1 Di Israel ɔka Ela obisuɔtɔbi, Hosea lɛlɛɛ tiɛfa kamɛ yi, ni di Yuda ɔka niale ni Ahas obisuɔtɔbi, Hesekia lakye kasɔ aatoole sɛka nɛ. 2 Alɛɛ afosi-anyɔ-anɔɔ aafũ fiɛ aabale ɔka. Ni aale sɛka di Yerusalem alɛɛ afosi-anyɔ-anaasĩ nɛ. Ɔya leyooto niale Abi nɛ, Sakaria obisankobi aale. 3 Aabla lɛsaa le niasiɛko ni di SAATE nwu anu, fɛ mmle di ote Dawid labla nii. 4 Aabibiɛ ntakalekɔ nwu, aakpakpaa afiɔtii, aabubudi Asera sewoso nwu. Aabibiɛ lɛbɔɔsaa kɔsaanwu ko di Mose labla ni wɔkyɔwɔkyɔ. Diekye diabadu ni obe nwu kamɛ Israel batii latoofiɛ olufui baatɔɔta kũ. (Baatɔɔlɛɛ kũ alɛ Nahustan.)

5 Hesekia latika disi di SAATE, Israel Yaa suoto. Kuonwii ditawɛ fɛle nnwɔɔ okle di Yuda baka bamuu kamɛ, bia mba niale nwɔ ni katũ ee mba sɛɛmaa nɔɔ. 6 Aamufũ SAATE nwu aaklee kpinkpĩ, atadiɛ nwɔ otikanko; aale SAATE nwu afiofa ya di Mose lata nii. 7 Ni di SAATE nwu lasiɛko nwɔ nɛ. Lɛsaa lele kafɔɔ aabla, lalɛ ɔkyɛ diatɔɔ. Aataka aayila di Asiria ɔka suoto, ni atasumu nwɔ nɛ. 8 Diayɔ ni di lɛba takale le manyila man-nyu ni, dialaadu ni okpoo kplɛ wɔ baatofo seyoyiɛ baakyisa nii, aalenkee Filisti batii dialaadu bia Gasa okpoo kplɛ ku sekpoo se niamana nwu kuakyi nii.

9 Di Ɔka Hesekia lɛlɛɛ naafa kamɛ, diale ni Israel ɔka Ela obisuɔtɔbi, Hosea lɛlɛɛ kuɛnsinle yi, ni di Asiria ɔka, Salmaneser lataka di Samaria suoto, ni baamana nwu baakyi nɛ. 10 Di lɛlɛɛ tiɛfa kayɛntɛkɔ, Asiria batii lafũ okpoo nwu. Nioso baafũ Samaria di Hesekia sɛka ole lɛlɛɛ kuɔnle kamɛ, diale ni Israel ɔka Hosea lɛlɛɛ naasinle kamɛ. 11 Ni di Asiria ɔka lakpaa Israel batii aasifiko aalaasiɛsa ma di Hala okpoo, di Gosan di Habor Okle-lɔɔkɔ ku Media sekpoo kamɛ nɛ. 12 Nle mmle lawa ta batakyɔɔ ni SAATE, Yaa lɛma ɔlaa atoko, kafɔɔ baasĩ ni kanya ninii nɔɔ nwu- kufiofa ko kumuu di SAATE nwu kpɛmblatɛ Mose labuɛ nii. Batakyɔɔ afiofa nwu atoko ee bale nya.

13 Di Ɔka Hesekia lefosi lɛlɛɛ naafa sɛka ole kamɛ yi, Asiria ɔka Senakerib lataka di Yuda sekpoo kplɛ se baatofo seyoyiɛ baakyisa ni simuu, ni baafũ sĩ nɛ. 14 Nioso Yuda ɔka Hesekia lata Asiria ɔka kanya ka mmle di Lakis alɛ: "Lɛbla okpile. Kple nkpaamaa di suoto nii, kamata fɔ kɔsɔsĩ lele fɛɛkaalɛ mi." Ni di Asiria ɔka latɔkɔ Yuda ɔka Hesekia alɛ atɔɔ koto fututu bakilo nkpe nnaasĩ ku koto sɛɛle bakilo afosi-anaasĩ nɛ. 15 Nioso Hesekia layɔ koto fututu ko kumuu baanya ni di SAATE nwu olekatakɔ ku lɛkayo asaakatɛkɔ kamɛ aatɔɔ.

