔbla ni nɛ? Ɔtaka biɔtaka min-yila di ɔka suoto nɛ?"

20 Ni ladiki kanya latɔkɔ ma nlɛ, "Yaa wɔ di Osi kamata ɔkpɛ nwu n-lɛ wo ɔbla. Awo bakpɛmblatɛ nɔɔ bubakyekasɔ munse letootofo, kafɔɔ aye yi, binaa kalekɔ kukanwii di Yerusalem ee biwɛ lɛsalɛsaa kuninwii ee biwɛ osuku di saa sɛsaabla suoto."