16 Di obe nwu kamɛ, Yuda ɔka Hesekia lakpakpaa koto sɛɛle ko aayɔ aakakaasa ni di SAATE nwu olekatakɔ akloo ku akloo sewoso suoto, ninfɛ aayɔ aata Asiria ɔka nɛ.

17 Ni di Asiria ɔka lakpee bakpɛtɛ kanyayilatɛ ɔnɔɔfo-nɔɔfo, banɔɔfotii ɔnɔɔfo ku bakpɛtɛ kanyayilatɛ nɔɔ ku bakpɛtɛ ɔlambu baakye Lakis baakyɛ Ɔka Hesekia nfũ di Yerusalem nɛ. Baadu ni Yerusalem, baayila di kawaalɛkɔ nwu di Katoo Lɛpanta katũ, di Asaa-fototɛ Kofe osuku kanya. 18 Ni baalɛɛ ɔka Hesekia aawa nɛ; ninfɛ di lɛkayo asaa nyuntɛ wɔ niale ni Hilkia obisuɔtɔbi, Eliakim ku kukũ kpanatɛ Sebna ku Asaf obisuɔtɔbi, Yoa wɔ niale ni asaakatɛkɔ nsũtɛtɛ ladie baakyɛ ɔkyɛ lɛma nɛ.

19 Ni di bakpɛtɛ kanyayilatɛ nwu latɔkɔ ma alɛ, "Bitɔkɔ Hesekia bilɛ:

" ‘Nnya ɔlaa wɔ di ɔka kplɛ, Asiria ɔka kobuɛ ni alɛ: Obe lɛsaa suoto feetika disi lɛfɔ? 20 Foobuɛ falɛ fakpe sisuku se mankpɛ ni kakpɛ ku bakpɛtɛ osie- kafɔɔ kanya fukuti lete foobuɛ. Owe suoto feetika disi oso fɛɛtaka fayɛ mi di suoto? 21 Nyu lo, Egipte feetika disi, okpoku feele nwu, nintofo ni otii kɔɔnɛɛ, kuntika nwɔ ni kakɔ nse ɛɛkpɛ ninwu suoto! Nkpo di Egipte ɔka Farao nte ata batii ba bamuu nietika nwɔ ni disi nɛ. 22 Ni nse fɛɛtɔkɔ mi falɛ, "SAATE, Yaa loo nwu buotika disi"- ni diele nnwɔɔ ninle nnwɔ ntakalekɔ ku oleɔta akyikye di Hesekia ntoobibiɛ, ɛɛtɔkɔ ni Yuda ku Yerusalem alɛ, "Dikpe ni biesumu ni di oleɔta akyikye ya mmle katũ"?

23 " ‘Kanua wa, biebuɛ ku saate nii Asiria ɔka: Kamata fɔ bapɔnkɔ nkpe nnyɔ- nse fabafuo basiɛtɛ ɔwɛ ɔta ma! 24 Ni lɛ nfɛ fabafuo kakpɛ ɔnɔɔfo onwii wɔ ninle ni obiibii di saate nii bakpɛtɛ kamɛ olenkee, fiɛ bia di Egipte feetika ni disi falɛ ata fɔ ni bakeke ba di bapɔnkɔ nnanfi ni ku bapɔnkɔ basiɛtɛ? 25 Diɛkyakaa nii, ntodiwa lɛbakpɛ, lɛwɔɔsa kafɔɔ lɛba le mmle, di ɔlaa kuonwii ditakye ni SAATE nwu nfũ? SAATE nwu omu niɛtɔkɔ mi alɛ nkyɛ ninaadieko kale nwu ninwɔɔsa ka.’ "

26 Ninfɛ di Hilkia obisuɔtɔbi, Eliakim ku Sebna ku Yoa latɔkɔ bakpɛtɛ kanyayilatɛ nwu alɛ, "Lekoto, kakatɛko bakpɛmblatɛ lɛfɔ di Arameik sele kamɛ, diekye nsĩ buonu nɛ. Tankakatɛko wo di Hebri sele kamɛ, di mmle di batii ba di oyoyiɛ suoto dilɔbanu nii."

27 Kafɔɔ bakpɛtɛ kanyayilatɛ nwu ladiki kanya alɛ, "Bienyu bilɛ saate lee ku aye lete ɔkyɛ di saate nii lekpee mi alɛ matɔkɔ ye sɛlaa se mmle, ni diele ku mba ninsi ni di oyoyiɛ suoto- mba ninte ni fɛle aye, babale ni mma bamu mmbi, mannyi ni kafɔɔ mma bamu kɔsɔ."

28 Ninfɛ di bakpɛtɛ kanyayilatɛ nwu lataka aayila aafaa di Hebri sele kamɛ aabuɛ alɛ: "Binu Asiria ɔka kplɛ ɔlaa! 29 Nnya ɔlaa wɔ di ɔka kobuɛ ni alɛ: Bitanta Hesekia lakyɔnkyɔ ye. Ɔlɔbafuo ye ofũ di nnɛɛ nii. 30 Bitanta Hesekia lata ye biatika disi di SAATE nwu suoto, di obe wɔ aabuɛ ni alɛ, ‘Nwaako, SAATE nwu kamadiki wo nii; blɔbayɔ okpoo kplɛ wɔ mmle bakpee di Asiria nnɛɛ.’

31 "Batannu Hesekia. Nnya ɔlaa wɔ di Asiria ɔka kobuɛ ni: Bibla atoko ɔkyɔ ole ku ami, biedie biwa ɔkyɛ nii. Ni obiala lee kamale di nnwɔɔ omu nɔɔ nta awosobi kofe ku abue-woso nɔɔ, annyi ntu kafɔɔ di nnwɔɔ omu nɔɔ ntu dibiɔ kamɛ, 32 ninaase di obe wɔ kamawa mmakpaa ye nsifiko ni kasɔ ka ninte ni fɛle kale ye kamu okle. Atitabi ku nta fɔle kasɔ, alesaa ku nta awosobi kasɔ, nnɔnyi awoso ku bablɔ kasɔ. Bidiki nkpa, kafɔɔ diele kukpi!

"Bitannu Hesekia, diekye ɔɔkyɔnkyɔ ye, nse eebuɛ alɛ, ‘SAATE nwu kamadiki wo.’ 33 Kale kawo yaa ntodifũ kasɔ nɔɔ eekyeko Asiria ɔka nnɛɛ? 34 Ɔfɛ di Hamat ku Arpad bayaa nkpe? Ɔfɛ di Sefarwaim, Hena ku Iwa bayaa nkpe? Batoofũ Samaria di nnɛɛ nii? 35 Di nnle be mmle bayaa nwu bamuu kamɛ, ɔmɛnle lɛma nintoofuo kasɔ nɔɔ ofũ di nnɛɛ nii?"

36 Kafɔɔ batii nwu lalokanana, batadiki kanya, diekye ɔka Hesekia latɔkɔ ma alɛ, "Bitandiki ɔlaa nɔɔ kanya."

37 Ninfɛ di lɛkayo asaa nyuntɛ wɔ niale ni Hilkia obisuɔtɔbi, Eliakim ku kukũ kpanatɛ Sebna ku Asaf obisuɔtɔbi, Yoa wɔ niale ni asaakatɛkɔ nsũtɛtɛ ladie baakyɛ Hesekia nfũ ku akpeele lɛma bɛbɛɛle, baalaatɔkɔ nwɔ ɔlaa wɔ di bakpɛtɛ kanyayilatɛ nwu labuɛ ni nɛ.